Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstan Prezıdenti Belgııanyń Premer-Mınıstrimen kelissóz júrgizdi

2021 jyldyń 26 qarasha 2021 00:53

BRıÝSSELЬ. QazAqparat – QR Prezıdenti Qasym-Jomart Toqaev Brıýsselge resmı sapary aıasynda Belgııanyń Premer-Mınıstri Aleksandr De Kroomen kelissóz júrgizdi, dep habarlaıdy QazAqparat Aqordaǵa silteme jasap.

Kezdesý barysynda taraptar saıası, saýda-ekonomıkalyq, ınvestıtsııalyq jáne gýmanıtarlyq salalar boıynsha Qazaqstan men Belgııa arasyndaǵy qarym-qatynastardyń damý perspektıvalaryn jan-jaqty qarastyrdy. Sondaı-aq olar halyqaralyq jáne aımaqtyq kún tártibindegi ózekti máseleler jóninde pikir almasyp, halyqaralyq uıymdar aıasyndaǵy ózara is-qımyldardy talqylady.

Qasym-Jomart Toqaev Prezıdent bolyp saılanǵaly Belgııaǵa alǵash ret resmı saparmen kelip otyrǵanyn aıtty.

Memleket basshysy Qazaqstannyń Belgııany Eýropalyq Odaqtaǵy saıası jáne ekonomıkalyq turǵydan mańyzdy seriktes sanaıtynyn jetkizdi.

Kezdesý barysynda taraptar saýda-ekonomıkalyq jáne ınvestıtsııalyq yntymaqtastyqty nyǵaıtýǵa erekshe nazar aýdardy. Memleket basshysynyń aıtýynsha, Belgııa – elimizdiń ekonomıkasyna ınvestıtsııa salý jóninen altynshy oryndaǵy memleket. 2005 jyldan beri Belgııa ınvestıtsııasynyń jalpy mólsheri 9,3 mıllıard AQSh dollaryna jetti. Pandemııaǵa qaramastan, ózara saýda kólemi 13 paıyzǵa ósip, 300 mıllıon dollardan asty. Qazaqstanda belgııalyq kapıtaldyń qatysýymen 65 zańdy tulǵa, fılıaldar men ókildikter jumys isteıdi.

Ekonomıkalyq baılanystardy jandandyrý maqsatymen Saýda-ekonomıkalyq yntymaqtastyq jóninde úkimetaralyq komıssııa qurý týraly ýaǵdalastyqqa qol jetkizildi.

Sonymen qatar taraptar koronavırýs pandemııasyna qarsy kúres boıynsha yqpaldastyq ornatý máselesin qarastyrdy. Memleket basshysy Belgııanyń Premer-Mınıstrine qazaqstandyq QazVac vaktsınasynyń jasalǵany týraly aıtty. Qasym-Jomart Toqaev belgııalyq bıofarmatsevtıka salasynyń damý deńgeıin joǵary baǵalap, QazBioPharm ulttyq holdıngi men jaqynda qurylǵan belgııalyq bıofarmatsevtıkalyq platforma arasynda yntymaqtastyq ornatýdy usyndy.

Áńgimelesý barysynda taraptar Glazgodaǵy SOR26 sammıtiniń qorytyndylary boıynsha klımattyń ózgerýine qatysty máselelerdi talqylap, kómirtegi beıtaraptyǵyna qol jetkizý úshin ulttyq deńgeıde qabyldanyp jatqan sharalarǵa toqtaldy.

Kezdesýde qaýipsizdikti qamtamasyz etý, terrorızmge, adam saýdasy men zańsyz mıgratsııaǵa qarsy kúres máseleleri de sóz boldy. Qasym-Jomart Toqaev Qazaqstannyń Aýǵanstanǵa gýmanıtarlyq kómek kórsetý úshin qabyldap jatqan sharalary týraly aıtyp berdi.

Memleket basshysy EýroOdaqpen aımaqtyq deńgeıdegi baılanystar jóninde aıta kelip, «Qazaqstan – EýroOdaq» jáne «Ortalyq Azııa – EýroOdaq» formattary boıynsha Belgııamen tyǵyz yntymaqtastyq ornatýǵa daıyn ekenin naqtylady. Osy rette Qazaqstan men EýroOdaq arasyndaǵy Keńeıtilgen seriktestik jáne yntymaqtastyq týraly kelisimniń, sondaı-aq EýroOdaqtyń Ortalyq Azııa jónindegi jańa strategııasynyń barlyq áleýetin tıimdi paıdalanýdyń mańyzdylyǵyna mán berildi.

Qasym-Jomart Toqaev Aleksandr De Krooǵa Qazaqstanda júzege asyrylyp jatqan aýqymdy saıası jáne ekonomıkalyq reformalar týraly málimet berdi. Belgııa Premer-Mınıstri Qazaqstannyń EýroOdaqpen yntymaqtastyǵyn joǵary baǵalady.

Kezdesý sońynda Memleket basshysy Belgııa Premer-Mınıstrin Qazaqstanǵa resmı saparmen kelýge shaqyrdy. Aleksandr De Kroo elimizge kelýge qyzyǵýshylyq bildirdi.


Joǵary qaraı