Aýa raıy
Astana -18 °S
Almaty -6 °S
valıýta baǵamy
USD 421.58
EUR 496.83
RUB 5.53
CNY 62.20

«Gremmı» syılyǵyna úmitker pavlodarlyq Imanbekpen oblys ákimi kezdesti

2020 jyldyń 27 qarasha 2020 20:13

PAVLODAR. QazAqparat – Pavlodar oblysynyń ákimi Ábilqaıyr Sqaqov «Gremmı» syılyǵyna úmitker mýzykant Imanbek Zeıkenovpen kezdesti, dep habarlaıdy QazAqparat.

Pavlodar oblysy ákimdiginen málim etkendeı, Á.Sqaqov pavlodarlyq mýzykantqa qajetti qoldaý kórsetýge ýáde berip, oǵan jankúıer bolatynyn aıtty.

Óz kezeginde Imanbek Remix laqap atymen tanymal Imanbek Zeıkenov óńir basshysyna qazir de týǵan Aqsý qalasynda ata-anasymen birge turyp jatqanyn jetkizdi. Bıyl ol Toraıǵyrov ýnıversıtetine oqýǵa tústi, biraq qazir qashyqtan oqyp jatyr.

Aıta ketsek, «Gremmı» syılyǵynyń jeńimpazdaryn jarııalaý 2021 jyldyń 31 qańtarynda ótedi. Al 20 jastaǵy mýzykantymyz tanymal álemdik ártistermen birlesip, ortaq joba daıyndap jatyr.

«Bárimiz sen úshin jankúıer bolamyz. Sen bizdiń óńirdiń ǵana emes, búkil Qazaqstannyń naǵyz maqtanyshysyń. Qajet bolǵan jaǵdaıda, bizdiń tarapymyzdan kez kelgen kómek kórsetiletinine senimdi bol», - dedi Ábilqaıyr Sqaqov.

Mýzykant ákimge alǵysyn bildirdi.

Sondaı-aq onyń aıtýynsha, tanymal bolyp ketken «Roses» remıksin jasaý úshin bar bolǵany 2 saǵat 20 mınýt ýaqyty ketken.

«Buryn mýzyka salasynda bárin baılanys pen aqsha sheshedi dep oılaıtynmyn. Biraq ózime qarap, bulaı emes ekenine kózim jetti. Shyn máninde basynda meniń jolym bolyp ketti deýge bolady. Keıin menimen áriptestik ornatqan leıbl jigitterimen kóp jumystar atqardyq. Mýzykany jazý barysynda adamdar oǵan qalaı bıleıtinin, áýen qandaı emotsııalar týdyratynyn elestetemin», - dep bólisti Imanbek.

Óńir basshysy Imanbekke árdaıym jetistikke senýdi jáne óz betinshe bıikterge qol jetkizgen qarapaıym jigit bolyp qalýdy tiledi. Ábilqaıyr Sqaqov mýzykantqa óziniń telefon nómirin berip, qajet bolǵan jaǵdaıda qońyraý shalýdy usyndy.

Imanbek Zeıkenov - aqsýlyq dıdjeı jáne mýzykalyq prodıýser. Oǵan Saint jhn «Roses» ánine jazǵan remıks úlken tanymaldyq ákeldi. Bul trek «Úzdik remıks» nomınatsııasynda 2020 jylǵy Gremmı syılyǵyna usynyldy.



Joǵary qaraı