Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qarjy mınıstri depýtattardyń synyna jaýap berdi

2021 jyldyń 23 qyrkúıek 2021 18:34

NUR-SULTAN. QazAqparat – Buǵan deıin Qarjy mınıstrliginiń bıznesti tekserýge qoıylǵan moratorııdi alyp tastaý týraly usynysyn birqatar depýtattar synǵa aldy. Vedomstvo depýtattardyń synyna qalaı qaraıdy? Úkimet úıinde ótken brıfıngide Qarjy mınıstri Erulan Jamaýbaevqa osyndaı saýal qoıyldy, dep habarlaıdy QazAqparat tilshisi.

«Qarjy mınıstrligi kez kelgen konstrýktıvti syndy qalypty qabyldaıdy. Biz arqashan dıalogqa daıynbyz. Biraq bul jerde moratorııdi alyp tastaý týraly sóz joq. Moratorıı Prezıdent Jarlyǵy boıynsha 2023 jyldyń 1 qańtaryna deıin saqtalady. Qarjy mınıstrligi josyqsyz kásipkerlerdi jaýapqa tartý bóliginde ǵana máseles kótergen bolatyn. Birneshe mysal keltireıin: ótken jyly saýda operatsııalary kezinde túbirtek berilmegeni týraly 19 myńnan astam shaǵym tústi. Taǵy bir mysal: biz júıede onlaın baqylaý-kassalyq mashınalaryn qoldanatyn kásipkerlerdiń 50 paıyzy udaıy túbirtek bermeıtinin kórip otyrmyz», - dedi Qarjy mınıstri.

Onyń aıtýynsha, Memlekettik kirister komıtetinde mundaı zańsyzdyqtarǵa áreket etý mehanızmi joq.

«Osyǵan baılanysty biz qazir túbirtek bermeıtin josyqsyz salyq tóleýshilerge qatysty salyqtyq baqylaý algorıtmin pysyqtap jatyrmyz. Moratorıı Prezıdenttiń Jarlyǵy boıynsha jalǵasatynyn atap óttim. Túbirtek bermeıtin josyqsyz kásipkerlerge qatysty biz salyqtyq jaýap berý sharalaryn ázirleımiz. Tıisti sharalardy biz bıznes qaýymdastyqtarǵa usynyp, olarmen talqylaımyz. Biz bıznesti retteýge qatysy bar kez kelgen sheshimimizdi qoǵamdyq tyńdaýǵa shyǵaryp, talqylaımyz. Bul másele boıynsha da mindetti túrde qoǵamdyq tyńdaý ótedi. Depýtattar korpýsymen de osy baǵytta jumys isteımiz», - dedi mınıstr.


Joǵary qaraı