Aýa raıy
Astana -6 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

Qatań karantın qaıtalansa, qansha adam jumyssyz qalýy múmkin

2020 jyldyń 9 qazan 2020 19:53

NUR-SULTAN. QazAqparat QR Eńbek jáne halyqty áleýmettik qorǵaý mınıstri Birjan Nurymbetov elimizde qatań karantın engizilse, eńbek naryǵyndaǵy jaǵdaı qandaı bolatynyn sıpattap berdi, dep habarlaıdy QazAqparat tilshisi.

«Epıdemıologııalyq ahýalǵa toqtalsaq, Úkimet elimizde epıdemıologııalyq jaǵdaıdyń turaqtylyǵyn saqtaý úshin barlyq qajetti sharalardy qabyldaýda. Eger indetke qatysty jaǵdaı ýshyǵyp ketse, Úkimet ekonomıkany, bıznesti jáne halyqty qoldaý boıynsha tıisti qadamdardy jasaıdy. Alaıda naqty bir tólemder men somalar jaıynda aıtý erterek», - dedi B. Nurymbetov Ortalyq kommýnıkatsııalar qyzmetinde.

Sonymen qatar ol Eńbek mınıstrligi indetke qatysty aldaǵy bolýy múmkin jaǵdaıǵa tıisti baǵalaý júrgizgenin aıtty.

«Eńbek resýrstaryn damytý ortalyǵymyz jaǵdaıdyń eń nashar degen nusqasyna tıisti baǵalaý júrgizdi. Osy oraıda bizde kóktemde bolǵan qatań karantındik sharalardy eskerip, eńbek naryǵyn zerdeledi. Eger Úkimet osyndaı qatań sharalardy qabyldaýǵa májbúr bolsa, onda 4 mıllıonǵa jýyq adam ózderiniń jumys oryndaryn saqtap qalady», - dedi vedomstvo basshysy.

Bul turǵyda birinshi kezekte qurylys, aýyl sharýashylyǵy, densaýlyq saqtaý salalarynda saqtalady.

«2,5 mıllıon adam qashyqtan jumys isteý rejımine ótedi. Bul joǵary biliktilik mamandaryna qatysty. 2 mıllıonǵa jýyq adamǵa qatysty jumys ýaqytynyń qysqarýy bolýy múmkin. Osy oraıda saýda, kólik, tamaqtandyrý salasyn qamtýy yqtımal. Bizdiń sarapshylardyń esebinshe, qatań karantın engizilse, taǵy 160 myńǵa tarta adam jumystan bosatylyp, jumyssyz qalýy múmkin», - dep túsindirdi mınıstr.


Joǵary qaraı