Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Elordada Belarýs eliniń mádenıet kúnderi bastaldy

2021 jyldyń 1 qazan 2021 21:05

NUR-SULTAN. QazAqparat – Qazaqstanda Belarýs respýblıkasynyń mádenıet kúnderi bastaldy, dep habarlaıdy QazAqparat tilshisi.

Aıtýly is-shara Belarýs kınosy kúnderiniń saltanatty ashylýymen bastaý aldy.

Aldaǵy 3 kún boıy elorda jurtshylyǵy «Kerýen» oıyn-saýyq jáne saýda ortalyǵyndaǵy kınoteatrdan belarýs fılmderin tegin tamashalaı alady.

Kıno kúnderiniń shymyldyǵy rejısser Dmıtrıı Astrahannyń «Sýdba dıversanta» fılmimen ashyldy. Jáne kıno kúnderi aıasynda 10-nan astam fılm kórsetilmek.

«Eki el arasyndaǵy yntymaqtastyq qarym-qatynastyń irgesi berik. Sonyń ishinde mádenı qarym-qatynas ta bar. Qazaqstan Belarýste ótetin iri mádenı-aǵartý is-sharalaryna belsene qatysyp keledi. Sonyń biregeıi Belarýs elinde dástúrli túrde ótetin halyqaralyq kitap kórmesi, «Slavıan bazary» halyqaralyq mýzykalyq óner festıvali, Mınskide ótetin «Lıstopad» halyqaralyq kınofestıvali jáne taǵys basqa. Bıyl «Lıstopad» halyqaralyq kınofestıvali aıasynda belarýs jurtshylyǵy nazaryna birneshe otandyq fılm usynyldy. Odan bólek, bizde memleketten bıýdjetten Belarýs elimen birlesip fılm túsirýge qarjy qarastyrylǵan», - dedi QR Mádenıet jáne sport mınıstriniń orynbasary Nurǵısa Dáýeshov mádenı sharanyń ashylý saltanatynda.




Sondaı-aq, vıtse-mınıstr astanalyqtardy Belarýs eliniń mádenıet kúnderi aıasynda ótetin sharalarǵa qatysýǵa shaqyryp, atalǵan ulttyń mádenıetimen jaqynyraq tanysýǵa keńes berdi.

«Dástúrge saı Qazaqstanda Belarýs Respýblıkasynyń mádenıet kúnderin ashyq dep jarııalaımyz. Eń alǵash ret 2013 jyly bizdiń elde Qazaqstannyń mádenıet kúnderi atalyp ótildi. Sodan beri jyl saıyn eki elde mádenıet kúnderi turaqty túrde ótip keledi. Ókinishke qaraı, ótken jyly pandemııaǵa baılanysty atalǵan mádenı shara uıymdastyrylmady. Nur-Sultan qalasyndaǵy mádenıet kúnderin otandyq fılmderimizdi usynýdan bastaımyz. Qazaqstandyq kórermenderge tarıhı, kórkem jáne anımatsııalyq fılmder kórsetiletin bolady. Kınotýyndylar qazaqstandyqtardyń kóńilinen shyǵady dep oılaımyz. Sol sııaqty fılmderdi tamashalaý arqyly belarýs halqyn jaqynyraq tanı alasyzdar degen úmittemin», - dedi Qazaqstandaǵy Belarýs Respýblıkasynyń Tótenshe jáne Ókiletti elshisi Pavel Ýtıýpın atalǵan sharada.




Odan bólek, elshiniń aıtýynsha, erteń Ulttyq mýzeıde «Qazirgi Belarýs jas sýretshilerdiń kózimen» atty kartına kórmesin ashý josparlanyp otyr.

Sonymen qatar, erteń keshke «Qazaqstan» kontsert zalynda merekelik kontsert ótedi.



































Joǵary qaraı