Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Fýtboldan Eýropa chempıonaty: Krıshtıaný Ronaldý Portýgalııaǵa jeńis alyp keldi

2021 jyldyń 16 maýsym 2021 00:02

NUR-SULTAN. QazAqparat - Fýtboldan Eýropa chempıonatynyń fınaldyq satysyndaǵy toptyq kezeńde Vengrııa jáne Portýgalııa quramalary kezdesti, dep habarlaıdy QazAqparat tilshisi.

Atalǵan eki qurama F tobynda synǵa túsedi. Qarsylastary – Frantsııa jáne Germanııa quramalary.

Eki qurama buǵan deıin 14 márte kezdesken. Onyń 10-ynda portýgalııalyqtar jeńiske jetse, 4-de teń nátıje tirkeldi.

Atalǵan oıyn Vengrııa astanasy Býdapesht qalasyndaǵy «Pýshkash arena» stadıonynda ótti. Soǵan qaramastan Portýgalııanyń basymdyǵy ańǵarylyp turdy.

Kezdesý barysynda portýgalııalyq fýtbolshylar qarsylastar qaqpasy mańynda jıi boı kórsetti. Dese de, goldardy oıyn sońyna taman soqty. Aldymen, 84-mınýtta Rafael Gerreırý esep ashty. Al Krıshtıaný Ronaldý 87-mınýtta penaltıden múlt ketpese, 90-mınýtta óziniń ekinshi golynyń avtory atandy.

Osylaısha, Portýgalııa qarsylasynan 3:0 esebimen basym tústi.

Búgin atalǵan topta Germanııa men Frantsııa quramalary sheberlik baıqasady. Oıyn elorda ýaqytymen 00.50-de bastalyp, «Qazaqstan» telearnasynan tikeleı efırde kórsetiledi.

Endi F tobyndaǵy kelesi týr 19 maýsym kúni bolady. Bul kúni Portýgalııa men Germanııa, Vengrııa men Frantsııa quramalary kezdesedi.

Bıylǵy birinshilikte barlyǵy 24 qurama synǵa túsedi. Árbir toptan úzdik eki komanda men kórsetkishi joǵary tórt qurama jarysty jalǵastyrýǵa múmkindik alady. Fýtboldan Eýropa chempıonaty 11 maýsymda bastaldy, ol 11 shildede máresine jetedi.


Avtor Ádiljan Úmbet
Basty sózder: Sport, Qoǵam,
Joǵary qaraı