Aýa raıy
Astana -22 °S
Almaty -1 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstan halqy Assambleıasy memlekettik tildi úıretetin ádistemeni ázirleýge atsalysady

2020 jyldyń 27 qarasha 2020 13:01

NUR-SULTAN. QazAqparat – Bilim salasynda da, azamattyq ortada da memlekettik tildi úıretetin ǵylymı turǵyda negizdelgen ádisteme kerek. QHA tóraǵasynyń orynbasary Janseıit Túımebaev Elbasynyń osy sharýaǵa QHA Ǵylymı-sarapshy keńesi atsalysýy kerektigin málim etti, dep habarlaıdy QazAqparat tilshisi.

«HHІ ǵasyr adamzat úshin altyn ǵasyr bola almady. Halyqaralyq sarapshylar aldaǵy bolashaqta jańa jahandyq daǵdarystyń týyndaıtyny týraly kóbirek aıta bastady. Bul daǵdarysty koronavırýs pandemııasynyń tipti údedetin túri bar. Ekonomıkalyq qıyndyqtar álbette saıası, áleýmettik, etnıkalyq jáne dinı problemalardy da qozǵaıtyny sózsiz. Qurlyqtardyń bárinde qaqtyǵys kóbeıip ketti. Olardyń qaı-qaısy da jahandyq sıpatqa ıe bolyp ketýi múmkin. Ekonomıkalyq daǵdarys pen pandemııanyń saldary áleýmettik problemalardy ýshyqtyryp, ultaralyq qarym-qatynasqa da salqynyn tıgizýi ábden yqtımal», - dedi Janseıit Túımebaev QHA Ǵylymı-sarapshy keńesiniń keńeıtilgen otyrysynda.

Onyń aıtýynsha bul rette Qazaqstandaǵy da birqatar jaǵdaı etnosaralyq saıasatqa jan-jaqty taldaý kerektigin kórsetip bergen.

«Jańa ádistemeler men amaldar kerek. Árıne, Qazaqstan halqy Assambleıasy 25 jyldyń ishinde orasan zor jumysty atqardy. Ultaralyq qarym-qatynas salasynda memlekettik saıasat júrgizetin ýákiletti organ – Aqparat jáne qoǵamdyq damý mınıstrligine qarasty ultaralyq qarym-qatynasty nyǵaıtý komıteti quryldy. Onyń janynda sonymen qatar tuńǵysh ret qurylǵan qoldanbaly etnosaıası zertteýlerdi júrgizý ortalyǵy jumysyn bastady. Odan bólek Qoǵamdyq kelisim birlestiginiń de jumysy qyzý», - dedi ol.

Janseıit Túımebaev ultaralyq qarym-qatynas bilim, mádenıet, til saıasaty salasyndaǵy kóptegen jumysty júrgizýge tikeleı baılanysty ekenin jetkizdi. Sondaı-aq ol Elbasy assambleıa keńesinde jańa ınklıýzıvti saıasatqa suranys baryn málim etkenin eske saldy.

«Memlekettik til biriktirýshi faktorǵa aınalýǵa tıis. Ol elimizdiń birligin bekemdeı túsedi. Bizge bilim salasynda da, azamattyq ortada da memlekettik tildi úıretetin ǵylymı turǵyda negizdelgen ádistemesi kerek. Elbasy bul turǵyda tapsyrma berdi. QHA Ǵylymı-sarapshylyq keńesi bul jumysqa óz úlesin qosýy tıis», - dedi ol.


Joǵary qaraı