Aýa raıy
Astana 11 °S
Almaty 12 °S
valıýta baǵamy
USD 421.58
EUR 496.83
RUB 5.53
CNY 62.20

Elordalyq ónerpaz kýbık rýbıkten Jaqsylyq Úshkempirovtiń portretin jasady

2020 jyldyń 9 tamyz 2020 18:07

NUR-SULTAN. QazAqparat – Astanalyq stýdent Tynysbek Bópishtaı shyǵarmashylyq ónerge bala kúninen jaqyn bolǵan. Túrli sharalarǵa qatysyp, dombyra tartýdan bólek, kýbık rýbık qurastyrýdy unatady. Búginde jas ónerpaz ony kásibı túrde qolǵa alyp, qolóner ıgiligine jaratýda. Osy oraıda QazAqparat tilshisi ónerpazben kýbık rýbıkten portret jasaýdyń qyr-syry týraly surastyrǵan edi.

«Men elordadaǵy L. Gýmılev atyndaǵy Eýrazııa ulttyq ýnıversıtetinde kóliktik tehnıkalar jáne tehnologııalar mamandyǵynyń 4 kýrs stýdentimin. Ózim Túrkistan oblysynyń týmasymyn. Jalpy ónerge, shyǵamashylyqqa bala kúnimnen jaqyn boldym. Mekteptiń ózinde túrli baıqaý, jarystarǵa qatysyp, bar ónerimdi ortaǵa salatynmyn. Onyń ishinde án aıtý, kórinisterge qatysý, dombyra tartý bar. Sonymen qatar kýbık rýbıkke degen qyzyǵýshylyǵym da sol kezde bastaldy. Oqýshy kúnimde kýbık rýbıkti tús-túsimen rettep jáne jyldam quraǵandy unatatynmyn. Ýaqyt óte kele bul súıikti isime aınaldy. Keıin adamdardyń portretin jasaý ıdeıasy keldi», - dedi T. Bópishtaı.





Jas ónerpaz kýbık rýbıkten alǵash ret súıikti qyzynyń portretin jasaǵan.

«Kýbık rýbıkten súıiktimniń portretin jasaý sátin vıdeoǵa túsirip, ony áleýmettik jelige salǵanmyn. Sodan kóptegen adamdar vıdeoǵa qatysty pikir bildirip, «laık» basyp, áleýmettik jelide keń taraldy. Bul men úshin kútpegen jaǵdaı boldy jáne meni shabyttandyra tústi. Búginde 3 portrettik jumysym bar. Aldaǵy ýaqytta elimizge jáne álemge tanymal tulǵalardyń portretin jasaýǵa bel býdym. Sonyń alǵashqysy jýyrda ǵana dúnıe salǵan dańqty sportshy aǵamyz Jaqsylyq Úshkempirovtiń portretin jasap shyǵardym», - deıdi ol.

Sondaı-aq, qolóner sheberi aldaǵy ýaqytta uly Abaıdyń beınesin jasaý josparynda baryn aıtyp ótti.

«Jalpy bir portretti jasaýǵa shamamen 600 kýbık rýbık qajet jáne jumys 4-5 saǵatty talap etedi. Áleýmettik jelide jumys barysy 1 mınýttyq vıdeo arqyly kórsetilgenimen onyń artynda 4-5 saǵattyq eńbek jatyr. Aldaǵy ýaqytta portret jasaýǵa jumsalatyn ýaqyt jyldamdyǵyn arttyrý maqsatym da bar», - dedi jas ónerpaz.

Odan bólek, portret avtory qyzyǵýshylyq tanytylsa, shyǵarmashylyq baıqaýlarǵa qatysýǵa da nıeti baryn bildirdi.

«Eń aldymen bul meniń súıikti isim, ıaǵnı men ózim úshin jasaımyn. Meniń shyǵarmashylyq jumysyma qyzyǵýshylyq tanytýshylardyń bary qýantady, sol úshin de tájirıbemdi odan ári jalǵastyratyn bolamyn. Sol sııaqty qolóner shyǵarmashylyǵyna arnalǵan baıqaýlarǵa qatysyp, baǵymdy synap kórýge daıynmyn», - dedi ol.


Avtor Álı Ibraev
Basty sózder: Mádenıet, Nur-Sultan,
Joǵary qaraı