Aýa raıy
Astana -10 °S
Almaty -5 °S
valıýta baǵamy
USD 421.58
EUR 496.83
RUB 5.53
CNY 62.20

Elordalyq ınternder statsıonardaǵy jumysy týraly aıtyp berdi

2020 jyldyń 26 shilde 2020 06:11

NUR-SULTAN. QazAqparat – Elordada bolashaq dárigerler aǵa býyn áriptesterimen birge koronavırýs ınfektsııasymen kúresýde, dep habarlaıdy QazAqparat qala ákimdigine silteme jasap.

«Astana» medıtsına ýnıversıtetiniń stýdentteri óz erikimen dárigerlerge kómekke keldi. Qazir olar elorda emhanalarynda naýqastar ómiri úshin kúresýde.

«Statsıonar ashylǵan sátten-aq munda jas mamandar keldi. Jumys barysynda olar bilimin, naýqaspen jumys isteý qabiletin tanytty. Dárigerler jetispeı jatqan shaqta bizge kómek qolyn sozdy. Áli jas maman, ıntern bolǵanyna qaramastan, qabiletti jastar orasan zor kómek kórsetti» – deıdi qalalyq juqpaly aýrýlar ortalyǵy mobıldi ortalyǵynyń G blogy bóliminiń basshysy Baǵlan Jarmaǵambetova.

«Astana» medıtsına ýnıversıtetiniń jetinshi kýrs stýdenti Rozmat Nýrıddın 22 naýryzdan bastap dárigerlerge kómek kórsetip keledi.

«Ramada Plaza» qonaq úıinde juqpaly aýrýlar bóliminde erikti ıntern retinde kómek kórsete bastadym. Ol jaqta naýqastardyń birazy emdelip shyqqan soń qalalyq juqpaly aýrýlar ortalyǵyna aýystyq. Qazirgi ýaqytta dárigerlermen birge alǵy shepte koronavırýs ınfektsııasymen kúresýdemiz. Dáriger retinde basty mindetimiz – adamdarǵa kómektesý. Azamattarymyzdy indetten aman saqtaý úshin qolymyzdan kelgenin jasaımyz. Jurtshylyqqa maska taǵyp, qoldy jıi óńdeý keregin, sanıtarlyq-epıdemıologııalyq normalardy, áleýmettik qashyqtyqty saqtaý qajetin taǵy bir eske salǵym keledi. Sondaı-aq ýaqytsha toı, týǵan kún toılaýdy doǵarǵan jón. Ár adam óz densaýlyǵyna jaýapkershilikpen qaraýy kerek», – deıdi ol.

«Astana» medıtsına ýnıversıtetiniń ekinshi kýrs stýdenti Tileýjan Hamıdın de maqsatymen bólisti.

«Epıdemııa kezinde, myńdaǵan adam koronavırýs ınfektsııasymen aýyryp, indetten kóz jumyp jatqan kezde shet qala almadym. Kózde ot, keýdede nurymyz bar jastar, aǵa býyn áriptesterimizge kómek qolyn sozýǵa keldik», – dedi bolashaq dáriger.

Shilde aıynyń basynan elordadaǵy medıtsına ýnıversıteti men kolledjiniń 536 túlegi COVID-19-ǵa qarsy kúreske tartyldy. Túlekter emhanalarǵa, aýrýhanalarǵa, statsıonarlar men jedel járdem stansalaryna bólindi.

25 shildedegi jaǵdaı boıynsha, Nur-Sultan qalasynda COVID-19-dyń 9 494 jaǵdaıy tirkeldi, 6607 adam emdelip shyqty.


Joǵary qaraı