Aýa raıy
Astana -15 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

Erbolat Dosaev munaıǵa suranys jóninde pikir bildirdi

2020 jyldyń 19 qarasha 2020 11:15

NUR-SULTAN. QazAqparat – QR Ulttyq bankiniń tóraǵasy Erbolat Dosaev koronavırýs indetiniń álemdik ekonomıkaǵa áseri jaıynda aıtyp berdi, dep habarlaıdy QazAqparat tilshisi.

«2021 jyldyń ortasyna deıin pandemııany tejeý shekteýlerdi saqtap, qajet bolǵan kezde olardy kúsheıtý kerek bolady. Bul álemdik ekonomıkanyń qalpyna kelýin edáýir toqtata turýy múmkin. Ekinshiden, álemdik taýar naryqtary, ásirese munaı naryǵy qubylyp tur. Eýropanyń birqatar iri elinde jańa lokdaýndar engizý munaıǵa suranystyń qalpyna kelý qarqynyna yqpal etedi, onyń nátıjesinde munaı óndirý qaıtadan suranystan asyp ketýi múmkin», - dedi E. Dosaev Senattyń jalpy otyrysynda.

Onyń aıtýynsha, munaı baǵasynyń qarqyny kóp jaǵdaıda bıylǵy 30 qarasha - 1 jeltoqsanda ótetin OPEK+-tiń mınıstrlik kezdesýiniń qorytyndysyna baılanysty bolady, onda 2021 jyly munaı óndirý kvotalary týraly sheshim qabyldanady.

«Úshinshiden, álem ekonomıkasynyń qalpyna kelýi saýda shekteýlerin alýǵa jáne jetkizý tizbegin qalpyna keltirýge baılanysty bolady. Azııa-Tynyq muhıt óńirinde Qytaı men úlesine álemdik ekonomıkanyń 29 paıyzy tıesili 14 eldiń arasynda álemdegi eń iri erkin saýda aımaǵyn qurý oń belgi boldy. Jańa kelisim álemdik ekonomıkanyń qalpyna kelý qarqynyna oń áser etýi múmkin», - dedi UB basshysy.

Onyń sózine qaraǵanda, osy jaǵdaılarda álemdik ekonomıkanyń qalpyna kelýi 2021 jyldan bastalady, birinshi bolyp daǵdarystan damyǵan elder shyǵa bastaıdy. Halyqaralyq valıýta qorynyń (HVQ) boljamy boıynsha tómen bazanyń aıasynda álemdik ekonomıkanyń ósýi 2021 jyly 5,2 paıyzǵa jetip, orta merzimdi perspektıvada 3,5 paıyzǵa deıin birtindep baıaýlaıdy.


Joǵary qaraı