Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Erbolat Dosaev Prezıdentke Ulttyq qor aktıvteriniń jaı-kúıi týraly aıtty

2021 jyldyń 8 qazan 2021 16:23

NUR-SULTAN. QazAqparat - Qazaqstan Prezıdenti Qasym-Jomart Toqaev Ulttyq bank tóraǵasy Erbolat Dosaevty qabyldady, dep habarlaıdy Aqorda.

Memleket basshysy Ulttyq bank tóraǵasynyń bıylǵy 9 aı ishindegi aqsha-nesıe saıasatyn júzege asyrýdyń aldyn ala qorytyndylary týraly, álemdik ekonomıkany qaıta qalpyna keltirýdiń qarqyny jáne ony pandemııaǵa deıingi deńgeıge jetkizý, sondaı-aq damyǵan elderdegi ortalyq bankterdiń aqsha-nesıe saıasatyn kúsheıtýge kóshe bastaǵany jóninde esep berdi.

Erbolat Dosaev Prezıdentke qyrkúıek aıynda jyldyq ınflıatsııanyń 8,9 paıyzǵa deıin qarqyn alǵany jaıynda baıandady. Aılyq ınflıatsııanyń artýyna aqyly qyzmetter, sonyń ishinde, eń aldymen bilim berý jáne turǵyn úılerdi jalǵa alý salalary úlken úles qosty.

Qasym-Jomart Toqaevqa Ulttyq banktiń Úkimetpen birlesip júzege asyryp jatqan ınflıatsııaǵa qarsy keshendi sharalary jáne ınflıatsııany boldyrmaý jónindegi monetarlyq saıasattyń negizgi baǵyttary týraly málimet berildi. Áleýmettik mańyzy bar azyq-túlik taýarlaryna qatysty baǵa bıylǵy tamyz aıyndaǵy 10,4 paıyzdan qyrkúıekte 9,6 paıyzǵa deıin tómendegeni atap ótildi.

Ulttyq bank tóraǵasynyń málimeti boıynsha shıkizat taýarlary baǵasynyń qymbattyǵyna, tutynýshylar tarapynan týyndaǵan shekteýlerge baılanysty álemdegi tutyný baǵalary eń joǵary deńgeıde saqtalyp otyr. Kezdesý barysynda jyl sońyna deıin jáne 2022 jylǵa arnalǵan energııa tasymaldaýshylar baǵasyna qatysty boljamdar usynyldy.

Prezıdentke Ulttyq banktiń altyn-valıýta rezervteri men Ulttyq qor aktıvteriniń jaı-kúıi, sondaı-aq valıýta naryǵyndaǵy ahýal jóninde baıandaldy.

Sonymen qatar Memleket basshysynyń tapsyrmalaryn oryndaý aıasynda Ulttyq tólem júıesin damytýdyń jáne tsıfrlyq bıometrııalyq sáıkestendirýdiń ulttyq platformasyn qurýdyń aldyn ala nátıjeleri týraly málimet berildi.




Joǵary qaraı