Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qaraǵandy oblysynda aýyldyq joldar jóndelip jatyr

2021 jyldyń 21 qyrkúıek 2021 14:16

QARAǴANDY. QazAqparat – Qaraǵandy oblysy Nura aýdanynda joldardy jóndeý jumystary júrip jatyr, dep habarlaıdy QazAqparat tilshisi.

Nura – Shahterskoe – Prjevalskoe tas jolynyń eń problemaly ýchaskeleri eki jyl ishinde jóndeledi. Joldyń jalpy uzyndyǵy shamamen 50 shaqyrym. Budan basqa, aýdannyń eldi mekenderinde «Aýyl – El besigi» baǵdarlamasy boıynsha aýylishilik joldar da retke keltirilýde.

Qaraǵandy oblysynyń ákimi Jeńis Qasymbek qurylys jumystarynyń barysyn tekserdi, sondaı-aq Nura aýdanyna jumys sapary kezinde sharýa qojalyqtarynyń basshylarymen kezdesti.

«Bıyl Nura – Shahterskoe – Prjevalskoe avtojoly jóndeý jumystarymen qamtyldy. Trassanyń 24 shaqyrymynda Prjevalskııden Shahterskıı baǵytyna ortasha jóndeý qarastyrylǵan. 10 shaqyrymdyq jumystar aıaqtaldy, qalǵan bóligi kelesi jyly aıaqtalady. Shahterskıı aýylynan Qaroı aýyly baǵytynda alǵashqy 10 shaqyrym jol jóndelýde. Kelesi jyly tolyq aıaqtaý kózdelgen», – dedi Jolaýshylar kóligi jáne avtomobıl joldary basqarmasynyń basshysy Saıat Shaımın.

Jeńis Qasymbek aýyl joldaryn qalaı retke keltirgenin qarap shyqty.

Qaroı aýylynda «Aýyl – El besigi» baǵdarlamasy boıynsha uzyndyǵy 3,29 shaqyrym bolatyn tórt kóshege asfalt tóseldi.

Muzbel, Kertindi jáne Jaraspaı aýyldarynyń joldary da jóndeldi. Qazir jol jıekterin nyǵaıtý jumystary júrip jatyr. Bıyl Shubarkól jáne Nura kentteriniń joldarynda da jóndeý jumystary júrgizildi.

Oblys ákimine egin jınaý naýqany men jem-shóp daıyndaý barysy týraly da baıandaldy. Nura aýdanynda shóp qory 100% quryldy. Sonymen qatar, 740 tonna pishendeme daıyndaldy. Shóp baǵasynyń ósýine jol bermeý úshin iri fermerlermen memorandýmdar jasaldy. Alqaptardy orý aıaqtalýǵa taıaý. «Bıyl egin jınaýdy erte bastadyq. Ortasha eseppen 10 ts/ga aldyq, bul qaraǵandylyq suryptardyń arqasynda qýańshylyqqa tózimdi bolyp shyqty», – dedi «Shahterskoe» JShS dırektory Georgıı Prokop.

Aýdannyń áleýmettik damýyna keletin bolsaq, «Shahterskoe» JShS aýyl turǵyndary úshin jaıly orta qurý úshin qoldan kelgenniń barlyǵyn jasaýda.

Kompanııa óz qarajaty esebinen bıylǵy jyly Shahterskıı aýylyndaǵy ortalyq saıabaqty qaıta jańǵyrtýdy aıaqtaıdy, sondaı-aq kompanııa óziniń bolashaq qyzmetkerlerin turǵyn úımen qamtamasyz etýdi josparlap otyr.

«Biz óndirisimizdi keńeıtýdi josparlap otyrmyz. Jastardy jumysqa tartý úshin barlyq qolaıly jaǵdaı jasalǵan jańa shaǵyn aýdan salýdy bastaımyz. Bul zamanaýı úıler bolady. Birinshi kezeńde 30–40 otbasyn baspanamen qamtamasyz

etemiz, bolashaqta 70–80 páterge jetedi. Biz qurylysty 2023–2024 jyldary bastaımyz», – dedi Georgıı Prokop.

Sapar sońynda oblys ákimi Nura aýdanynyń ekonomıkasy damyp kele jatqanyn, áleýmettik máseleler de sheshilip jatqanyn atap ótti.


Joǵary qaraı