Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Qarasha aıynda qansha altyn quımasy satyldy

2021 jyldyń 21 jeltoqsan 2021 15:37

ALMATY. QazAqparat - 2021 jyldyń qarasha aıynda ekinshi deńgeıli bankter men jekelegen banktik emes aıyrbastaý pýnkteri jalpy salmaǵy 129,2 keli 3401 altyn quımany satty, dep habarlaıdy QazAqparat QR Ulttyq bankiniń resmı saıtyna silteme jasap.

Halyqqa tazartylǵan altyn quımalardy satý jáne satyp alý baǵdarlamasyn (budan ári – Baǵdarlama) Ulttyq Bank 2017 jyly iske qosqan bolatyn. Baǵdarlama qolǵa alynǵaly jalpy salmaǵy 2,6 tonnaǵa jýyq 71 631 altyn quıma satylǵan.

Altyn quımalar bes túrli salmaqta usynylady: 5, 10, 20, 50 jáne 100 g. Satyp alýshylar arasynda óte joǵary suranysqa ıe túri – 10 gramdyq altyn quıma. Jalpy satylǵan quımalar arasynda onyń úlesi – 28%, ıaǵnı, 19 816 dana. Odan keıin 100 gramdyq quıma suranysqa ıe, 15 911 dana (22%) satylǵan, 20 gramdyq quımadan 13 779 dana (19%), 5 gramdyq quımadan 12 367 dana (17%), 50 gramdyq quımadan 9 758 dana (14%) satyldy. Altyn quımalar Almaty, Nur-Sultan jáne Atyraý qalalarynda kóp satylady.

Altyn quımalar senimdi ınvestıtsııa quraly bola alady. Altyn quımalar naryǵyndaǵy ótimdiliktiń basty kepili – bank pen banktik emes aıyrbastaý pýnkteri klıentke aqshany sol kúni tóleı otyryp, altyn quımalardy keri satyp ala alady.

Baǵdarlama bastalǵannan beri ekinshi deńgeıli bankter men jekelegen banktik emes pýnkter jalpy salmaǵy 257 keli 10 538 altyn quımany keri satyp alǵan, bul – jalpy satylǵan altyn quımalardyń 15%-y. Olar keri satyp alǵan altyn quımalardyń barlyǵy derlik Ulttyq banktiń fılıaldary arqyly halyqqa satylady.

Árbir quıma qorǵaý elementterimen qaptalǵan (quımanyń aına beti, mıkrotekst jáne jıegi bar) jáne arnaıy qorapqa salynyp shyǵady, sol arqyly quımanyń ashylǵan-ashylmaǵanyn ońaı tekserýge bolady. Qorǵap turatyn qorap, sondaı-aq sapa sertıfıkaty bolyp sanalady. Sondyqtan, altyn quımany uqypty saqtap, qorabyn búldirmeýge keńes beremiz.

Qazir altyn quımalardy Halyk Bank, Eýrazııalyq Bank, Jusan Bank, TsentrKredıt Banki, sondaı-aq jekelegen banktik emes pýnkterden satyp alyp, keri satýǵa bolady.


Basty sózder: Almaty, QR Ulttyq banki, Bankter, Altyn,
Joǵary qaraı