Aýa raıy
Astana 17 °S
Almaty 22 °S
valıýta baǵamy
USD 412.55
EUR 468.66
RUB 5.79
CNY 58.80

Qaraǵandy oblysynda ınfektsııalyq baǵyttaǵy 20 medıtsınalyq mekeme jumys isteıdi

2020 jyldyń 7 shilde 2020 16:54

QARAǴANDY. QazAqparat - Qaraǵandy oblysynda qosymsha PTR-zerthanalar, provızorlyq statsıonarlar men pýlmonologııalyq gospıtaldar ashý úshin sharalar qabyldanýda. Bul týraly Qaraǵandy oblysynyń ákimi Jeńis Qasymbek «Saryarqa» telearnasynyń tikeleı efırinde málimdedi, dep habarlaıdy QazAqparat tilshisi.

Óńir aýrýhanalaryndaǵy tósek sany 4 200-ge ósti. Qaraǵandy oblysynda barlyǵy 20 ınfektsııalyq beıindegi medıtsınalyq nysan jáne 14 pýlmoprovızorlyq gospıtal jumys isteıdi.

«Infektsııalyq bólimshelerdegi júkteme 81%, provızorlyq bólimshelerdegi júkteme 79% quraıdy. Mysaly, Qaraǵandy boıynsha búgingi kúni juqpaly aýrýlar statsıonarlarynda 1 264 tósek bar, onyń 141-i bos. Provızorlyq statsıonarlarda barlyǵy 720 tósek, bos - 118 tósek bar. Degenmen, biz juqpaly jáne pýlmoprovızorlyq tósek sanyn arttyrý boıynsha sharalar qabyldaımyz», - dedi aımaq basshysy.

Qaraǵandyda 350 oryndyq pýlmoprovızorlyq gospıtal ashylýǵa daıyn. Ol kompıýterlik tomografpen jáne tynys alý jetkiliksizdigi bar naýqastardy emdeýge qajetti medıtsınalyq gaz berýdiń zamanaýı júıesimen jabdyqtalǵan.

Jezqazǵanda jaqyn arada 350 oryndyq provızorlyq statsıonar jumys isteıdi. Sondaı-aq, munda 250 tósekke shaqtalǵan ınfektsııalyq gospıtal paıdalanýǵa beriledi.

Balqashta da 100 tósektik pýlmoprovızorlyq statsıonar ashylady.

Oblystyń basym baǵyttarynyń biri aýrýhanalar men gospıtaldardy tehnıkalyq jabdyqtaý bolyp tabylady. Sońǵy aptada 47 ÓJJ apparaty, árqaısysy eki patsıentke arnalǵan 160 ottegi kontsentraty jáne 146 pýlsoksımetr satyp alyndy.

«Qazir qosymsha 80 ÓJJ apparatyn jáne 1 200 ottegi kontsentratorlaryn, 500 pýlsoksımetrlerdi, 16 sandyq rentgen - apparatty, 3 dana ortalyqtandyrylǵan medıtsınalyq gazdarmen qamtamasyz etý júıesin jáne basqalaryn satyp alamyz», - dep habarlady Jeńis Qasymbek.

Oblysta táýligine 3 myń taldaý shyǵaratyn úsh PTR-zerthana (ekeýi Qaraǵandyda jáne bireýi Jezqazǵanda) jumys isteıdi. Osy aptanyń sońynda Temirtaýda PTR zerthana jumysyn bastaıdy, tamyz aıynda Balqashta ashylady.

Óńirde 16 kompıýterlik tomografııa kabıneti bar. Osy aptada Qaraǵandyda taǵy bir kompıýterlik tomografty ornatý aıaqtalady. 20 shildege deıin Shahtınskide iske qosylady. Oblysta qazan aıyna qaraı barlyǵy 21 kompıýterlik tomografııa kabıneti jumys isteýi tıis.

Oblysta epıdemıologııalyq jaǵdaıdyń kúrdelenýine baılanysty 27 jańa jedel járdem brıgadasy jolǵa shyqty. Shaqyrýǵa barlyǵy 122 kólik shyǵady.

«Qazir messendjerler men áleýmettik jelilerde aýrýlardy halyq emimen jáne basqa da balamaly ádistermen emdeý boıynsha kóptegen dáıeksiz aqparat taratylýda. Aıta ketý kerek, aýyr aýrýlardy emdeý, antıbıotıkterdi taǵaıyndaýmen tek dárigerler ǵana aınalysa alady. Ózin-ózi emdeý ólimge deıin ákelýi múmkin», - dep atap ótti oblys ákimi.


Joǵary qaraı