Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qaraǵandyda Áshirbek Syǵaı atyndaǵy respýblıkalyq teatrlar festıvali ashyldy

2021 jyldyń 13 qazan 2021 00:37

QARAǴANDY. QazAqparat – Qaraǵandyda belgili teatr synshysy, professor Áshirbek Syǵaı atyndaǵy alǵashqy respýblıkalyq teatr festıvali ashyldy. Spektaklder kórsetilimderi S. Seıfýllın jáne K.Stanıslavskıı atyndaǵy teatr sahnalarynda ótedi. Qoıylymdardy 16 qazanǵa deıin kún saıyn 11:00, 15:00 jáne 18:00-de tamashalaýǵa bolady, dep habarlaıdy QazAqparat tilshisi.

Elimizdiń 40-qa jýyq teatry festıvalge qatysýǵa ótinim berdi. Uıymdastyrý komıteti olardyń 15-in iriktep aldy. Bul «Qulager» spektaklin usynyp otyrǵan Almaty qalasynyń Ǵ. Músirepov atyndaǵy Qazaq memlekettik akademııalyq balalar men jasóspirimder teatry, «Qyz Jibek» lıro-epostyq qoıylymymen Nur-Sultan qalasynan kelgen Á.Mámbetov atyndaǵy Qazaq memlekettik drama jáne komedııa teatry, «Men ishpegen ý bar ma?» spektaklin alyp kelgen Jezqazǵan qalasynyń S. Qojamqulov atyndaǵy Qazaq mýzykalyq-drama teatry jáne basqalar.

«Festıvalge 15 teatr qatysady, olardyń repertýarlary alýan túrli klassıkadan bastap qazirgi zamanǵy dramalarǵa deıin. Osy spektaklderdiń ereksheligi – olardyń sońǵy premeralary men jas rejısserleri. Bul Qazaqstannyń teatr rejıssýrasynyń ósip kele jatqanyn, onyń bolashaǵy bar ekenin kórsetedi», – dep atap ótti festıval qonaǵy Qazaqstannyń Halyq ártisi Tuńǵyshbaı Jamanqulov.

Spektaklderdi QR eńbek sińirgen qaıratkeri, professor Erkin Jýasbekov bastaǵan qazylar alqasy baǵalaıdy. Negizgi ólshemshart – «Syn shyn bolsyn!».

«Áshirbek Syǵaı atyndaǵy teatr festıvali Qazaqstanda alǵash ret ótýde. Bizdiń basty maqsatymyz – syn aıtý emes, qazirgi qazaq teatryna qaı baǵytta damý kerektigin anyqtaý, jańa teatrdy kórý, pikir almasý. Búginde jas rejısserler keledi, olar kóbinese klassıka negizinde ártúrli janrdaǵy zamanaýı spektaklder jasaıdy. Olardyń óz ıdeıalary men óz kózqarastary bar», – deıdi qazylar alqasynyń tóraǵasy, teatr synshysy Amangeldi Muqan.

Festıval qorytyndysy boıynsha Áshirbek Syǵaı men onyń shákirtteriniń atynan bas jáne arnaıy júldelerdiń ıegerleri anyqtalady. Úzdik akterler men rejısserler de marapattalady.

Festıvaldiń ashylý kúni qazylar alqasy men kórermender nazaryna S.Seıfýllın atyndaǵy Qaraǵandy qazaq drama teatry Vengr dramatýrgi Laslo Dıýrkonyń pesasy boıynsha «Elektra» antıkalyq tragedııasynyń zamanaýı nusqasyn usyndy.








Joǵary qaraı