Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Elordada «Saz sıqyry -2021» qaıyrymdylyq festıvali ótti

2021 jyldyń 5 jeltoqsan 2021 14:41

NUR-SULTAN. QazAqparat - Elordada «Saz sıqyry» qaıyrymdylyq festıvali ótti. Joba aıasynda aýyldy eldi mekenderde ornalasqan balalar úılerine kómek kórsetiledi, dep habarlaıdy QazAqparat tilshisi.

Sondaı-aq balalarǵa ózderi armandaǵan túrli jańa jyldyq syılyqtar tabystalady. Olardyń qatarynda velosıped, skeıt, samokat, telefondar men planshetter jáne basqa da syılyqtar bar. Jyl saıyn jańa jyl meıramy qarsańynda ótkiziletin «Saz sıqyry» festıvali aıasynda búldirshinder meıirim men qamqorlyq sezimine bólenip, merekelik atmosferany sezinedi.

Bıyl «Saz sıqyry» jobasy aıasynda kelesi uıymdarǵa kómek kórsetiledi:

1.Otbasy úlgisindegi balalar aýyly (Kenjekól aýyly, Pavlodar obl.)

2. Qıyn jaǵdaıda qalǵan balalarǵa qoldaý kórsetý ortalyǵy (Taraz qalasy)

3.Otbasy úlgisindegi balalar aýyly men jasóspirimder úıi (Geolog aýyly, Atyraý obl.)

4. «Tańsholpan» balalar úıi (Prıshahtınsk aýyly, Qaraǵandy obl.).




Jınalǵan qarajatqa joǵaryda kórsetilgen balalar mekemelerindegi oıyn bólmeleri men oqý sheberhanalaryna arnalǵan zamanaýı qural-jabdyqtar, sondaı-aq ońaltý jabdyqtary satyp alynady.

Festıvaldiń uıymdastyrýshysy – «Degdar» gýmanıtarlyq qory.

«Saz sıqyry» jobasy bıyl 4-ret ótýde. Joba aıasynda biz jyl saıyn 4 balalar úıine kómek kórsetemiz. Qazir joba tarıhy elimizdiń túkpir-túkpirinde ornalasqan 12 balalar úıin qamtıdy. Joba balalar úıine qajetti medıtsınalyq jáne oqytý jabdyqtaryn satyp alýdy, sondaı-aq ár balaǵa syılyq berýdi kózdeıdi. «Saz sıqyry» jobasy – bul balalarǵa umytylmas emotsııa men merekelik kóńil-kúı syılaıtyn naǵyz sıqyrshylardyń jobasy. Elimizdiń árbir azamaty osy jobaǵa qatysý arqyly ata-anasynyń qamqorlyǵynsyz qalǵan búldirshinderge qoldaý kórsetetin sıqyrshy bola alady,- dedi «Degdar» qorynyń dırektory Laýra Ahmetova.

Balalar úıiniń ókilderi de uıymdastyrýshylarǵa óz alǵystaryn bildirdi.

«Bizdiń tárbıelenýshilerge osyndaı qamqorlyq kórsetip, qoldaý bildirgen «Degdar» qoryna zor alǵysymyzdy aıtamyz. Balalar ózderi kópten beri armandap júrgen syılyqtaryn alatyn kúndi asyǵa kútýde. Bul bizdiń balalar úshin úlken qýanysh, esten ketpes estelik. Sondaı-aq búgingi tamasha merekelik kontsert úshin de alǵysymyz zor, - dedi Atyraý oblysynyń Geolog aýylynda ornalasqan «Otbasy úlgisindegi balalar aýyly men jasóspirimder úıiniń» dırektory Gúlsara Botataeva.

Іzgilik pen meıirim shýaǵyna toly qaıyrymdylyq festıvaliniń sharapatyn balalar úıiniń tárbıelenýshilerimen birge elordalyq kórermender de sezine aldy. Bas qalanyń turǵyndary men qonaqtary tańǵajaıyp áýenderge toly mýzyka álemine saıahat jasady. Festıval aıasynda «Qazaqstan» ortalyq kontsert zalynda ótken «Rojdestvo áýenderi» qaıyrylymdylyq kontserti kórermenniń zor yqylasyna bólendi. Kontsertke otandyq klassıkalyq ónerdiń maıtalmandary Saltanat Ahmetova, Damır Sadýahasov, ASTANA OPERA halyqaralyq opera akademııasynyń bilim alýshylary qatysty. «Astana opera» teatrynyń sımfonııalyq orkestriniń súıemeldeýimen ótken kontserttiń dırıjeri – Konstantın Hvatynets (Reseı). Sahnada belgili operalar men operettalardyń arııalary oryndaldy. Kórermender bul kontsertti ádettegideı tegin tamashalaı aldy. Buǵan qosa, kontserttik zaldyń hollynda balalar úıiniń tárbıelenýshilerine arnalǵan qaıyrymdylyq bokstary ornatyldy.




Uıymdastyrýshylar atap ótýinshe, 2017 jyldan bastaý alǵan «Saz sıqyry» festıvalin ótkizý ıgi dástúrge aınaldy. Festıval aıasynda 2017- 2020 jyldar aralyǵynda 121 854 812 teńge jınaldy. Bul qarajatqa áleýmettik qoldaýǵa muqtaj balalar úıleri úshin oıyn bólmeleri men oqý sheberhanalaryna arnalǵan qural-jabdyqtar, sondaı-aq ońaltý jabdyqtary satyp alyndy. «Saz sıqyry» festıvaliniń negizin qalaýshy jáne ıdeıalyq bastaýshysy – Darıǵa Nazarbaeva. Ol «Degdar» qorynyń Qamqorlyq keńesin basqarady.








Joǵary qaraı