Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Qazaqstan halqynyń 50 paıyzdan astamy – 30 jasqa tolmaǵan jastar - sarapshy

2022 jyldyń 17 mamyr 2022 17:11

NUR-SULTAN. QazAqparat – Qazaqstandyqtardyń 50 paıyzdan astamy jastar sanatyna jatady. Aldaǵy referendým kezinde olardyń pikiri mańyzdy. Osy oraıda QR Prezıdentiniń janyndaǵy Qazaqstan strategııalyq zertteýler ınstıtýtynyń saıası reformalardy zertteý bóliminiń meńgerýshisi Ermek Toqtarov jastardy aıtýly sharaǵa belsene qatysýǵa shaqyrady, dep habarlaıdy QazAqparat tilshisi.

«5 maýsymda ótetin referendým elimizdiń bolashaǵyna qatysty. Al bolashaq qazirgi jastardyń qolynda. Qazaqstan halqynyń 51 paıyzy - 30 jasqa tolmaǵan azamattar. Osyǵan oraı elimizde júrgizilip jatqan jáne júzege asatyn reformalardy qabyldaýda jastardyń pikiri mańyzdy. Jalpy elimizdegi qazirgi jastardyń deni saıasattan aýlaqtaý. Sol sııaqty jastar búginde kez kelgen jaıt boıynsha oı-pikirin ashyq ári erkin jetkize alady. Memleket basshysy jastar saıasatyna, ıaǵnı olardyń el ómirine aralasýyna erekshe mán berip otyr. Oǵan dálel - Prezıdent jastar kadr rezevri jobasynyń iske asýy», - dedi Ermek Toqtarov ortalyq kommýnıkatsııalar qyzmeti alańynda sarapshylardyń qatysýymen ótken dóńgelek ústelde.

Saıasattanýshynyń pikirinshe, otandyq jastar referendýmǵa qatysý týraly sheshimin oı súzgisinen ótkizip baryp qabyldaǵany jón.

«Jastar erkindikti qalaıdy. Ol saıasat nemese basqa salaǵa qatysty bolýy múmkin. Osy oraıda Qazaqstanǵa saıası ózgerister men transformatsııa qajet degen jastar referendýmǵa qatysyp, tańdaý jasaı alady. Sondyqtan da 5 maýsym kúni jastar qaýymyn tarıhı sharada kútemiz. Jastarǵa ótinish, referendýmǵa jaı ǵana qatysý úshin emes, elimniń bolashaqtaǵy saıası damýyna úlesimdi qosamyn degen nıetpen kelse eken», - deıdi ol.

Buǵan deıin habarlaǵanymyzdaı saýalnama nátıjesinde qazaqstandyqtardyń 66,4 paıyzy referendýmǵa qatysatyny belgili boldy.


Avtor Álı Ibraev
Basty sózder: Referendým, Jastar, Saıası reforma,
Joǵary qaraı