Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

«Kásipkerlikti damytý» ulttyq jobasy: Qandaı sharalar qabyldanady

2021 jyldyń 12 qazan 2021 10:16

NUR-SULTAN. QazAqparat – Búgin Úkimet otyrysynda QR Ulttyq ekonomıka mınıstri Áset Erǵalıev «Kásipkerlikti damytý» ulttyq jobasy aıasynda atqaralytyn jumystardy aıtty, dep habarlaıdy QazAqparat tilshisi.

«Kásipkerlikti damytý boıynsha Ulttyq joba kásipkerlik belsendilikti arttyrýǵa, kásipkerlerdiń ósýin jedeldetýge, sondaı-aq básekelestikti keshendi damytýǵa baǵyttalǵan. Atalǵan baǵyttardy iske asyrý aıasynda 10 mindet, 30 kórsetkish jáne 69 is-shara kózdelgen. Ulttyq jobany qarjylandyrýdyń jalpy kólemi shamamen 8,5 trln teńgeni quraıdy, onyń ishinde respýblıkalyq bıýdjette 1 trln teńgeden astam qarjy, al jergilikti bıýdjetterde 125 mlrd teńge qarastyrylǵan. Sondaı-aq, 7,3 trln teńge somasyna jeke ınvestıtsııalar tartý qamtamasyz etiledi. Ulttyq joba kásipkerlik qurylymynda sapaly ózgeristerdi qamtamasyz etýge baǵyttalǵan. Osy maqsatqa qol jetkizý úshin jeke kásipkerlikpen aınalysýǵa jaǵdaılar jasaý, kásipkerlerdiń qajettilikterine sáıkes daǵdylardy damytý, sonymen qatar sýbsıdııalanatyn jumys oryndaryn uıymdastyrý boıynsha sharalar qabyldanatyn bolady», - dedi Á. Erǵalıev.

Onyń aıtýynsha, Ulttyq jobanyń basty mindetteriniń biri - kásipkerlik sýbektileri úshin qarjylandyrýdyń qoljetimdiligin arttyrý jáne ekonomıkadaǵy memlekettiń úlesin tómendetý. Ulttyq taýar ótkizý jelisin qurý jáne jańǵyrtý josparlanýda.

«Kásipkerlik belsendilikti arttyrý maqsatynda 690 myń shaǵyn jáne orta bıznes sýbektisi memlekettik qoldaý sharalarymen qamtylatyn bolady. «Bastaý Bıznes» aıasynda jeke isin ashqan kásipkerler sany 2 esege ósedi, sonyń ishinde 55 myń aýyl kásipkerine naqty qoldaý kórsetiletin bolady. Saýda ınfraqurylymynyń zamanaýı formattaryn qurý maqsatynda kóp formatty saýda obektileri 6-dan 132-ge deıin ulǵaıtylatyn bolady. Jekeshelendirýdi damytýǵa baǵyttalǵan sharalar memlekettiń ekonomıkadaǵy úlesin 14% deıin qysqartýdy kózdeıdi. Qabyldanǵan sharalar shaǵyn jáne orta kásipkerliktiń jalpy ishki ónimdegi úlesin 2025 jylǵa qaraı 35% deıin ulǵaıtýǵa múmkindik beredi», - dedi mınıstr.

Budan buryn habarlanǵandaı, mınıstr Úkimette úsh ulttyq jobany tanystyrdy.

Qazaqstan Respýblıkasy Prezıdenti janyndaǵy Reformalar jónindegi joǵary keńestiń tapsyrmasyn oryndaý maqsatynda, Ulttyq ekonomıka mınıstrligi múddeli memlekettik organdarmen birlesip úsh Ulttyq jobany ázirledi. Olar «Qazaqstandyqtardyń ál-aýqatyn arttyrýǵa baǵyttalǵan turaqty ekonomıkalyq ósý» jáne «Kásipkerlikti damytý», sonymen birge «Qýatty óńirler – el damýynyń draıveri» atty ulttyq jobalar.


Joǵary qaraı