Aýa raıy
Astana -9 °S
Almaty -12 °S
valıýta baǵamy
USD 421.58
EUR 496.83
RUB 5.53
CNY 62.20

Junior Eurovision 2020 baıqaýynda Qaraqat Bashanova ekinshi oryn aldy

2020 jyldyń 29 qarasha 2020 23:53

NUR-SULTAN. QazAqparat – Junior Eurovision XVIII án baıqaýynda Qazaqstan namysyn qorǵaǵan Qaraqat Bashanova ekinshi oryn aldy. Ol osy baıqaýda «Forever» ánin shyrqaǵan edi, dep habarlaıdy QazAqparat tilshisi.

Frantsııanyń atynan qatysqan Valentınaǵa birinshi oryn buıyrsa, úshinshi oryndy ıspanııalyq Solea ıelendi. 2020 jylǵy Junior Eurovision baıqaýyna Belarýs, Frantsııa, Grýzııa, Qazaqstan, Malta, Nıderlandy, Reseı, Serbııa, Ispanııa, Ýkraına, Polsha jáne Germanııa elderiniń ókilderi qatysty.

Pandemııaǵa baılanysty tikeleı efır kezinde shoý júrgizýshileri Polshada boldy. Eýropalyq habar taratý odaǵy (EVS) bıyl jyl saıynǵy «Junior Eurovision 2020» halyqaralyq án baıqaýynyń fınaly jańa formatta usynylatynyn jarııalady.

Bul sheshimniń basty sebebi - COVID-19 pandemııasy. Barlyq fınalısterdiń densaýlyǵyn saqtaý maqsatynda baıqaýda oryndalýǵa tıisti ánder saıysqa qatysýshy eldiń jergilikti stýdııasynda oryndaldy.

Aıta keteıik, eresekter arasynda ótetin «Evrovıdenıeniń» taǵy bir aıyrmashylyǵy, Junior Eurovision án baıqaýyna qatysýshy elderge óz ókilderin qoldaýǵa ruqsat etiledi.

18-shi Junior Eurovision án baıqaýynyń jeńimpazy qazylar alqasynyń daýys berýi jáne onlaın-daýys berý arqyly anyqtaldy. Daýys berý júıesi dástúrli negizde: 50% qazylar alqasynyń sheshimi jáne 50% onlaın daýys berý nátıjesine baılanysty.

Onlaın daýys berý junioreurovision.tv saıtynda 2 kezeńde ótedi. Daýys berýdiń birinshi kezeńi 28 qarasha kúni saǵat 01:00-de ashyldy jáne 29 qarasha kúni konkýrs fınalynyń tikeleı kórsetilimi bastalǵanǵa deıin jalǵasty. Daýys berýdiń ekinshi kezeńi barlyq qatysýshylardyń mýzykalyq qoıylymynan keıin bastalyp, 15 mınýtqa sozyldy.


Qazaqstan Junior Eurovision án baıqaýyna alǵash ret 2018 jyly qatysty. Onda Danelııa Tóleshova «Ózińe sen» ánimen altynshy orynǵa ıe boldy. 2019 jyly Erjan Maksım «Armanyńnan qalma» ánimen ekinshi oryndy (qazylar alqasynyń sheshimi boıynsha birinshi) ıelendi. Qazaqstannyń bul halyqaralyq baıqaýǵa úshinshi ret qatysýy «Habar» Agenttiginiń Eýropalyq habar taratý odaǵynyń (EBU) qaýymdasqan múshesi bolýynyń arqasynda múmkin boldy.

Eske sala keteıik, 26 qyrkúıekte ótken ulttyq irikteý fınalyna elimizdiń túkpir-túkpirinen kelgen on eki bala qatysqan edi. Olardyń arasynda Almaty oblysy Rysqulov aýylynan kelgen Qaraqat Bashanova jeńiske jetti.


Avtor Rýslan Ǵabbasov
Basty sózder: Mádenıet, Óner,
Joǵary qaraı