Aýa raıy
Astana -16 °S
Almaty -3 °S
valıýta baǵamy
USD 421.58
EUR 496.83
RUB 5.53
CNY 62.20

Qasym-Jomart Toqaev «Uly aqyn Abaı uldarymen» eskertkishiniń ashylý saltanatyna qatysty

2020 jyldyń 15 qazan 2020 11:42

SEMEI. QazAqparat - Memleket basshysy Qasym-Jomart Toqaev «Uly aqyn Abaı uldarymen» eskertkishiniń ashylý saltanatyna qatysty, dep habarlaıdy QazAqparat.

QazAqparat Prezıdenttiń saltanatty rásimde sóılegen sóziniń tolyq mátinin nazarlaryńyzǵa usynady.

«Qurmetti qaýym! Ardaqty aǵaıyn! Hakim Abaıdy birtutas ult bolyp ulyqtaý – bizdiń perzenttik paryzymyz.

Uly aqynnyń rýhyna taǵzym etý úshin men osy qasıetti topyraqqa arnaıy keldim.

Qala turǵyndaryn jáne búkil elimizdi Abaı men onyń urpaqtaryna arnalǵan jańa eskertkishtiń ashylýymen shyn júrekten quttyqtaımyn!

Bul – birtýar ǵulama oıshylymyzǵa degen zor qurmettiń belgisi.

Uly Abaı – bizdiń elimizdiń maqtanyshy ǵana emes, álemdik deńgeıdegi kemeńger.

Ol – qazaqtyń jan-dúnıesiniń tuńǵıyǵyna boılaǵan dara tulǵa.

Onyń óleńderi men qara sózderi – ulttyq bolmysymyzdyń aınasy.

Abaı jańa ádebıetimizdiń negizin qalaǵan aqyn retinde el tarıhynda aıryqsha iz qaldyrdy.

Onyń eńbekteri bir ǵasyrdan astam ýaqyt ótse de ózektiligin joǵaltqan emes. Áli kúnge deıin barshamyzǵa rýhanı azyq bolyp keledi.​

Aqynnyń ǵıbratty ǵumyry men mol murasy – halqymyzdyń jáne jahan jurtynyń asyl qazynasy.

Abaıdyń ósıeti – óskeleń urpaqtyń aınymas temirqazyǵy.​ ​

Uly oıshyl jastardy bilim men ǵylymdy ıgerýge, óner men tildi úırenýge, mańdaı termen mal tabýǵa shaqyrdy.

Aqyn aıtqan bes asyl is: «Talap, eńbek, tereń oı, qanaǵat, raqym» – ult úshin aýadaı qajet qasıetter.

Biz damýdy tejeıtin bes dushpannan arylyp, eldik múdde jolynda eńbek etsek qana qoǵamdyq sanany jańǵyrtamyz.

Biz Abaı amanatyna adal bolýymyz kerek. «Jaýapty memleket – jaýapty qoǵam – jaýapty adam» júıesiniń berik ornyǵýy osyǵan baılanysty.​

Ol úshin búgingi býyn Abaı murasynan nár alyp, rýhanı kemeldenýi qajet.

Myna eńseli eskertkish jas urpaqqa taǵylymdy oı salýǵa tıis.

Abaı jáne onyń sózi men isin jalǵaǵan parasatty perzentteri Aqylbaı men Týraǵul – elge úlgi bolǵan tulǵalar.

Munda urpaq sabaqtastyǵy, áke men balanyń syılastyǵy beınelengen.

Bul – Qunanbaı qajy áýletiniń tektiligin tanytatyn týyndy.

Abaı shańyraǵynyń taǵylymy – ult ulaǵatynyń kórinisi.

Jalpy, tálim-tárbıe ult sapasyn qalyptastyratyn basty faktordyń biri bolýy kerek!​ ​

Qurmetti qaýym!

Biz bıyl Abaıdyń 175 jyldyq mereıtoıyn atap ótýge erekshe mán berdik.

Memlekettik jáne halyqaralyq deńgeıde aýqymdy is-sharalar ótkizdik.

Aqyn murasyn nasıhattaýǵa, ulaǵatty sózin jas urpaqtyń sanasyna sińirýge den qoıdyq.

Jıdebaıdaǵy «Abaı-Shákárim» memorıaldyq kesheni jańa talapqa saı jańǵyrtyldy.

Uly aqynnyń rýhyna taǵzym etýge keletin jurtshylyqqa qolaıly jaǵdaı jasaldy.

Bul – oblys ákimi Danıal Ahmetovtiń jáne bir top azamattardyń eńbeginiń nátıjesi.

Biz mereıtoı kezinde ysyrapshyldyq pen dańǵazalyqqa​ jol bergen joqpyz.

Abaı aıtqan «maqtanshaqtyq», «beker mal shashpaqty» tyıýdyń bir joly osy dep sanaımyn.​

Uly oıshyldyń murasy – elimizdiń odan ári ósip-órkendeýine jol ashatyn baǵa jetpes qundylyq.

Abaıdyń asqaq rýhy uly murattarǵa jeteleı bersin!

Shyǵys Qazaqstan halqyna shyn júrekten amanshylyq tileımin».








Joǵary qaraı