Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Fýtbol: «Aqjaıyq» óz alańynda «Ordabasyǵa» ese jiberdi

2021 jyldyń 12 maýsym 2021 23:31

ORAL. QazAqparat – Fýtboldan Qazaqstan chempıonatynyń 15-týrynda Oraldyń «Aqjaıyǵy» óz alańynda Shymkenttiń «Ordabasy» komandasyn qabyldady, dep habarlaıdy QazAqparat tilshisi.

Oraldyqtar osyǵan deıin qatarynan eki matchta jeńilis taýyp, jaǵdaıyn qıyndatyp alǵan edi.

Shymkenttikter de sońǵy jeti týrda jeńis dámin tatpaǵandyqtan, qos komandaǵa da úsh upaı aýadaı qajet bolatyn.




Birinshi taımda «Aqjaıyq» sapyndaǵy ýkraınalyq shabýylshy Nıkolaı Kovtalıýk eki márte urymtal sátti múlt jiberdi. Oıyn sońyna taman onyń ornyna shyqqan reseılik Dmıtrıı Mıchýrenkov ta túk bitire alǵan joq. Esesine 92-mınýtta «Ordabasynyń» surmergeni, brazılııalyq Joao Paýlonyń alystan tepken doby «Aqjaıyqtyń» qaqpasynan bir shyqty.








Osylaısha sońǵy bes kezdesýde teń oınaǵan qonaqtar 1:0 esebimen jeńiske jetti.

Birinshi aınalymda da Shymkentte alań ıeleri utylyp jatyp, qosymsha mınýttarda eki gol soǵyp, oraldyqtardy qapy qaldyrǵan edi.

Týrnır kestesinde altynshy orynǵa syrǵyǵan «Aqjaıyq» sońǵy úsh matchta qarsylastar qaqpasynyń kiltin taba almaı keledi. Bul shabýyl shebinde urymtal sátte match taǵdyryn sheship ketetin Joao Paýlodaı sheber fýtbolshynyń joqtyǵyn kórsetedi.

Ýkraınalyq maman Vladımır Mazıardyń shákirtteri kelesi oıynyn 18 maýsym kúni Petropavlda jergilikti «Qyzyljarmen» ótkizedi.





FOTO: Aıbatyr Nurash
Avtor Eljan Eraly
Basty sózder: Qoǵam, Sport,
Joǵary qaraı