Aýa raıy
Astana 9 °S
Almaty 2 °S
valıýta baǵamy
USD 421.58
EUR 496.83
RUB 5.53
CNY 62.20

Qapshaǵaıda gıdrotsıklden qulaǵan er adam sýǵa ketti

2020 jyldyń 26 shilde 2020 00:16

QAPShAǴAI. QazAqparat – Qapshaǵaı sý qoımasynda qaýipsizdik keýdeshesi joq 40 jastaǵy er adam gıdrotsıklmen qatty burylmaq bolyp, qulap túsip sýǵa ketken, dep habarlaıdy QazAqparat QR IIDM Kólik komıtetiniń baspasóz qyzmetine silteme jasap.

«24 shildede Qapshaǵaı sý qoımasynyń soltústik jaǵalaýynda ornalasqan jaǵajaıda qaýipsizdik-qutqarý keýdeshesi joq kúıde 1980 jylǵy B. esimdi QR azamaty tirkeýde joq gıdrotsıklmen sý aıdynyna shyǵyp, sý betinde manevr jasaı bastaǵan. Kezekti burylysta sýǵa qulap batyp ketken. Qazir Almaty oblysy boıynsha TJD qyzmetkerleri onyń denesin izdestirip jatyr», delingen habarlamada.

Kólik komıteti sý aıdyndarynda shaǵyn kólemdi kemeni qaýipsiz paıdalaný normasyn saqtaý qajettiligin eskertedi.

Mekemeniń málimetinshe, shaǵyn kólemdi júzý quraldaryn mynandaı jaǵdaıda paıdalanýǵa tyıym salynady:

- qutqarý keýdeshesin kıip, ne alyp shyqpaı;

- shaǵyn kólemdi kemeni basqarý kýáliginsiz;

- jolaýshylar syıymdylyǵy normasyn saqtamaǵanda;

- tehnıkalyq aqaý bolǵan jaǵdaıda jáne t. b.

Joǵaryda kórsetilgen qaýipsizdik normalaryn buzbaǵanda sý kóligindegi oqıǵalardyń aldyn alyp, adamdardyń ómirin saqtap qalýy múmkin.

Aıta ketsek, flotta apatty boldyrmaý jáne sýda adamdardyń ómirin saqtaý maqsatynda Kólik komıtetiniń aýmaqtyq bólimsheleri 1 maýsymynan bastap elimizdiń barlyq sý aıdyndarynda «Skýter» aktsııasyn bastady.

«Búgingi kúni kólikti baqylaý organdarynyń qyzmetkerleri 1 205 shaǵyn kólemdi kemeni tekserip, nátıjesinde 244 kemshilikti anyqtady, jalpy somasy 1 mln 518 myń teńgege aıyppul salynyp, 30 kemeniń paıdalanýyna tyıym salyndy», delingen habarlamada.

Kólik komıtetiniń baspasóz qyzmeti, sý aıdynynda kemelerdi qaýipsiz paıdalaný talaby buzylǵanyn kórgen jaǵdaıdy osy týraly táýlik boıy jumys isteıtin Kólik komıtetiniń Ahýaldyq ortalyǵynyń nómirine habarlaýdy suraıdy. Foto jáne beıne materıaldardy Whats App messendjeri arqyly 8 708 088 08 00-ge jiberýge bolady.

Eske sala ketsek, Qapshaǵaıdaǵy demalys oryndarynyń jumysy 2 tamyzǵa deıin toqtatyldy.



Joǵary qaraı