Aýa raıy
Astana -23 °S
Almaty -10 °S
valıýta baǵamy
USD 421.58
EUR 496.83
RUB 5.53
CNY 62.20

Qazaq ǵalymdary zaǵıp jandardyń kórýine kómektesetin erekshe apparat jasady

2020 jyldyń 18 qazan 2020 10:55

NUR-SULTAN. QazAqparat - «Bolashaq» baǵdarlamasynyń túlekteri Ábdilda Shámenov pen Nurbek Eńsebaev ónertapqysh Ǵalymjan Ǵabdreshovpen birlesip, kózi nashar kóretin jáne zaǵıp jandardy qoldaý maqsatynda «SEZUAL» startapyn iske qosty. Olar top múshelerimen birlese búgingi tańda álemde balamasy joq biregeı qurylǵyny óndiriske engizýmen aınalysyp jatyr, dep habarlaıdy QazAqparat tilshisi.

«Bolashaq» baǵdarlamasynyń arqasynda tehnologııalyq ınnovatsııalar salasyndaǵy eń batyl ıdeıalardy júzege asyrýǵa múmkindik aldym. «SEZUAL» atty jobamyz nashar kóretin jáne zaǵıp jandarǵa osy álemdi kórýge múmkindik beredi», – deıdi Nurbek Eńsebaev.

Onyń aıtýynsha, atalǵan devaısty jappaı qoldanysqa engizý zaǵıp adamdardy jumysqa qabiletti etip, olardyń qoǵam damýyna qandaı da bir úles qosýyna múmkindik beredi.

«SEZUAL» – bul zaǵıp adamdarǵa arnalǵan kómekshi qurylǵy. Ol kózi nashar kóretin jáne zaǵıp jandarǵa basqa adamnyń kómeginsiz júrýge múmkindik beredi.

Qurylǵy belgili bir shertý qımyldarynyń kómegimen qorshaǵan ortadaǵy nysandarmen joǵary ımpýls arqyly baılanys ornatady. Nátıjesinde aınaladaǵy zattardyń pishini, materıaly, olarǵa deıingi qashyqtyq jáne qozǵalys baǵyty týraly aqparat túsedi.

Medalon pishindi qurylǵyny jasap shyǵarýǵa 3 jylǵa jýyq ýaqyt jumsalǵan.

«Tıfloapparatty jasaý – ónertapqysh jáne bizdiń komandanyń ıdeıalyq shabyttandyrýshysy Ǵalymjan Ǵabdreshovtyń ıdeıasy. Alǵashynda devaıs óte aýyr bolǵan edi. Keıin qurylǵy odan ári jetildirilip, fýnktsıonaly keńeıtildi. Apparattyń syrtqy dızaıny Ázerbaıjannan kelgen kózi nashar kóretin jáne zaǵıp balalar delegatsııasynyń ótinishi boıynsha ózgertildi. Balalar apparatqa «Marvel» komıkster serııasynyń keıipkeri Tonı Starktyń júrek pishinin berýdi surady», – deıdi «Bolashaq» baǵdarlamasynyń túlegi.

Devaıstyń aprobatsııasy 2017 jyly bastaldy. Óz kezeginde 20 adam qurylǵyny tekserip kórýge nıet bildirdi.

Apparatty alǵashqylardyń biri bolyp 16 jasynda kórý qabiletinen tolyq aıyrylǵan Almaty qalasynyń turǵyny Jazıra Mólkibekova synap kórdi. Qurylǵynyń arqasynda ol keńistikte ońaı baǵyt alyp, júre alady.

Sóıtip, qurylǵyny qoldana bastaǵannan keıin 5 kún ótken soń J.Mólkibekova velosıpedpen júre bastady.

«SEZUAL» apparaty 30 jyldan astam ýaqyt tıfloqurylǵylarmen jumys istep kele jatqan frantsýzdyq «CECIAA» kompanııasyna tanystyrylǵanyn aıta ketken jón. Nátıjesinde zaǵıp jandarǵa arnalǵan bul qurylǵynyń jańashyldyq ekeni rastalyp, frantsýzdyq sarapshylar tarapynan oń baǵa berildi.

Ónertapqyshtardyń aıtýynsha, eger devaıs Qazaqstanda óndiriletin bolsa, apparatty úıretýmen qosa alǵandaǵy aldyn ala quny shamamen 3000 dollar bolýy múmkin. Al apparat shetelde óndiriletin bolsa, quny aıtarlyqtaı arta túspek.

Ázirleýshiler apparatty jetildire túsý josparymen bólisti.

«Men adamdardyń ómir sapasyn ózgertetin jobalarǵa únemi qyzyǵýshylyq tanytamyn. Bizdiń ujymnyń basty maqsaty – nashar kóretin jáne zaǵıp jandarǵa tolyqqandy ómir súrýge múmkindik berý. Qazir komandamyzda 10 adam bar, apparattardy óndiriske shyǵarý boıynsha memleketpen yntymaqtastyqta jumys isteýge daıynbyz», – dep atap ótti Manchester ýnıversıtetiniń «Innovatsııalar men kásipkerlikti basqarý» magıstratýra baǵdarlamasynyń túlegi Ábdilda Shámenov.

Ábdilda kompanııanyń ınvestıtsııalyq saıasatymen jáne túrli ıýrısdıktsııalarda ónertabysty patentteý máselelerimen aınalysady. Qazaqstandyq devaıs 18 aıǵa jaramdy aldyn ala patentke ıe boldy.

2017 jyly jumys toby Dúnıejúzilik banktiń Ónimdi ınnovatsııalardy yntalandyrý jobasy sheńberinde grant jeńip alyp, Nazarbaev Ýnıversıtetinde akseleratsııa baǵdarlamasynan ótti jáne «Astana Hub» rezıdentsııasynyń arqasynda salyq preferentsııalaryn ıelendi.


Avtor Janat Qapalbaeva
Basty sózder: Áleýmettik qoldaý, Ǵylym,
Joǵary qaraı