Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qaraǵandy oblysynda óńirdi damytýdyń bes jyldyq qorytyndysy shyǵaryldy

2021 jyldyń 18 maýsym 2021 03:01

QARAǴANDY. QazAqparat – Qaraǵandy oblysynda bes jyl ishinde ekonomıka kólemi eki esege artty. Ken óndirý jáne óńdeý ónerkásibinde ósim baıqalady. Bul jańa jumys oryndaryn ashady – 2020 jyly 30 myńnan astam adam jumysqa ornalastyryldy.

Qaraǵandy oblysynyń 2016–2020 jyldarǵa arnalǵan damý baǵdarlamasynyń oryndalýy týraly esepti oblystyq máslıhat depýtattary onlaın rejıminde ótken kezekti IV sessııada qabyldady.

«2016–2020 jyldary Qaraǵandy oblysyn damytý baǵdarlamasynyń is-sharalaryn iske asyrý óńirdiń údemeli áleýmettik-ekonomıkalyq damýyn, kólik, ınjenerlik-kommýnıkatsııalyq ınfraqurylymdy jetildirýdi, turǵyn úımen jáne áleýmettik sala nysandarymen qamtamasyz etý boıynsha birqatar problemalardy sheshýdi qamtamasyz etti. Jan basyna shaqqandaǵy JÓÓ 5 jyl ishinde 2,7 mln teńgeden bir adamǵa 4,5 mln teńgege deıin – 68,3%-ǵa ósti. Jergilikti bıýdjetke salyqtyq jáne salyqtyq emes túsimderdiń ósý qarqyny 19,3%-ǵa artty», – dep baıandady ekonomıka basqarmasynyń basshysy Azamat Muqanov.

Bes jyl ishinde negizgi kapıtalǵa salynǵan ınvestıtsııalar eki ese ósti. Turǵyn úı qurylysy da ulǵaıdy. Búginde oblysta 90 myńnan astam shaǵyn jáne orta bıznes sýbektileri jumys isteıdi – 2016 jylmen salystyrǵanda ol 13,6%-ǵa artyq.

Jumyssyzdyq deńgeıi 5%-dan 4,6%-ǵa deıin tómendedi.

Tekserý komıssııasynyń tóraǵasy Aıan Ábdikárimov te óńirdiń damýyna taldaý jasady. Bıýdjet jáne jergilikti basqarý men ózin-ózi basqarýdy damytý jónindegi turaqty komıssııanyń múshesi ıÝlııa Badına sóz sóıledi. Olar ózderiniń eskertýlerin aıtyp, bıýdjet aqshasyn paıdalaný tıimdiliginiń monıtorıngin kúsheıtýdi usyndy.

Jalpy, depýtattar baǵdarlamanyń iske asyrylýyn maquldady.

«Birqatar jaǵymsyz faktorlarǵa qaramastan, ótken bes jyl ishinde oń nátıjeler qamtamasyz etildi. Ekonomıkanyń jyl saıynǵy ósýine qol jetkizildi. Ótken jyly ǵana onyń kólemi 6,2 trln teńgeden asty – 2015 jylmen salystyrǵanda atalmysh kórsetkish eki ese kóp, bul jyl saıynǵy jumys oryndaryn qurýdy 2016 jylǵy 12 myńnan 2020 jyly 30 myńǵa deıin ulǵaıtýǵa múmkindik berdi, taý-ken óndirý ónerkásibiniń kólemi 24,4%-ǵa, óńdeý ónerkásibi 15%-ǵa ulǵaıdy. Sońǵy 5 jylda JÓÓ qurylymyndaǵy shaǵyn jáne orta bıznestiń úlesi 4,3%-ǵa ósti», – dep atap ótti oblys ákimi Jeńis Qasymbek.

Óńir basshysy ınfraqurylymdy damytý týraly aıtyp berdi. Ótken jyly 2 myń shaqyrym jol jóndeldi. Qalalar men aýyldarda 378 shaqyrym sý qubyry jáne káriz jelileri salyndy. Jumyspen qamtýdyń jol kartasy jáne «Aýyl – El besigi» jobasy boıynsha 421 aýla abattandyrylyp, 223 bilim berý, densaýlyq saqtaý, mádenıet jáne sport nysandary jóndeldi.

Depýtattar sondaı-aq 2020 jylǵa arnalǵan oblystyq bıýdjettiń atqarylýyn bekitti.

«Biz jarııalanǵan tótenshe jaǵdaı men pandemııa jaǵdaıynda jumys istedik. Daǵdarysqa qarsy sharalardy ýaqtyly júzege asyrý úshin bıýdjetti birneshe ret naqtylap, túzetýge týra keldi. Biz azamattarymyzdy qoldaý jáne densaýlyq saqtaýdy kúsheıtý úshin kúrdeli ýaqyttyń syn – qaterlerine jedel den qoıa aldyq», – dep atap ótti Jeńis Qasymbek.


Joǵary qaraı