Aýa raıy
Astana -6 °S
Almaty 3 °S
valıýta baǵamy
USD 421.58
EUR 496.83
RUB 5.53
CNY 62.20

Qashyqtan oqytý: Elorda ustazdary Kembrıdj professorlarymen tájirıbe almasady

2020 jyldyń 25 shilde 2020 12:42

NUR-SULTAN. QazAqparat - Jańa oqý jyly koronavırýs pandemııasyna baılanysty qashyqtan oqý formatynda bastalady. Osyǵan oraı bilim basqarmasy oqý jylynyń sátti bastalýy úshin daıyndyq júrgizip, qajetti sharalar qabyldaýda, dep habarlaıdy Nur-Sultan ákimdiginiń resmı saıty.

Nur-Sultan qalasy ákimdiginiń bilim berýdi jańǵyrtý ortalyǵy onlaın sabaq ótkizýge arnalǵan birneshe vırtýaldy platforma usyndy. Búginde qalanyń barlyq mektebi Daryn Online, Bilimland platformalarymen kelisim shartqa otyrǵan. Qazirgi tańda ustazdar ınteraktıvti quraldar men tehnologııalardy, beınesabaq paıdalanýdy meńgerip otyr.

«Bir platformanyń ózinde oqýlyqtar men tsıfrlyq resýrstardy qoldanyp, sabaq ótkizýge múmkindik bar. Keri baılanys jasaýǵa, oqýshynyń bilimin tekserýge bolady. Sondaı-aq Opiq.kz arqyly «Almatykitap» tsıfrly oqýlyqtaryn qoldanýǵa jaǵdaı jasalǵan», – dedi bilim berýdi jańǵyrtý ortalyǵynyń dırektory Álııa Maqysheva Astana Life baǵdarlamasynda.

Maýsym aıynda iske qosylǵan ekinshi onlaın platforma ustazdardyń ózara tájirıbe almasýyna, ádistemelik kómek kórsetýge arnalǵan. Ár juma saıyn úzdik ustazdar belgili bir taqyryp boıynsha onlaın konferentsııada óz tájirıbesimen bólisedi.

«Pedagogıkalyq tájirıbe alańy» barlyq ustazǵa qoljetimdi. Bilim berýdi jańǵyrtý ortalyǵy dırektorynyń orynbasary Syndar Daýeshova tájirıbe almasý maqsatynda Kembrıdj ýnıversıteti professorlarymen baılanys ornatylǵanyn atap ótti.

Jaqynda iske qosylǵan úshinshi onlaın platforma ustazdardyń kásibı biliktiligin arttyrýǵa baǵyttalǵan. Academia.kz pedagogıkalyq sheberliktiń vırtýaldy zerthanasy arqyly muǵalimder túrli kýrstardan ótip, sertıfıkat alady.

Vırtýaldy zerthanada Nazarbaev zııatkerlik mektepteri men elimizdegi eń úzdik ustazdarynyń avtorlyǵymen engizilgen kýrstar jınaqtalǵan. Qazirdiń ózinde bes myń maman onlaın sertıfıkat alyp úlgerdi.

«Ustazdar berilgen tapsyrmalardy oryndap, ártúrli deńgeılerden ótedi. Sodan keıin baryp sertıfıkat alady», – dep atap ótti pedagog Maıra Boranbaeva.

Nur-Sultan qalalyq bilim berýdi jańǵyrtý ortalyǵy tamyz aıynda «Tsıfrlyq pedagogıka: oqytý jáne tájirıbe» taqyrybynda onlaın-oqytý ótkizýdi josparlap otyr. Onda 12 480 muǵalim qamtylady.



Joǵary qaraı