Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Elorda ákimdiginiń aldyndaǵy alańda skver ashylady

2021 jyldyń 15 qyrkúıek 2021 08:56

NUR-SULTAN. QazAqparat - Elorda ákimdigi ǵımaratynyń aldyndaǵy ortalyq alańda skver ashylady. Qazir aǵash otyrǵyzý bastalyp ketti, dep habarlaıdy QazAqparat qala ákimdigine silteme jasap.

Beıbitshilik kóshesiniń boıynda, sondaı-aq Abaı kóshesine jaqyn ornalasqan tusqa jóke aǵashyn otyrǵyzý bastaldy. Kúzde 770,3 tekshe metr alańǵa 200-ge jýyq aǵash otyrǵyzý josparlanyp otyr.

Sonymen qatar, landshaf araldar jasalady, onda kópjyldyq buta men gúl egiledi.

Alań aýmaǵyn kógaldandyrýmen qatar, onyń basqa bóliginde (Sine Tempore saýda ortalyǵyna qarama-qarsy) sýburqaq kesheni men amfıteatr salynyp jatyr. Munda arkaly sýburqaq ornatý josparlanǵan. Onyń dızaınynda sýdan ottegini alyp tastaıtyn arnaıy sańylaýlar qoldanylady, nátıjesinde sý móldir bolady.




Túngi ýaqytta jaryq qosylyp, odan áserli bolady. Bul alańda tumandy bult shyǵaratyn sýburqaq art-nysany da ornalasady. Onyń aınalasyna qurǵaq sýburqaq salý josparlanýda.

«Bos jerler men qaraýsyz qalǵan ýchaskelerde jaıly saıabaqtar men qoǵamdyq keńistik ashylýy múmkin, onda qala turǵyndary sýburqaqtyń janynda saıa taýyp, aǵash kóleńkesinde demaldy. Muny biz qaladaǵy ashylatyn tartymdy oryndardan, emen alleıasynan, serýendeý saıabaqtarynan baıqaýǵa bolady. Yńǵaıly qalalyq orta adamdy jaqsy jaqqa ózgertedi. Mysaly, kez-kelgen jerge qoqys tastaýǵa bolmaıdy Qolaıly ári ádemi jerde adamnyń kóńil-kúıi kóteriledi. Mundaı jumys barlyq aýdanda ortalyqtandyrý qaǵıdaty boıynsha júrgiziledi», – dedi Sáýlet, qala qurylysy jáne jer qatynastary basqarmasynyń basshysy Nurlan Uranqaev.




Osylaısha, qalanyń eski ortalyǵyndaǵy alań tartymdy jáne serýendeý orynynyń birine aınalady. Buǵan deıin qalalyq ýrbanıstıka ortalyǵy habarlaǵandaı, alań tarıhı ortalyqtaǵy barlyq jaıaý júrginshi kóshelerin baılanystyrady.
Esterińizge sala keteıik, bıyl «Jastar» saraıynan bastap jas kórermenniń mýzykalyq teatryna deıingi «Teatralnyı» jaıaý júrginshiler jelekjoly, sondaı-aq Ázirbaıjan Mámbetov kóshesindegi «Demalys Promenade» jaıaý júrginshiler jelekjoly tolyǵymen ashyldy.

Jumystar elorda ákiminiń tapsyrmasy boıynsha «Nur-Sultan – jaıly qala» master jospary aıasynda júrgizilip jatyr.

Aıta keteıik, 2020 jyly qalada 150-den astam aýla men 60 qoǵamdyq keńistik (saıabaq, skver, býlvar) abattandyryldy. Bıyl 190 aýla men qoǵamdyq keńistik salynady jáne jóndeledi.








Basty sózder: Ákimdik, Nur-Sultan,
Joǵary qaraı