Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Elordada polıtsııaǵa para bermek bolǵandarǵa qatysty 16 qylmystyq is tirkeldi

2021 jyldyń 25 qarasha 2021 19:05

NUR-SULTAN. QazAqparat – Elordada jyl basynan beri polıtsııa qyzmetkerine para bermek bolǵandarǵa qatysty 16 qylmystyq is tirkeldi. Bul jaıynda Nur-Sultan qalalyq polıtsııa departamentinen málim etti, dep habarlaıdy QazAqparat tilshisi.

«Elordalyq polıtsııa qyzmetkerleri sybaılas jemqorlyqtyń aldyn alýǵa, sondaı-aq mundaı faktilerdi anyqtaý jáne jolyn kesýge baǵyttalǵan turaqty túrde is-sharalar ótkizedi. Jyl basynan beri Nur-Sultan qalalyq polıtsııa departamenti para berýshilerge qatysty 16 qylmystyq isti tirkep, sotqa joldady. 2 quqyq buzýshyǵa qatysty ákimshilik materıal toltyryldy. Máselen, qylmystyq tergeýdi toqtatý úshin 100 myń teńge kóleminde para bergeni úshin elordanyń 40 jastaǵy turǵyny ustaldy», - dep atap ótedi departamentten.

Sondaı-aq vedomstvo málimetinshe, Patrýldik polıtsııa polkiniń ekıpajy qala kóshelerin sholǵyndaý kezinde «Mazda 323» markaly avtokólikti toqtatady. Al atalǵan kóliktiń júrgizýshisi tehnıkalyq baıqaýdan ótpegeni úshin ákimshilik hattama toltyrtpaý maqsatynda para berýge tyrysqan. Jol erejesin buzǵan «Toyota» markaly avtokóliktiń júrgizýshisi de dál osyndaı jolmen ákimshilik jaýapkershilikten jaltarýǵa áreket jasaǵan. Biraq, polıtsııa qyzmetkerleri atalǵan faktilerdiń jolyn kesip, zańǵa qaıshy áreketter qyzmettik beınetirkegishke jazyp alǵan.

Osyǵan oraı Nur-Sultan qalalyq polıtsııa departamenti para bergeni úshin aıyppul nemese 15 jylǵa deıingi merzimge bas bostandyǵynan aıyrý túrinde qylmystyq jaýapkershilik qarastyrylǵanyn eske salady. Al polıtsııa qyzmetkerleri tarapynan zańsyz áreketterge tap bolsańyz nemese sybaılas jemqorlyq quqyq buzýshylyqtyń kýási bolsańyz, onda «1402» biryńǵaı senim telefonyna habarlasa alasyz.


Joǵary qaraı