Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Qaraǵandylyq Garvard medıtsına mektebine taǵylymdamaǵa shaqyryldy

2022 jyldyń 23 mamyr 2022 22:37

QARAǴANDY. QazAqparat – Qaraǵandylyq boıjetken álemniń úzdik joǵary medıtsınalyq mektepteriniń biri – Harvard Medical School-ǵa taǵylymdamadan ótýge shaqyrý aldy. Ánel Júnisova Garvardta este saqtaý, Altsgeımer, klınıkalyq depressııa jáne aýtızm spektriniń buzylýy protsesterin zertteıdi, dep habarlaıdy QazAqparat tilshisi.

Á.Júnisova 2018 jyly Nazarbaev Zııatkerlik mektebin bitirgennen keıin Ońtústik Koreıadaǵy Ulsan National Institute of Science and Technology (UNIST) oqý ornyna túsken. Ol «Bıomedıtsınalyq ınjenerııa» jáne «Bıznes-ákimshilik» mamandyqtary boıynsha qos dıplom baǵdarlamasyn tańdady.

Ýnıversıtette Ánel ǵylymmen jáne qoǵamdyq qyzmetpen belsendi aınalysty. Ol eki jyl boıy 50 ult ókilderinen turatyn UNIST Halyqaralyq stýdentter uıymynyń prezıdenti boldy. Sondaı-aq ol NIS Alumni-diń Ońtústik Koreıadaǵy fılıalyn qurdy. Baǵdarlama boıynsha qarjy bólinip, ol 600-den astam oqýshyǵa jergilikti joǵary oqý oryndaryna túsýge tegin tálimgerlik etýge jáne túrli is-sharalar arqyly Qazaqstannan Ońtústik Koreıaǵa kelgen stýdentterdiń basyn qosýǵa jumsaldy.




Bul tájirıbe boıjetkenge Sıngapýr Ulttyq ýnıversıteti janyndaǵy aýrýhananyń bir bóligi bolyp tabylatyn Sıngapýr klınıkalyq zertteýler ınstıtýtynda (Singapore Institute of Clinical Science) aqyly taǵylymdamadan ótýge múmkindik berdi. Ol akademııalyq demalys alyp, jarty jylǵa Koreıadan Sıngapýrǵa kóshti.

«Bir kezderi praktıkalyq tájirıbe jınaý týraly ýaqytyly sheshim qabyldaǵanyma óte qýanyshtymyn. Óıtkeni dál osy jerde pedıatrııalyq nevrologııa bóliminde armandaǵan baǵytymdy taba aldym. 3–7 jas aralyǵyndaǵy balalarda aýtızmniń paıda bolýy men órshýin zertteý boıynsha ózimniń zertteý jobama qarjylandyrý ala aldym. Zertteýim MRT sýretterin, genetıkalyq bıomarkerlerdi jáne balalardyń jalpy psıhıatrııalyq jaǵdaıyn taldaýdyń pánaralyq ıntegratsııasyna negizdelgen», – deıdi Ánel Júnisova.

Sıngapýrdaǵy taǵylymdama kezinde boıjetken birden tanymal professorlar men dárigerlerdiń basshylyǵymen birneshe joba boıynsha jumys istedi. Bul oǵan bir ýaqytta ártúrli zertteý ádisterin ıgerýge jáne nevrologııalyq sýretterdi óńdeýge kómektesetin negizgi taldaý túrlerimen tanysýǵa múmkindik ashty.

«Nevrologııa, baǵdarlamalaý jáne molekýlalyq bıologııadan alynǵan praktıkalyq bilim maǵan Garvard medıtsınalyq mektebinde jazǵy taǵylymdamadan ótýge jetkilikti múmkindik berdi. Bul meniń burynnan kele jatqan armanym. Biraq Garvardqa ótý óte qıyn sekildi bolyp kórindi, óıtkeni onyń medıtsınalyq mektebi US News & World Reports Medical School Ranking reıtıngisinde №1 bolyp tanyldy jáne ótken jyly oqýǵa 6914 talapkerdiń 2,9% ǵana qabyldandy», – dep atap ótti ol.

Garvardta Ánel este saqtaý, Altsgeımer, klınıkalyq depressııa protsesterin zerttep, aýtızmdi zertteýdi jalǵastyrady, biraq jas aýqymyn keńeıtedi.

«Men osy jazda Garvardta ózimniń tájirıbelik daǵdylarymdy jetildirip qana qoımaı, mıdy zertteýdegi irgeli kitaptardyń, nusqaýlyqtardyń jáne baǵdarlamalyq jasaqtamanyń avtorlarymen ıyq tirese jumys isteı otyryp, óz jobalarymdy damytýdy jalǵastyratynyma áli kúnge deıin sene alar emespin», – dep bólisti stýdent.


Joǵary qaraı