Aýa raıy
Astana -11 °S
Almaty -3 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstan men Túrkııa áskerı salada 2 hattama daıyndap jatyr

2020 jyldyń 26 qazan 2020 14:55

NUR-SULTAN. QazAqparat – Qazaqstan men Túrkııa Qorǵanys mınıstrlikteri áskerı tarıf jáne málimetter almasý salalarynda eki hattama daıyndap jatyr. Bul týraly QR Qorǵanys mınıstri Nurlan Ermekbaev aıtty, dep habarlaıdy QazAqparat tilshisi.

«Búgin Túrkııa Qorǵanys mınıstri Hýlýsı Akar qorǵanys vedomstvosynyń basshysy retinde Qazaqstanǵa alǵash ret resmı saparmen kelip otyr. Ózderińiz biletindeı, Túrkııa bizdiń strategııalyq áriptesimiz sanalady. Bizdiń strategııalyq áriptestiktiń berik negizin eń aldymen eki memleket basshylarynyń óte jaqyn, senimdi ári dostyq qarym-qatynasy qalap otyr. 2018 jylǵy qyrkúıekte QR Tuńǵysh Prezıdenti – Elbasy Nursultan Nazarbaevtyń Túrkııaǵa resmı sapary barysynda mańyzdy qujattarǵa qol qoıyldy. Ol - áskerı yntymaqtastyq jónindegi kelisim jáne qupııa málimetterdi saqtaý jónindegi kelisim. Al endi quqyqtyq bazany nyǵaıtý baǵytynda áskerı tarıf jáne málimetter almasý salalarynda taǵy eki hattama daıyndalyp jatyr», - dedi Nurlan Ermekbaev túrik áriptesimen kezdesýden keıingi brıfıngte.

QR Qorǵanys mınıstri, túrik áriptesimen júzdesý barysyna eki eldiń arasyndaǵy yntymaqtastyqtyń basym baǵyttary aıqyndalǵanyn aıtty.

«Onyń ishinde eń aldymen birlesken oqý-jattyǵý, birlesken áskerı jáne jaýyngerlik daıarlyq, ekinshiden, áskerı bilim berý máselesi bar. Atap aıtqanda, Túrkııa bizge tapshy mamandyqtar boıynsha áskerı qyzmetshilerdi, mamandardy daıyndaıdy. Onyń ishinde gıdrografııa, áskerı teńiz salasynda jáne kıberqaýipsizdik salasynda óte mańyzdy joǵary deńgeıdegi mamandardy daıyndap beredi. Biz óz tarapymyzdan byltyr alǵash ret Ulttyq qorǵanys ýnıversıtetimizde bir top túrik áskerı qyzmetshini daıyndadyq. Mundaı ózara tıimdi, paıdaly yntymaqtastyqty damytatyn bolamyz. Odan basqa kelesi jylǵy jalpy josparlardy da talqyladyq jáne áskerı tehnıkalyq saladaǵy basty basymdyqtar men baǵyttar boıynsha ózara pikir almastyq. Al naqty kelissóz bizdiń Indýstrııa jáne ınfraqurylymdyq damý mınıstrligimen júrgiziledi», - dedi ol.




Túrkııa Qorǵanys mınıstri de kezdesý barysynda taraptardyń eki el arasyndaǵy áskerı-tehnıkalyq yntymaqtastyqty odan ary keńeıtý qajettiligine keliskenin aıtty.

«Biz eki eldiń arasynda qorǵanys salasyndaǵy yntymaqtastyqty odan ary keńeıtýge qatysty máselelerdi talqyladyq. Prezıdentter deńgeıinde elderimizdiń arasynda tyǵyz dıalog pen yntymaqtastyq ornaǵandyqtan jumysymyz barynsha jeńil boldy. Biz qol jetkizilgen ýaǵdalastyqtarǵa qatysty máselelerdi talqyladyq», - dedi Hýlýsı Akar.





Joǵary qaraı