Aýa raıy
Astana -18 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstan men Qyrǵyzstan prezıdentteri birlesken málimdeme jasady

2021 jyldyń 2 naýryz 2021 14:25

NUR-SULTAN. QazAqparat - 2021 jylǵy 2-3 naýryzda Qazaqstan Respýblıkasynyń Prezıdenti Qasym-Jomart Toqaevtyń shaqyrýymen Qyrǵyz Respýblıkasynyń Prezıdenti Sadyr Japarov Qazaqstan Respýblıkasynda memlekettik saparmen boldy.

Bul týraly QazAqparat Aqrdanyń resmı saıtyna silteme jasap habarlaıdy.

Dostyq pen senim sıpatynda ótken kelissózder barysynda memleket basshylary strategııalyq áriptestik pen odaqtastyqty odan ári nyǵaıtý keleshegin talqylady, sondaı-aq, óńirlik jáne halyqaralyq kún tártibindegi ózekti máseleler jóninde pikir almasty.

Prezıdentter Qazaqstan Respýblıkasy men Qyrǵyz Respýblıkasynyń baýyrlastyq jáne tatý kórshilik qarym-qatynastaryn damytý men nyǵaıtýdaǵy Qazaqstan Respýblıkasynyń Tuńǵysh Prezıdenti – Elbasy Nursultan Ábishuly Nazarbaevtyń atqarǵan tarıhı rólin, sondaı-aq, onyń Ortalyq Azııadaǵy óńirlik kooperatsııany damytýǵa qosqan orasan zor úlesin aıryqsha atap ótti.


Memleket basshylary ǵasyrlar boıy dostyq, tatý kórshilik jáne baýyrlas halyqtardyń ózara rýhanı baılanystaryna negizdelgen saıası, saýda-ekonomıkalyq jáne mádenı-gýmanıtarlyq salalardaǵy qazaq-qyrǵyz qarym-qatynastarynyń oń qarqyn alýyna qanaǵattanatyndaryn atap ótip, sondaı-aq, 1997 jylǵy 8 sáýirdegi Qazaqstan Respýblıkasy men Qyrǵyz Respýblıkasy arasyndaǵy Máńgilik dostyq týraly sharttyń jáne 2003 jylǵy 25 jeltoqsandaǵy Qazaqstan Respýblıkasy men Qyrǵyz Respýblıkasy arasyndaǵy Odaqtastyq qarym-qatynastar týraly sharttyń erejelerin basshylyqqa ala otyryp, tómendegini málimdeıdi:

Teńdik, ózara senim, syılastyq jáne bir-biriniń múddelerin eskerý negizinde dostyq, strategııalyq áriptestik jáne odaqtastyqtyń qazaq-qyrǵyz qarym-qatynastaryn keshendi nyǵaıtý jolyndaǵy baǵdarynyń myzǵymastyǵyn rastaıdy.

Buryn qol jetkizilgen, onyń ishinde, Qazaqstan Respýblıkasynyń Prezıdenti Qasym-Jomart Toqaevtyń 2019 jylǵy 27 qarashada Qyrǵyz Respýblıkasyna jasaǵan memlekettik saparynyń qorytyndylary boıynsha ýaǵdalastyqtardy birlese júzege asyrý mańyzdylyǵyn atap ótedi.

Qos memleket arasyndaǵy qarym-qatynastardyń qarqyndy damýy úshin belsendi saıası dıalogtyń mańyzdylyǵyn moıyndaı otyryp, bıik, joǵary jáne basqa deńgeılerdegi senimdi de syndarly dánekerliktiń odan ári óristeýin quptaıdy.

Pandemııanyń jalǵasýy jaǵdaıynda koronavırýs ınfektsııasyna qarsy birlesken is-qımyldy jandandyrý mańyzdylyǵyn atap ótti. Osy turǵydan qyrǵyz tarapy Qazaqstan Respýblıkasynyń járdemi men kómek kórsetýge ázirligi, sonyń ishinde, gýmanıtarlyq sıpattaǵy qoldaýy úshin rızashylyq bildirdi.

Epıdemıologııalyq talaptardy saqtaý qajettigin moıyndaı otyryp, taraptar memleketterdiń aýmaǵy arqyly azamattardyń jáne kólik quraldarynyń tranzıti men erkin qozǵalysy úshin kelisilgen sharalardy qabyldaý mańyzdylyǵyn atap ótedi.

Saýda-ekonomıkalyq yntymaqtastyq salasyndaǵy ekijaqty qarym-qatynastardy odan ári keńeıtýdi, taýarlar men qyzmetter boıynsha ózara saýda qurylymyn ósirý men ony ártaraptandyrýdy qamtamasyz etýdiń erekshe mándi ekenin rastaıdy.

Ónerkásip, gıdroenergetıka, otyn-energetıkalyq keshen, jer qoınaýyn paıdalaný, aýyl sharýashylyǵy, óńdeý sektory, logıstıka salasynda,
jol-kólik ınfraqurylymy men bank salasyndaǵy kooperatsııalyq jobalardy iske asyrýǵa baǵyttalǵan iskerlik baılanystardy jan-jaqty keńeıtý qajettigin atap kórsetedi.

Investıtsııalyq ózara yqpaldastyqty odan ári damytý, ınvestıtsııalardy tartýǵa qolaıly jaǵdaılar jasaý jáne olardy memlekettik deńgeıde qorǵaý mańyzdylyǵyn atap ótedi. Taraptar ınvestıtsııalardy jan-jaqty qoldaý tetikterin jetildirý boıynsha sharalar qabyldaýǵa shynaıy nıetti ekenin bildiredi.

Qyrǵyz Respýblıkasy EAEO-daǵy Qazaqstan Respýblıkasy tóraǵalyǵynyń basymdyqtaryna qoldaý bildiredi. Osy turǵydan Taraptar eýrazııalyq ekonomıkalyq ıntegratsııa, sonyń ishinde, tosqaýylsyz, alyp tastaýlar men shekteýlersiz, taýarlar, kórsetiletin qyzmetter, kapıtal jáne ortaq eńbek naryqtarynyń áleýetin tolyqtaı ashyp kórsetýge baǵyttalǵan sharalardy ázirleýde sanıtarlyq, veterınarlyq jáne fıtosanıtarlyq sharalar boıynsha ózara yqpaldastyqty nyǵaıtý, ónerkásiptik keshenderdiń básekege qabilettiligin arttyrý jáne basqa da baǵyttarda ortaq ádistemelerdi qalyptastyrý mańyzdylyǵyn atap ótedi.

Memleketterdiń kólik-tranzıttik áleýetterin odan ári damytý,
sondaı-aq, tsıfrlandyrý jáne aqparatpen almasý, onyń ishinde, memlekettik qyzmet kórsetý salalarynda birlesken jobalardy iske asyrý múmkindikterin talqylady.

Taraptar shekara mańy yntymaqtastyǵynyń áleýetin ashyp kórsetý maqsatynda Birinshi Óńiraralyq qazaq-qyrǵyz forýmyn ótkizýge múddeli ekenin rastaıdy.

Ortaq ekonomıkalyq keńistik jaǵdaıynda taýarlardyń Qazaqstan men Qyrǵyzstan aýmaqtary arqyly bógetsiz ótýin qamtamasyz etý úshin qazaq-qyrǵyz memlekettik shekarasynda logıstıkalyq ortalyq qurýdy tezdetý boıynsha Úkimetterge tıisti tapsyrma berildi.

Ortalyq Azııa elderiniń ekologııalyq jáne energetıkalyq qaýipsizdigi boıynsha syndarly yntymaqtastyqqa jáne strategııalyq áriptestik, senim, tatý kórshilik, teńdik jáne bir-biriniń múddelerin eskerý negizinde sý-energetıka resýrstaryn keshendi paıdalanýǵa ózara qyzyǵýshylyq bildiredi.

Óńirlik kooperatsııanyń ózekti máseleleri boıynsha ustanymdardyń uqsastyǵyn jáne Ortalyq Azııadaǵy senimdi, turaqtylyq pen qaýipsizdikti nyǵaıtýǵa járdemdesýge umtylystaryn rastaıdy.

Óńirishilik yntymaqtastyqtyń barlyq salalarynda besjaqty ózara yqpaldastyqty jandandyrý úshin qolaıly jaǵdaı týdyratyn Ortalyq Azııa memleketteri basshylarynyń Konsýltatıvtik kezdesýleri formatyn odan ári damytýdyń basym mánge ıe ekendigin erekshe atap kórsetedi. 2021 jyly Ortalyq Azııa memleketteri basshylarynyń kezekti Konsýltatıvtik kezdesýin Qyrǵyz Respýblıkasynda epıdemıologııalyq jaǵdaı turaqtalǵannan keıin ótkizýdiń mańyzdylyǵyn atap ótti.

Taraptar BUU, EQYU, TMD, EAEO, ShYU, UQShU, TMYK, IYU jáne basqa da halyqaralyq uıymdar sheńberinde syndarly dıalogty jalǵastyrý qajettiligi týraly ortaq pikir bildiredi.

Azııadaǵy ózara is-qımyl jáne senim sharalary jónindegi Keńestiń (AÓSShK) áleýetin damytýǵa, sonyń ishinde, ony tolyqqandy halyqaralyq uıymǵa aınaldyrýǵa nıetti ekenderin bildirip, qos memleket úılestirýshileri bolyp tabylatyn AÓSShK Adamı ólshemin damytýǵa kelisti.

Ortalyq Azııa memleketteri ekonomıkalarynyń neǵurlym turaqty damýyna yqpal etetin, 2021 jyly Qyrǵyz Respýblıkasynda ótkizilýi josparlanǵan Eýropalyq Odaq – Ortalyq Azııa birinshi ekonomıkalyq forýmnyń eleýligin atap kórsetedi.

Halyqaralyq terrorızmge, ekstremızmge, esirtkiniń zańsyz aınalymyna, transulttyq uıymdasqan qylmysqa, halyqaralyq qaýipsizdikke tónetin basqa da syn-tegeýrinder men qaterlerge qarsy kúres máselelerinde ekijaqty jáne kópjaqty deńgeıdegi birlesken kúsh-jiger arttyrýdyń mańyzdylyǵyna nazar aýdarady.

Qos halyqtyń mádenı-tarıhı jáne tildik ortaqtyǵyn eskerip, ǵylym, bilim berý, densaýlyq saqtaý, mádenıet, týrızm, sport jáne basqa da salalardaǵy yntymaqtastyqty odan ári damytýǵa beıildiligin rastaıdy. Taraptar birlesken bilim berý jáne ǵylymı-tehnıkalyq baǵdarlamalardy iske asyrýdy jalǵastyrýǵa nıetti.

Qazaqstan Respýblıkasy men Qyrǵyz Respýblıkasynyń Táýelsizdikteriniń 30 jyldyǵyn merekeleýge oraılastyrylǵan aldaǵy mereıtoı is-sharalarynyń mańyzdylyǵyn atap ótedi.

Birlesken televızııalyq jobalar, kórmeler, festıvalder jáne ózge de mádenı is-sharalar ótkizý turǵysynan járdem kórsetýge, ortaq tarıhı jáne mádenı murany saqtaý men ilgeriletý maqsatynda kúsh-jiger biriktirýge ázirligin bildiredi.

Jýyq arada Abaı Qunanbaevtyń Bishkekte, sondaı-aq, Manas pen Shyńǵys Aıtmatovtyń Nur-Sultanda eskertkishterin ornatý týraly ýaǵdalastyqtardyń erekshe mánge ıe ekenin aıryqsha belgilep ótedi.

Taraptar tabysty kelissózder men sapar barysynda qol qoıylǵan ekijaqty qujattar Qazaqstan Respýblıkasy men Qyrǵyz Respýblıkasy arasyndaǵy dostyq jáne odaqtastyq qatynastardy odan ári nyǵaıtýǵa yqpal etetinin, sondaı-aq, qol jetkizilgen ýaǵdalastyqtardy oıdaǵydaı iske asyrýǵa erekshe mán beredi.

Qyrǵyz Respýblıkasynyń Prezıdenti Sadyr Japarov qonaqjaılyq kórsetkeni úshin Qazaqstan Respýblıkasynyń Prezıdenti Qasym-Jomart Toqaevqa jáne barsha qazaq halqyna rızashylyǵyn bildirdi jáne jan-jaqty yntymaqtastyqty odan ári damytý maqsatynda Qazaqstan basshysyn ózine yńǵaıly ýaqytta saparmen Qyrǵyz Respýblıkasyna kelýge shaqyrdy.

Qazaqstan Respýblıkasynyń Prezıdenti Qasym-Jomart Toqaev shaqyrýdy rızashylyqpen qabyl aldy. Sapardyń merzimderi dıplomatııalyq arnalar arqyly kelisiletin bolady.

Aıta keteıik, osyǵan deıin Aqorda rezıdentsııasynda Qyrǵyz Prezıdenti Sadyr Japarovty saltanatty qarsy alý rásimi ótti.

Osy sapar qarsańynda Qyrǵyz basshysy «QazAqparat» HAA» AQ Basqarma tóraǵasy Asqar Ýmarovqa eksklıýzıv suhbat bergen bolatyn.
Joǵary qaraı