Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qaraǵandy oblysynyń ákimi máslıhat depýtattaryna esep berdi

2021 jyldyń 26 qyrkúıek 2021 22:35

QARAǴANDY. QazAqparat – Qaraǵandy oblysynyń basshysy Jeńis Qasymbek oblystyq máslıhattyń kezekti sessııasynda halyq qalaýlylarynyń aldynda onlaın rejımde esep berip, óńirdiń ekonomıkalyq damýy men áleýmettik mindettemelerdiń oryndalý barysyn baıandady, dep habarlaıyd QazAqparat tilshisi.

Oblys ákimi memlekettik baǵdarlamalardyń júzege asyrylýy jáne jergilikti atqarýshy bılik jumysynyń nátıjeleri týraly aıtyp berdi.

«Jalpy, óńir ekonomıkasynda oń dınamıka qamtamasyz etildi. Ónerkásiptik alyptar da, jobalyq qýatqa shyqqan jańa óndirister de óz úlesterin qosýda. Bıyl alty joba iske qosyldy. Al jyl sońyna deıin 14 joba josparlanyp otyr, eki myńǵa jýyq jumys orny ashylady. Investıtsııa ósimi qamtamasyz etildi. Bul pandemııa kezeńine qaramastan, aımaq ınvestıtsııalyq tartymdy bolyp qala beretinin kórsetip otyr», – dep atap ótti Jeńis Qasymbek.





8 aıdyń qorytyndysy boıynsha óńirdiń ónerkásiptik kásiporyndary 2,8 trln teńgeniń ónimin óndirdi. Óńdeý ónerkásibinde ósim 1,4% qurady.

Oblystyń eńbekke qabiletti halqynyń úshten biri shaǵyn jáne orta bıznes salasynda jumys isteıdi. Atalmysh sektordaǵy sýbektiler sany 4,6% ósimmen 92 myń birlikke jetti. Kásipkerliktiń belsendiligine memlekettik qoldaý yqpal etedi.

Jeńis Qasymbek «Aýyl – El besigi» arnaıy jobasynyń da tıimdiligin atap ótti. Bıyl baǵdarlama boıynsha 25 kent pen aýylda 120 shaqyrym jol jóndeldi. Sondaı-aq, áleýmettik nysandardy jóndeý jáne salý boıynsha jobalar iske asyrylýda.

Óńirde alty jańa densaýlyq saqtaý nysany paıda bolady. Qaraǵandyda oblystyq onkodıspanserdiń operatsııalyq-reanımatsııalyq blogy, eki jedel medıtsınalyq járdem qosalqy stantsııasy salynýda.

Oqý oryndarynda oqýshylar men stýdentterdiń qaýipsizdigin qamtamasyz etýge kóp kóńil bólindi. Sondaı-aq, mektepterde balalardy tegin tamaqtandyrý máselesi sheshildi. Búgin áleýmettik kategorııalarǵa qaramastan, 1–4 synyp oqýshylaryna túski as tegin beriledi.

«Biz mańyzdy áleýmettik mindetterdi sheshý boıynsha naqty nátıjeler men kúndelikti jumysty kórip otyrmyz. Strategııalyq damý josparynda ınvestıtsııa tartýǵa, shaǵyn jáne orta bıznesti damytýǵa, ınfraqurylymdy jaqsartýǵa kóp kóńil bólinedi», – dep túıindedi oblystyq máslıhat hatshysy Serik Óteshov.

Depýtattar oblys ákiminiń esebin biraýyzdan maquldady.

Sessııada sondaı-aq óńirdegi turǵyn úı qurylysynyń jaı-kúıi men damý áleýeti týraly másele qaraldy. Qurylys, sáýlet jáne qala qurylysy basqarmasynyń basshysy Abzal Jaılybaevtyń aqparaty boıynsha, oblysta 8 aıda «Nurly jer» baǵdarlamasy boıynsha 308 myń sharshy metrge jýyq turǵyn úı paıdalanýǵa berildi, bul ótken jyldyń sáıkes kezeńimen salystyrǵanda 20% derlik ósken. Úlken qurylys jalǵasýda – bıyl keminde 662 myń sharshy metr turǵyn úıdi paıdalanýǵa berý josparlanýda. Al aldaǵy úsh jylǵa jylyna bir mıllıon sharshy metr kórsetkishke shyǵý mindeti qoıyldy.


Joǵary qaraı