Aýa raıy
Astana 14 °S
Almaty 16 °S
valıýta baǵamy
USD 421.58
EUR 496.83
RUB 5.53
CNY 62.20

«Qazaqaltyn» Stepnogorsk kópsalaly aýrýhanasyna qoldaý kórsetti

2020 jyldyń 4 tamyz 2020 15:00

NUR-SULTAN. QazAqparat - «Qazaqaltyn TMK» AQ Stepnogorsk qalasy ortalyq aýrýhanasyna 23 mıllıon teńgege jasandy tynys alý apparatyn satyp alyp, tapsyrdy, dep habarlaıdy QazAqparat tilshisi.

«Qazaqaltyn TMK» AQ baspasóz qyzmetiniń málimetine qaraǵanda, kompanııa 19 mıllıon teńgege 20 ottegi kontsentratoryn satyp alǵan, olar jaqyn arada jetkiziledi. Aýrýhana 65 myńǵa jýyq adam turatyn Stepnogorsk qalasy men jaqyn mańdaǵy aýyldardy medıtsınalyq kómekpen qamtıdy. Koronavırýs indeti taraǵaly mekemede COVID-19 naýqastaryna kómek kórsetetin bólim ashylyp, onda 500-ge jýyq jergilikti turǵyn emdeldi. Tapsyrylǵan jabdyqtar koronavırýs pen pnevmonııanyń asqynǵan túrimen aýyratyn naýqastar úshin asa qajet.

«Bul biz úshin óte mańyzdy qoldaý, óıtkeni bul jabdyqtar kez kelgen ýaqytta naýqastyń ómirin saqtap qala alady. Qazirgi vırýs tarap jatqan kezde bizdiń aýrýhanaǵa júkteme artty, tynys alý jetispeýshiligi bar naýqastar jıi túsedi, biz olardy osy qurylǵylarǵa qosamyz, - dedi Stepnogorsk qalalyq kópsalaly aýrýhanasynyń bas dárigeri Olga Iýkova.

Óz kezeginde «Qazaqaltyn TMK» AQ bas dırektory Balamır Mahanov dárigerlerge jáne barlyq medıtsına qyzmetkerlerine kásibı sheberligi men janqııarlyq jumysy úshin alǵys bildirip, «Qazaqaltyn» aldaǵy ýaqytta da indetpen kúresýde halyq pen medıtsınalyq mekemelerge qoldaý kórsetýdi jalǵastyratynyn atap ótti.

«Osy qıyn kezeńde biz shette qala almadyq jáne kontsernimizdiń ujymy atynan otandastarymyzǵa kómektesýdi uıǵardyq», - dedi B. Mahanov.

Tamyzdyń aıaǵyna deıin Shortandy aýdandyq aýrýhanasy da «Qazaqaltynnan» dál osyndaı jasandy tynys alý aparaty men 10 ottegi kontsentratoryn alady. Kompanııa bul medıtsınalyq jabdyqtardy satyp alýǵa 35 mıllıon teńgege jýyq qarjy bóldi. Taǵy 6,5 mıllıon teńge kontsern kásiporyndarynyń jumysshylaryn qajetti dári-dármekpen qamtamasyz etýge jumsaldy.


Basty sózder: Qoǵam, Medıtsına,
Joǵary qaraı