Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Internette aqshasyn eselegisi kelgen petropavldyq 3 mln teńgesinen aıyryldy

2021 jyldyń 29 jeltoqsan 2021 14:41

PETROPAVL. QazAqparat – Petropavl turǵyny áleýmettik jelide alaıaqtardyń arbaýyna túsip, 3 mln-ǵa jýyq teńgesinen aıyryldy. Jyldam paıda kórmek bolǵan er adam endi qaryzǵa belshesinen batqan, dep habarlaıdy QazAqparat tilshisi.

Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavl turǵyny áleýmettik jelilerdiń birinde aqshany tez eseleýdi usynǵan paraqshanyń jarnamasyn kórip qalady.

Ol usynylǵan silteme boıynsha saıtta tirkelgen. Kóp keshikpeı brokerlik saıttyń ókilderimiz degen bireýler WhatsApp messendjeri arqyly baılanysqa shyqqan.

Alaıaqtardyń nusqaýlary boıynsha er adam 65 myń teńge ınvestıtsııa salǵan. Birazdan soń saıtqa aqshasynyń eselengeni jóninde habarlama keledi.

Muny kórgen er adam tabysyn tekserip, eki bankten mıllıon teńgeden nesıe, tanysynan 850 myń teńge qaryz alyp, barlyq qarjysyn «ınvestıtsııaǵa» salady.

Keıin «menedjerler» baılanysqa shyqpaı qoıǵan. Er adam saıttaǵy shottan qarajatyn qaıtara almaǵan.

3 mıllıonǵa jýyq aqshasyn alaıaqtarǵa bergenin túsingen ol, polıtsııaǵa júgindi.

«Oblysta jyl basynan «aqsha eseleýmen» baılanysty ınternet-alaıaqtyqtyń 17 faktisi tirkeldi. Keıde kúmándi usynystardan mol tabys tabýǵa jábirlenýshilerdi tanystary tartady, keı jaǵdaıda alaıaqtar brokerlik saıttardyń kóshirmelerine senip qalady. Qýlyqtyń bul túri barlyq elderde kezdesedi. Sondyqtan ınternette saq bolýǵa, ońaı oljaǵa senbeýge, kúmándi siltemeler boıynsha ótpeýge keńes beremiz», - deıdi SQO PD krımınaldyq polıtsııa basqarmasynyń bastyǵy Marat Jumalıev.


Joǵary qaraı