Aýa raıy
Astana -25 °S
Almaty -9 °S
valıýta baǵamy
USD 421.58
EUR 496.83
RUB 5.53
CNY 62.20

Qaraǵandy oblysynyń Balqash qalasynda karantın kúsheıtildi

2020 jyldyń 23 qazan 2020 16:27

BALQASh. QazAqparat – Qaraǵandy oblysynyń Balqash qalasynda koronavırýs ınfektsııasynyń tirkelý sanynyń ulǵaıýyna baılanysty shekteý sharalary kúsheıtiledi, dep habarlaıdy QazAqparat tilshisi.

QR Úkimeti janyndaǵy koronavırýstyń taralýyna jol bermeý jónindegi vedomstvoaralyq komıssııanyń málimetine sáıkes, 24 qazan saǵat 00.00-den bastap:

1. 65 jastan asqan adamdarǵa kóshege shyǵýǵa shekteý engiziledi.

2. Kámeletke tolmaǵan balalarǵa eresekterdiń qaraýynsyz júrýine tyıym salynady.

3. Halyq kóp jınalatyn oryndar: gúlzarlar, saıabaqtar, jaǵalaýlar men úılerdiń aýlasyndaǵy balalar alańdary jabylady.

4. Zeınetkerler men múmkindigi shekteýli adamdarǵa kómek kórsetý boıynsha volonterlerdiń jumysy jandandyrylady (65 jastan asqan adamdarǵa azyq-túlik, dári-dármek jetkizýge, zeınetaqy alýǵa jáne t.b. kómek).

5. Buqaralyq aqparat quraldarynda volonterlerdiń, jetkizý qyzmetteriniń telefon nómirleri jarııalanatyn bolady.

6. Qala boıynsha qoǵamdyq kólikterdiń qozǵalysy shekteledi. Tek ónerkásiptik kásiporyndarǵa jumysshylardy jetkizetin qoǵamdyq kólikterdiń júrýine – ruqsat.

7. Balqash stantsııasyn, Qońyrat shaǵynaýdanyn qosa alǵanda, qala aýmaǵynda saǵat 22.00-den 05.00-ge deıin jeke avtokóliktiń barlyq túriniń qozǵalysyna tyıym salynady.

8. Qoǵamdyq tamaqtaný nysandarynyń jumys ýaqyty saǵat 22.00-ge deıin shekteledi.

9. Azyq-túlik satatyn nysandardyń jumys ýaqyty saǵat 22.00-ge deıin shekteledi.

10. Qyzmet kórsetý salasyndaǵy nysandar: shashtarazdar, sulýlyq salondar, monshalar, saýnalar - qyzmet kórsetýdi qatań túrde aldyn ala jazylý boıynsha júzege asyrady. Sondaı-aq dezınfektsııalyq is-sharalardy júrgizýge, kelýshiler arasyndaǵy ara-qashyqtyqtyń saqtalýyn qadaǵalaýǵa mindetteledi.

11. Kásipkerlik sýbektiler: nysandarǵa maskasyz jáne kataraldy belgileri bar (jótel, murynnyń aǵýy, temperatýra) kelýshilerdi kirgizbeýi tıis.

12. Táýlik boıy qalada polıtsııa bólimi men áskerı polıtsııa kúshterimen patrýldeý uıymdastyrylady. Úsh adamnan artyq toptasýǵa jol berilmeıdi.

13. Balqash qalasynyń aýmaǵynda ornalasqan áskerı bólimder, onyń ishinde azamattyq personal qashyqtan jumys rejımine (qyzmetkerlerdiń keminde 50%) kóshiriledi.


Joǵary qaraı