Aýa raıy
Astana -16 °S
Almaty -3 °S
valıýta baǵamy
USD 421.58
EUR 496.83
RUB 5.53
CNY 62.20

Qashyqtan oqytý: Oraldaǵy Nazarbaev zııatkerlik mektebinde jańa joba qolǵa alyndy

2020 jyldyń 21 qazan 2020 22:00

ORAL. QazAqparat – Oraldaǵy fızıka-matematıka baǵytyndaǵy Nazarbaev zııatkerlik mektebinde muǵalimderdiń tsıfrly mádenıetin qoldaýǵa jáne damytýǵa baǵyttalǵan «Ádistemelik laıfhak: Tsıfrly gaıd» jobasy qolǵa alyndy, dep habarlaıdy QazAqparat tilshisi.

Mektep dırektorynyń orynbasary Gúlnár Dosqazıevanyń aıtýynsha, bir aı boıy joba spıkerleri – zııatkerlik mektep muǵalimderi óz áriptesterine onlaın-platformalar, paıdaly veb-saıttar, laıfhaktar men utymdy sheshimderdi tanystyryp, olardyń sabaqta tıimdi qoldanylýyn kórsetti.

Microsoft Teams alańynda «MIRO, PADLET, LINOIT vırtýaldy taqtalarymen qyzyqty onlaın sabaq», «Oqytýda EDMODO platformasyn qoldaný múmkindikteri, «SOCRATIVE qosymshasy kómegimen baǵalaý jáne keri baılanys ádisteri» «MOZAIC EDUCATION arqyly 3D prezentatsııa daıyndaý» jáne taǵy da basqa taqyryptyq ataýmen vebınarlar serııasy uıymdastyryldy.

«Nazarbaev zııatkerlik mektepteri» derbes bilim berý uıymynyń pedagogıkalyq sheberlik ortalyǵy trenerleri joba boıy spıkerlerge keri baılanysqa shyǵyp, pikirlerin aıtyp otyrdy.

G.Dosqazıevanyń sózine qaraǵanda, joba aıasynda mekteptiń qazaq tili men ádebıeti páninen sarapshy muǵalimi Jansáýle Maqsotova mını-oqýlyq qurastyrýǵa negizdelgen Bookcreator.com servısin usyndy. Atalǵan servıs arqyly onlaın formatta ózindik jumystardy ne úı tapsyrmasyn oryndatý oqýshylardyń pánge qyzyǵýshylyǵyn arttyrady. Oqýshylarǵa shaǵyn jobalyq jumysty, taqyrypqa qatysty problemalyq suraqtar tóńireginde zertteý jumystary nátıjesinde jınaqtalǵan aqparattardy kitapshaǵa ornalastyrýǵa múmkindik beredi.

Qosymsha kómegimen qurastyrylǵan shaǵyn kitapqa tek mátin túrindegi aqparat qana emes, aýdıojazbalar, beınematerıaldar, daıyn prezentatsııalardy engizýge bolady. Tipti nusqaýlyqty árkim óz daýysymen jazýǵa múmkindik bar. Qalasa, óz beınesin túsirip te sala alady. Oqýshy servıste sýret te sala alady, bul óz kezeginde oqýshylardy shyǵarmashylyqqa baýlıdy.

«Ádistemelik laıfhak: Tsıfrly gaıd» jobasyn iske asyrý nátıjeleri boıynsha Oral qalasyndaǵy Nazarbaev zııatkerlik mektebi oblys muǵalimderine arnalǵan tsıfrly forým uıymdastyrýdy josparlap otyr.





«Osy ýaqytqa deıin mektep muǵalimi nemese ınstıtýttyń professory bilimniń birden-bir jetkizýshisi, al dáris oqýshylarǵa aqparat berýdiń jalǵyz tásili bolyp keldi. Búginde kez kelgen aqparatty ǵalamtor betterinen tabýǵa bolady. Internet-kitaphanalar, ǵylymı zertteýler, beıne jáne aýdıo materıaldar barlyq qoldanýshyǵa qoljetimdi. Al qazirgi zaman sabaǵy – muǵalimniń monology emes, pikirtalas, zertteý men tájirıbe alańy. Sheshim tabýǵa jáne derekterdi taldaýǵa úırený barysynda oqýshy aldyńǵy qatarǵa shyqsa, muǵalim lektordan jattyqtyrýshy jáne moderatorǵa aınalady. Ol jetekshilik etedi, yntalandyrady, belsendi oqýǵa jaǵdaı jasaıdy. Sol sebepti muǵalimderdiń kásibıligine qoıylatyn talaptar da artyp keledi, endi olarǵa materıaldy aralap ótip, tanys marshrýt boıynsha dáris oqý jetkiliksiz. Olar zamanaýı bilim berý ádisterin qoldana bilýi kerek – bul qazirgideı qashyqtan oqytý kezinde mańyzdy», dedi G.Dosqazıeva.

Qazirgi tańda Oraldaǵy Nazarbaev zııatkerlik mektebinde 706 shákirttiń bári de onlaın bilim alýda.

Eske sala keteıik, budan buryn Oralda 32 myńǵa jýyq oqýshynyń qashyqtan bilim alyp júrgenin jazǵan bolatynbyz.







Avtor Eljan Eraly
Basty sózder: Batys Qazaqstan oblysy, Bilim,
Joǵary qaraı