Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Erbol Qarashókeev: Aýyl sharýashylyǵy maqsatyndaǵy jerge membaqylaýdy kúsheıtý – basty mindettiń biri

2021 jyldyń 17 qyrkúıek 2021 20:32

NUR-SULTAN. QazAqparat – Búgin QR Aýyl sharýashylyǵy mınıstri Erbol Qarashókeev «Azamattarǵa arnalǵan úkimet» memlekettik korporatsııasy júzege asyratyn Qazaqstan Respýblıkasynyń Memlekettik jer kadastryn júrgizý qyzmetimen tanysty. Bul týraly QazAqparat atalmysh vedomostvonyń baspasóz qyzmetine silteme jasap habarlaıdy.

Mınıstrge búgingi tańda topyraq, geobotanıkalyq zertteý, topyraq bonıtetin anyqtaý boıynsha jumystar júrgizilip jatqany baıandaldy.

Alynǵan topyraqty zertteý materıaldaryn salystyrmaly taldaý elde topyraq qunarlylyǵynyń tómendeýi men jaıylymdyq jerlerdiń tozý úrdisi kúsheıip kele jatqanyn kórsetedi.

Negizgi sebep – jer paıdalanýshylardyń jer zańnamasynyń negizgi talaptaryn saqtamaýy. Eger mundaı úrdis jalǵasa berse, 2040 jylǵa qaraı dándi daqyldardyń ónimdiligi shamamen 15%-ǵa tómendeýi múmkin, dep boljam jasady korporatsııadaǵylar.

«Aqparattyq júıelerdi shoǵyrlandyrý arqyly «Jyljymaıtyn múliktiń biryńǵaı memlekettik kadastry» aqparattyq júıesin (MJK AAJ, JMT MDQ) qurý jáne engizý» jobasy aıasynda Biryńǵaı memlekettik jyljymaıtyn múlik kadastryn ázirleýdiń tehnıkalyq bóligi aıaqtalǵany baıandaldy. Bul jobany engizý jer qory jáne jyljymaıtyn múlik obektileri týraly aqparattyń ashyqtyǵyn jáne halyqqa qoljetimdiligin qamtamasyz etýge múmkindik beredi.

Korporatsııa qyzmetiniń nátıjelerimen tanysqan Aýyl sharýashylyǵy mınıstri topyraq qunarynyń nasharlaýy eń aldymen jer paıdalanýda oryn alǵan júıeli problemalarǵa baılanysty ekenin atap ótti.

«Atap aıtqanda, zamanaýı tsıfrlyq tehnologııalarǵa negizdelgen, jerdi paıdalaný protsesterine, jalǵa alýshylardyń jer zańnamasynyń talaptaryn qalaı oryndaıtynyna naqty baqylaý júrgizetin memlekettiń naqty quraly áli joq.

Ekinshi jaǵynan jalǵa alýshynyń Jer kodeksinde qarastyrylǵan mindettemeleri jaldaý sharttarynda kórsetilmegen. Osyndaı tehnıkalyq kemshilikter de bar. Bul jaýapsyz jer paıdalanýshylarmen jaldaý shartyn buzý úshin dálelderdi jyldam jınaýdy qıyndatady.

Bul tek egistik jerlerge ǵana emes, jaıylymdyq jerlerge de qatysty. Sondyqtan búgingi tańda bizdiń aldymyzda osy júıelik problemany qysqa merzimde sheshý mindeti tur.

Osyǵan baılanysty, qazirgi ýaqytta Mınıstrlik egis aınalymdarynyń saqtalýyna naqty baqylaý júrgizý, jaıylymdardyń tozý dárejesin anyqtaý úshin ǵaryshtyq monıtorıngti jáne Jerdi qashyqtan zondtaýdy paıdalana otyryp, egistikterdegi ósimdikterdiń túrin aıqyndaýdyń zamanaýı ádistemesin ázirleý máselelerin pysyqtaýda.

Ekinshi jaǵynan, jer paıdalanýshynyń árbir jer ýchaskesi boıynsha topyraqtyń jaı-kúıi týraly turaqty negizde naqty aqparat bolýy úshin respýblıkalyq Agrohımııalyq qyzmettiń múmkindigin zamanaýı ádistemege kóshirý josparlanýda.

Osy máselelerdi sheshý arqyly ǵana biz jerdi paıdalaný protsesterine naqty baqylaý jasap, basty baılyǵymyz jerdi baqylaýsyz jáne óreskel zańbuzýshylyqpen paıdalanatyndardy toqtata alamyz. Bul bizdiń vedomstvonyń eń ózekti mindetteriniń biri», - dedi mınıstr.


Joǵary qaraı