Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qaraǵandy oblysynda ıesiz qalǵan úıler qalpyna keltirilýde

2021 jyldyń 14 qazan 2021 10:42

QARAǴANDY. QazAqparat – Qaraǵandy oblysy Buqar Jyraý aýdanynyń Doskeı aýyly qaıta jandanýda. Munda 90-shy jyldardyń basynda bos qalǵan toǵyz kópqabatty úı qalpyna keltirildi. Eki jyl ishinde barlyǵy qaıta jańǵyrtylady, al bul 508 páter. Sonymen qatar bul úılerdiń janyndaǵy aýmaq abattandyrylady, dep habarlaıdy QazAqparat tilshisi.

Ásirese, aýylda bolyp jatqan ózgeristerge balalar qýanýda. Qalpyna keltirilgen úıde baspana alǵan Marııa Sarıdıdiń uly fýtbolmen aınalysady. Anastas úıdiń janynda óziniń fýtbol alańy bolatynyna qýanyshty.

Marııa Sarıdıdiń ózi Doskeıde dúnıege kelgen. Osyǵan deıin anasymen birge turdy. Uly týylǵannan keıin jalǵyzbasty ana retinde ol turǵyn úıge kezekke turdy. Áıeldiń múgedektigi bar.

«Árıne, men baspanaly bolýydan úmit úzdim, sebebi kezekte 7 jyl turdym. Al bıyl kiltterdi alǵan kezde qýanyshymda shek bolmady. Ulym ekeýmiz baqyttan basymyz aınalyp, qatty qýandyq. Úı jyly, tipti kireberiste de batareıalar ystyq. Barlyq kommýnaldyq ıgilikter bar. Maǵan eki bólmeli páterdi satyp alý quqyǵymen jalǵa berdi. Men 5 jyl aralyǵynda onyń ıesi bola alamyn. Aıyna 3 myń teńgege jýyq jaldaý aqysyn tóleımin. Endi men ońalyp, jumys tabamyn dep úmittenemin, mamandyǵym boıynsha men ámbebap shashtarazbyn», – deıdi Marııa.




Birinshi bolyp 40 páterli úı qalpyna keltirildi. Ol osy jyldyń basynda paıdalanýǵa berildi. Sonyń arqasynda kezekte turǵan azamattar baspanaly boldy. Qazirgi ýaqytta taǵy eki úıge kúrdeli jóndeý jumystary júrgizilýde.

«Olardyń biri 40 páterlik, ekinshisi – 60 páterlik. Kelesi jyldyń kókteminde paıdalanýǵa beremiz. Olardaǵy páterler turǵyn úı kezeginde turǵan azamattarǵa bólinedi. Búginde Buqar Jyraý aýdanynda úı alýǵa kezekte 1 100 adam tur, onyń 139-y Doskeı aýyldyq okrýginde», – deıdi «Doskeı aýyldyq okrýgi ákiminiń apparaty» MM bólim basshysy Núrkesh Shakmanov.

Buqar Jyraý aýdanynyń kommýnaldyq menshiginde barlyǵy alty úı bar. Qalǵan úsheýi kelesi jyly qalpyna keltirile bastaıdy.

Taǵy úsh úı oblystyq mádenıet, densaýlyq saqtaý jáne bilim basqarmalaryna berildi. Ondaǵy páterler qyzmettik bolady. Olardy muǵalimder, dárigerler jáne mádenıet qyzmetkerleri alady.







Kóp qabatty úılerge barlyq ınjenerlik jeliler, sonyń ishinde ortalyqtandyrylǵan jylytý jelileri tartylǵan. «Jumyspen qamtýdyń jol kartasy» baǵdarlamasy boıynsha modýldik qazandyq salyndy. Eki qazandyqtyń qýaty bes úıdi jylytýǵa jetkilikti. Barlyq kópqabatty úıler qalpyna keltirilgende, taǵy bir qazandyq ornatylady.

Bul úılerdiń mańyndaǵy árbir aýla abattandyrylady, asfalttalady jáne jaryqtandyrylady, balalar men sport alańdary ornatylady, fýtbol korty salynady.





Joǵary qaraı