Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qasym-Jomart Toqaev Majarstan Premer-mınıstriniń orynbasary Mıhaı Vargany qabyldady

2021 jyldyń 26 qazan 2021 18:00

NUR-SULTAN. QazAqparat - Prezıdent Qasym-Jomart Toqaev Majarstan Premer-mınıstriniń orynbasary – Qarjy mınıstri Mıhaı Vargany qabyldady, dep habarlaıdy QazAqparat Aqordaǵa silteme jasap.

Memleket basshysy Qazaqstan men Majarstannyń Strategııalyq keńesiniń besinshi otyrysyna jáne bıznes-forýmǵa qatysý úshin Nur-Sultan qalasyna kelgen Majarstan Premer-mınıstriniń orynbasary – Qarjy mınıstri Mıhaı Vargany qabyldady.

Kezdesý barysynda saýda-ekonomıkalyq, qarjy, ınvestıtsııa jáne mádenı-gýmanıtarlyq salalardaǵy ekijaqty qatynastardy damytýdyń perspektıvalary qarastyryldy. Sondaı-aq pandemııaǵa qarsy kúres sharalaryna, klımattyń ózgerýine jáne aımaqtyq kún tártibine qatysty máseleler sóz boldy.




Qazaqstan Prezıdenti elimizdiń tileýles dosy Mıhaı Vargaǵa iltıpat bildirip, onyń Qazaqstanǵa sapary tabysty bolatynyna jáne eki memleket arasyndaǵy yntymaqtastyqty odan ári damytýǵa tyń serpin beretinine senim bildirdi.

Majarstan Premer-mınıstriniń orynbasary – Qarjy mınıstri kezdesýge múmkindik bergeni úshin Qasym-Jomart Toqaevqa alǵys bildirip, álemdegi qazirgi jaǵdaıǵa qaramastan, Qazaqstan men Majarstan arasyndaǵy baılanystardyń damý qarqyny báseńdemegenin aıtty.




Qazaqstan Prezıdenti men Majarstan Premer-mınıstriniń 2019 jylǵy sáýirde Nur-Sultan qalasynda tabysty kezdesý ótkizgenin aıtqan Mıhaı Varga Majarstan basshylyǵy Qasym-Jomart Toqaevtyń Býdapeshtke aldaǵy ýaqytta jasaıtyn saparyn asyǵa kútip otyrǵanyn jetkizdi.




Majarstan saıasatkeri Memleketimizdiń basshysyna pandemııa kezinde kórsetken qoldaýy úshin alǵys bildirip, Nur-Sultan qalasyndaǵy bıznes-forýmnyń tabysty ótkenin aıtty. Atalǵan shara barysynda birqatar mańyzdy ınvestıtsııalyq kelisimge qol qoıyldy.





Joǵary qaraı