Aýa raıy
Astana -16 °S
Almaty -3 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstan halqy Assambleıasy qazaqstandyqtarǵa Úndeý joldady

2020 jyldyń 23 qazan 2020 14:38

ALMATY. QazAqparat – Qazaqstan halqy Assambleıasy qazaq tilin meńgerý jónindegi birinshi kongresiniń qatysýshylary úndeý joldady, dep habarlaıdy QazAqparat tilshisi.

Biz, Qazaqstan halqy Assambleıasynyń Qazaq tilin meńgerý jónindegi birinshi kongresine qatysýshylar, Qazaqstan Prezıdenti Qasym-Jomart Toqaevtyń memlekettik tildiń rólin kúsheıtý jáne ony etnosaralyq qatynas tiline aınaldyrý týraly tapsyrmasyn tolyq qoldaıtynymyz jóninde jáne ony júzege asyrý boıynsha ınklıýzıvti jumys qajettiligi týraly málimdeımiz.

Biz Elbasy Nursultan Nazarbaevtyń «Qazaq halqy men memlekettik til – damyp kele jatqan qazaqstandyq azamattyq qoǵamdy biriktirýshi ıadro retinde yqpal etetin bolady»,– degen ustanymyn negizge alamyz.

Qazaqstandaǵy áleýmettik-demografııalyq ózgeristerdi, qazaq halqynyń sany óskenin, halyqty odan ári biriktirý jáne shoǵyrlandyrý qajettiligin eskere otyryp, biz memlekettik tildiń joǵary róli bolashaqta da arta túsetinin atap ótemiz.

Birinshiden, memlekettik til qýatty toptastyrýshy faktorǵa aınalýy tıis. Memlekettik til – Otan uǵymyn bildiretin Memlekettik tý, Eltańba, Gımn sııaqty qasterli sımvol.Ol elimizdiń barsha azamattaryn biriktirýge shaqyrady.

Ekinshiden, memlekettik tildi meńgerý adamdardyń birin-biri til bilmegeni úshin kemsitýine jol bermeıdi.

Úshinshiden, memlekettik til – bul árbir azamattyń elimizdiń qoǵamdyq-saıası ómirine belsendi ári tolyqqandy qatysýynyń kepili, onyń básekege qabilettiliginiń faktory.

Tórtinshiden, memlekettik til – elimizdiń árbir azamatynyń ishki biregeıliginiń, qazaqstandyq patrıotızmniń, azamattyq sananyń ajyramas elementi.

Besinshiden, memlekettik til qoǵamdyq sanany jańǵyrtýdyń, Elbasynyń «Rýhanı jańǵyrý» baǵdarlamasynyń jetekshi baǵyttarynyń biri, al onyń latyn grafıkasyna kóshirilýi jalpyulttyq sananyń jańa elementi.Bul qarapaıym aqıqat Qazaqstannyń árbir azamatynyń sanaly azamattyq tańdaýy bolýy tıis.





Memlekettik tildiń rólin arttyrý jónindegi jumys keń aýqymdy jáne san qyrly sıpatta bolýy tıis. Bul máselede jaýapkershilikti tek memleketke ǵana júkteýge bolmaıdy.

Azamattyq qoǵam, ǵylymı jáne shyǵarmashyl zııaly qaýym osy ıdeıany is júzinde júzege asyrýǵa ózderiniń qomaqty úlesin qosýy tıis.

Biz memlekettik qyzmette, qoǵamdyq, ǵylymı, saıası jáne mádenı is-sharalar ótkizý kezinde memlekettik tildiń mártebesin kóterý boıynsha sharalar qabyldaýǵa shaqyramyz.

Biz qazaq tilin jetik meńgergen etnostar ókilderin qoldaý men kótermeleýdiń tıimdi júıesin qalyptastyryp, olardyń qazaq tilin etnosaralyq qatynas tili deńgeıine kóterý jónindegi mıssııasyna járdemdesýimiz kerek.

Biz qazaq tilinde sóıleýge umtylatyndardy qoldaýda shydamdy, birizdi jáne tabandy bolýymyz kerek.

Biz halyqtyń barlyq sanattary úshin qazaq tili álemine tereń boılaýdyń túrli formalaryn engizýimiz kerek. Bul teledıdar men radıo baǵdarlamalarynyń mazmunyna, áleýmettik jelilerdiń kontentine, kórneki aqparatqa, kúndelikti qarym-qatynasqa qatysty.

Biz bilim berý júıesin onyń basty mıssııasyna qol jetkizýde barynsha qoldaýymyz qajet, ıaǵnı mektep bitirgen árbir oqýshy memlekettik tildi fýnktsıonaldyq saýattylyq deńgeıinde meńgerýi tıis. Sondyqtan biz Til saıasaty komıtetiniń Bilim jáne ǵylym mınıstrligine berilýin quptaımyz.

Biz elimizde bul máseleni saıasattandyrýǵa, azamattarǵa zańsyz qysym kórsetýge jol bermeýge shaqyramyz. Memlekettik til árbir azamattyń sanaly tańdaýy bolýy tıis.

Biz qazaq zııalylaryn Qazaqstan halqy Assambleıasynyń memlekettik tildi nasıhattaý jónindegi qyzmetin ilgeriletýge, onyń osy baǵyttaǵy jobalaryn – «Danalyq álippesi» jáne «Abaı» ınteraktıvti keshenderin engizýge, «Qazaqtaný» jáne «Myń bala» respýblıkalyq mádenı-aǵartý jobasy, «Mámile» qazaq tili klýbtary jáne t.b. jobalardy iske asyrýǵa atsalysyp, bilimi men jeke tájirıbesi arqyly qoldaý kórsetýge shaqyramyz.

Bizdiń elimizde memlekettik tildi ultaralyq qatynas tiline aınaldyrý úshin qajettiniń bári bar ekenine senimdimiz, al izgi nıet, tabandylyq, eńbek pen qajyrlylyq bizge Elbasy N.Á. Nazarbaevtyń «Qazaqstannyń bolashaǵy – qazaq tilinde»,– degen ulaǵatty sózderin iske asyrýǵa múmkindik beredi.


Joǵary qaraı