Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qaraǵandy oblysynda 6 kóshpeli medıtsınalyq keshen jumys isteıdi

2021 jyldyń 22 qyrkúıek 2021 01:26

QARAǴANDY. QazAqparat – Qaraǵandy oblysynda alty kóshpeli medıtsınalyq keshen jumys isteıdi. Keshen arqasynda shalǵaı aýyl turǵyndary medıtsınalyq tekserýden ótip, ártúrli sala mamandary keńes beredi, dep habarlaıdy QazAqparat tilshisi.

Kóshpeli medıtsınalyq keshender Jezqazǵan kópsalaly aýrýhanasynyń, Abaı, Osakarov jáne Qarqaraly aýdandarynyń ortalyq aýdandyq aýrýhanasy, Temirtaý jáne Qaraǵandy qalasynyń №4 jáne №5 emhanasynyń menshiginde. Árbir medıtsınalyq uıymnyń óz qyzmet kórsetý aýmaǵy bar.

Mysaly, №5 emhananyń dárigerleri keshenmen Buqar jyraý aýdanynyń eldi mekenderine barady. Jazda ol akýsher-gınekolog, oftalmolog, pedıatr, stomatolog, terapevt, hırýrgterdi alyp júredi. Osynyń arqasynda 13,5 myń adam qant dıabetin, arterııa gıpertenzııasyn, glaýkomany jáne basqa da aýrýlardy erte anyqtaý úshin tekserýden ótti.

«Kóshpeli keshen shalǵaıdaǵy eldi mekenderdiń turǵyndaryna aýdan ortalyǵyna nemese qalaǵa barýǵa týra keletin medıtsınalyq tekserýden ótýge jáne konsýltatsııa alýǵa múmkindik beredi. Biz aýyl turǵyndaryn kóshpeli medıtsına kesheni kelgeni týraly aldyn ala habardar etýge tyrysamyz», – dedi Qaraǵandy qalasynyń №5 emhanasynyń dırektory Maral Baıazıtova.

Ár keshen birneshe mamandandyrylǵan kabınetten turady, onda sala mamandary qabyldaý júrgizedi. Synama alý aımaǵy jáne fýnktsıonaldyq dıagnostıka kabıneti, sondaı-aq rentgen jáne flıýorografııaǵa arnalǵan bólme bar.

Medıtsınalyq saqtandyrý qory bıyl KMK qyzmetterine 503,5 mln teńge bóldi. Qarajat TMKKK jáne MÁMS sheńberinde jasalǵan konsýltatsııa men synamalardy tóleýge jumsalady.

«Kóshpeli medıtsınalyq keshenniń qyzmeti tegin medıtsınalyq kómektiń kepildik berilgen kólemi sheńberinde de, MÁMS paketi sheńberinde de kórsetiledi. Basqasha aıtqanda, shalǵaı eldi mekenderdiń turǵyndary medıtsınalyq saqtandyrý júıesindegi mártebesine qaramastan, KMK-de konsýltatsııa alyp, tekseriledi», – dep atap ótti medıtsınalyq saqtandyrý qorynyń Qaraǵandy fılıalynyń dırektory Fazyl Qopabaev.

Joǵary qaraı