Aýa raıy
Astana -18 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstan men Túrkııa arasyndaǵy dıplomatııalyq qatynastarǵa 29 jyl toldy

2021 jyldyń 3 naýryz 2021 09:16

NUR-SULTAN. QazAqparat – Kúni keshe Qazaqstan men Túrkııa arasyndaǵy dıplomatııalyq qatynastarǵa 29 jyl toldy. Este bolsa, 1992 jyldyń 2 naýryzynda eki el arasyndaǵy dıplomatııalyq baılanystar ornaǵan bolatyn, dep habarlaıdy QazAqparat tilshisi.

Sol jyldyń 21 sáýirinde Túrkııanyń Qazaqstandaǵy dıplomatııalyq korpýsynyń basshysy bolyp taǵaıyndalǵan alǵashqy elshisi Argýn Ózpaı senim gramotasyn tabystady. Osylaısha, Túrkııa elshiligi Qazaqstan tarıhyndaǵy alǵashqy sheteldik dıplomatııalyq mıssııa boldy.

Eki eldiń dıplomatııalyq qatynastarynyń 29 jyldyq tarıhynda joǵary deńgeıdegi saparlar da jıi boldy. Atap aıtar bolsaq, QR Tuńǵysh Prezıdenti – Elbasy Nursultan Nazarbaev alǵashqy resmı saparyn Túrkııaǵa jasady jáne elimizdi Ankaradaǵy Elshiligin saltanatty túrde ashty. Al túrik tarapynan Túrkııa Premer-mınıstri Súleıman Demırel Premer-Mınıstr deńgeıinde Qazaqstanǵa alǵashqy resmı saparymen keldi. Odan keıin 1993 jyldyń sáýirinde sol kezeńdegi Túrkııa Respýblıkasynyń prezıdenti Týrgýt Ózal Qazaqstanǵa memleket basshysy deńgeıindegi alǵashqy resmı saparmyn jasady.

2009 jyldyń qazanynda Túrkııaǵa Elbasy Nursultan Nazarbaevtyń resmı sapary barysynda eki el arasynda «Strategııalyq áriptestik týraly kelisimge» qol qoıylsa, 2012 jyldyń mamyrynda sol kezdegi Túrkııa Premer-Mınıstri Rejep Taıyp Erdoǵannyń Qazaqstanǵa sapary aıasynda «Jańa sınergııa - birlesken ekonomıkalyq baǵdarlamanyń is-qımyl jospary» rásimdeldi. Munan bólek, sol jyldyń qazan aıynda Qazaqstannyń Tuńǵysh Prezıdenti - Elbasy Nursultan Nazarbaevtyń Túrkııaǵa resmı sapary kezinde eki el arasyndaǵy «Joǵary deńgeıdegi strategııalyq yntymaqtastyq keńesiniń» alǵashqy otyrysy ótti.

Búginde Túrkııa men Qazaqstan arasyndaǵy qarym-qatynastar saýda, ınvestıtsııa, mádenıet, týrızm, medıtsına, bilim berý jáne áskerı syndy keń aýqymdy salalarda ózara tıimdilik qaǵıdasymen damyp keledi. Ekijaqty qarym-qatynastardan bólek, kópjaqty platformalarda da eki baýyrlas el únemi úılesimdilik pen yntymaqtastyqta áreket etedi. Túrki Keńesi, Islam yntymaqtastyq uıymy, Ekonomıkalyq yntymaqtastyq uıymy jáne Azııadaǵy qaýipsizdik pen turaqtylyqty kúsheıtýge arnalǵan mańyzdy platforma - AÓSShK sııaqty uıymdar aıasynda de tyǵyz baılanysta.


Joǵary qaraı