Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Elordada «Jyr alyby – Jambyl» teatrlandyrylǵan qoıylymy kórsetildi

2021 jyldyń 26 aqpan 2021 18:57

NUR-SULTAN. QazAqparat - Memlekettik hatshy Qyrymbek Kósherbaev Jambyl Jabaevtyń 175 jyldyǵyna arnalǵan mereıtoılyq jyldyń saltanatty ashylý rásimine qatysty, dep habarlaıdy Aqordanyń baspasóz qyzmeti.

Qazaqstanda jyr alyby Jambyl Jabaevtyń 175 jyldyq mereıtoıyn resmı túrde merekeleý bastaldy.

Qazaqstan Respýblıkasynyń Memlekettik hatshysy, Jambyl Jabaevtyń 175 jyldyq mereıtoıyn daıyndaý jáne ótkizý jónindegi memlekettik komıssııanyń tóraǵasy Qyrymbek Kósherbaev elordadaǵy Jambyl eskertkishine gúl shoqtaryn qoıyp, Q.Qýanyshbaev atyndaǵy Memlekettik akademııalyq qazaq mýzykalyq drama teatrynyń jańa ǵımaratynda mereıtoılyq jyldy saltanatty túrde ashty. Jıynǵa resmı tulǵalar, mádenıet jáne ǵylym qaıratkerleri, Almaty jáne Jambyl oblystary delegatsııalarynyń ókilderi qatysty.

Merekelik keshtiń qonaqtary jańa teatr foıesinde uıymdastyrylǵan Jambyl Jabaev murajaıynyń ekspozıtsııasymen tanysty. Qazaqstan Respýblıkasynyń mádenıet jáne sport mınıstri Aqtoty Raıymqulova saltanatty is-sharada baıandama jasady. Ol Táýelsizdigimizdiń qalyptasýynyń syndarly kezeńinde Qazaqstannyń Tuńǵysh Prezıdenti-Elbasy Nursultan Nazarbaev halqymyzdyń uly aqyndary Abaı men Jambyldyń 150 jyldyǵyn laıyqty atap ótý týraly sheshim qabyldap, mereıtoılarǵa erekshe mártebe men mańyz bergen shırek ǵasyr burynǵy tarıhı sátti eske saldy.

Bıyl Táýelsizdiktiń 30 jyldyǵy aıasynda jyr alyby Jambyl Jabaevtyń 175 jyldyǵy atap ótilýde. Memleket basshysy Q.Toqaevtyń Jarlyǵymen uly aqynnyń mereıtoıyn joǵary dárejede uıymdastyryp, mazmundyq deńgeıin qamtamasyz etý maqsatynda arnaıy memlekettik komıssııa quryldy. Bul Jambyldyń biregeı murasyn tereń uǵynýǵa, ony zamandastarymyz ben jastarǵa nasıhattaýǵa jáne aqyn shyǵarmalarynyń úlken suranysqa ıe bolýyna yqpal etedi.

A.Raıymqulova bolashaq urpaq úshin rýhanı qazynany saqtaýdyń jáne izgiliktiń san ǵasyrlyq ıdeıalaryn búkil álemge jetkizýdiń úlken jaýapkershiligi ultymyzǵa júktelgenin atap ótti. Onyń aıtýynsha, barlyq kúsh-jiger «Rýhanı jańǵyrý» jalpyulttyq baǵdarlamasyn odan ári iske asyrý, Uly dalanyń rýhanı murasyn tanymal etý jáne Táýelsizdigimizdiń qasıetti qundylyqtaryn nyǵaıtý jónindegi aýqymdy jumystarǵa baǵyttalatyn bolady.

Saltanatty is-shara Jambyldyń 175 jyldyǵyna arnalǵan merekelik kontsertpen jalǵasty. Q.Qýanyshbaev atyndaǵy Memlekettik akademııalyq qazaq mýzykalyq drama teatry men «Astana Opera» memlekettik opera jáne balet teatrynyń sımfonııalyq orkestriniń artısteri kórermenderge «Jyr alyby – Jambyl» atty teatrlandyrylǵan qoıylym usyndy. Uly aqynnyń baǵa jetpes murasyn, ózindik ereksheligi men darynyn ashyp kórsetetin ádebı-mýzykalyq kompozıtsııada onyń belgili aıtystary men áıgili «Keń baıtaq Qazaqstanym», «Aqyndarǵa arnaý», «Kúláshqa», «Lenıngradtyq órenim!» jáne t.b. shyǵarmalary qamtylǵan.

Merekelik baǵdarlamada Qurmanǵazy atyndaǵy Qazaq ulttyq halyq aspaptary orkestriniń, N.Tilendıev atyndaǵy «Otyrar sazy» Akademııalyq folklorlyq-etnografııalyq orkestriniń, «Jastar» teatrynyń, «Astana Balet» teatrynyń artısteri, «Qorqyt» etno-ansambliniń, «Qulansaz» folklorlyq-etnografııalyq ansambliniń, K.Ázirbaev atyndaǵy Jambyl oblystyq fılarmonııasynyń, «Akak» komýzshylar ansambliniń (Qyrǵyzstan) jeke oryndaýshylary óner kórsetti. Ataqty aqynnyń mereıtoıyna Qazaqstan halyqtary Assambleıasy etnomádenı birlestikteriniń artısteri, «Nomad» balalar horeografııalyq ansambli, «Vaınah» sheshen-ıngýsh halyq ansambli jáne t. b. óz shyǵarmalaryn arnady.

Búgin, 26 aqpan kúni elimizdegi jáne shet elderdegi qalalar men eldi mekenderde Jambyl Jabaevtyń eskertkishteri men bıýstterine gúl shoqtary qoıylyp, ártúrli mádenı is-sharalar ótkizildi.


Joǵary qaraı