Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Qazaqstan Prezıdenti Joǵary Eýrazııalyq ekonomıkalyq keńestiń otyrysyna qatysty

2021 jyldyń 10 jeltoqsan 2021 17:45

NUR-SULTAN. QazAqparat - Prezıdent Qasym-Jomart Toqaevtyń tóraǵalyǵymen Joǵary Eýrazııalyq ekonomıkalyq keńestiń (JEEK) bıylǵy qorytyndy otyrysy beınebaılanys rejıminde ótti, dep habarlaıdy Aqorda.

Jıyn barysynda Joǵary keńestiń Qurmetti tóraǵasy, Elbasy Nursultan Nazarbaev, Armenııa Premer-mınıstri Nıkol Pashınıan, Belarýs Prezıdenti Aleksandr Lýkashenko, Qyrǵyzstan Prezıdenti Sadyr Japarov, Reseı Prezıdenti Vladımır Pýtın jáne JEEK-ke baqylaýshy memleketterdiń basshylary retinde Kýba Prezıdenti Dıas-Kanel Bermýdes pen Ózbekstan Prezıdenti Shavkat Mırzıeev, sondaı-aq Eýrazııalyq ekonomıkalyq komıssııa alqasynyń tóraǵasy Mıhaıl Mıasnıkovıch sóz sóıledi.




Qasym-Jomart Toqaev otyrysty ashyp, oǵan moderator boldy. Memleket basshysy syrtqy faktorlar men karantındik shekteýlerge qaramastan, Odaq aıasyndaǵy makroekonomıkalyq kórsetkishterdiń ósim qarqynyna kóńili tolatynyn atap ótti.

«Bıylǵy 9 aıdyń ishindegi ózara saýda-sattyq kólemi 32,5 paıyzǵa artyp, 52 mıllıard dollarǵa jetti. Bul pandemııaǵa deıingi kórsetkishten 16,5 paıyzǵa joǵary. Odaqqa múshe elder arasyndaǵy eksport kólemi ulǵaıdy. Mysaly, Qazaqstan eksportynyń ósim kólemi 39 paıyz boldy. Salystyrmaly túrde alǵanda Eýrazııalyq ekonomıkalyq odaqqa múshe basqa da elderdegi eksport kólemi artqan», – dedi Memleket basshysy.




Prezıdent Odaqtyń tóraǵalyǵyna kirisken kezdegi birlesken jumystardyń bes baǵytyna, atap aıtqanda, ónerkásiptik kooperatsııany kúsheıtý, ózara saýdadaǵy kedergilerdi joıý, kólik-logıstıkalyq ınfraqurylymdy damytý, tsıfrlandyrý, sondaı-aq úshinshi eldermen saýda-ekonomıkalyq qatynastardy keńeıtý máselelerine toqtaldy.

« Munyń bári bir kúndik jumys emes ekenin túsinemiz. Degenmen, qazirdiń ózinde olardyń keıbiri tabysty júzege asyrylyp jatyr», – dedi Prezıdent.

Qasym-Jomart Toqaev Qazaqstannyń tóraǵalyǵy barysynda atqarylǵan birlesken jumystardyń nátıjelerine egjeı-tegjeıli toqtalyp, Eýrazııalyq ekonomıkalyq odaqqa múshe elderdiń úkimetteri men Eýrazııalyq ekonomıkalyq komıssııanyń atqarǵan jumystary úshin rızashylyǵyn bildirdi.

Sonymen qatar Memleket basshysy jańa syn-qaterler jaǵdaıynda nazar aýdarýdy qajet etetin birqatar usynys aıtty.




Atap aıtqanda, Prezıdent tsıfrlyq ónim men elektrondy qyzmet kórsetýge degen suranystyń zor ekenin atap ótti. Onyń pikirinshe, qazirdiń ózinde álemdik mashına jasaý naryǵynda mıkrochıpter men kompıýterlik quraldardyń tapshylyǵyna qatysty júıeniń jıi isten shyǵý derekteri baıqalady.

«Osyǵan baılanysty úkimetterimizge ǵylymı-zertteý ınstıtýttaryn qatystyra otyryp, mashına jasaý salasy úshin mıkrochıpter men kompıýterlik quraldar shyǵarý jónindegi birlesken kooperatsııalyq jobalardy júzege asyrý máselesin pysyqtaýdy tapsyrý usynylady. Kásiporyndarymyzdyń qajettiligin tolyq qamtamasyz etýge múmkindik beretin óndiristik baza qurý qajet, al sodan keıin eksportty jolǵa qoıýǵa bolady», – dedi Qazaqstan Prezıdenti.




Sonymen qatar Qasym-Jomart Toqaev qurǵaqtaǵy tasymal máselesin damytýdy, «júrdek» transqurlyqtyq dálizderdi retke keltirýdi jáne olardyń óńirlik jáne jahandyq básekege qabilettiligin qamtamasyz etýdi ózekti sanaıdy. Osy rette Prezıdent Eýrazııalyq ekonomıkalyq odaqtyń taýar ótkizý jelisin qurýǵa qatysty elderimizdiń bastamalaryna nazar aýdardy.

«Qazaqstan keıingi eki jyl boıy Kóterme-taratý ortalyqtarynyń ulttyq jelisin qurý jumystaryn júrgizip keledi. Biz Odaqqa múshe elderdiń taýar ótkizý júıesin qalyptastyrýǵa jáne ıntegratsııalaýǵa belsendi atsalysýǵa daıynbyz», – dedi Qasym-Jomart Toqaev.

Memleket basshysy kedergilerdi, shekteýler men alyp qoıýlardy dáıekti túrde qysqartýdyń mańyzdy ekenin aıtty. Bıylǵy aqpan aıynda ótken Alqa otyrysynda Kedergilerdi bólýdiń ádistemesi bekitildi. Endi kedergilerdi qarastyryp, júıeleý úderisi, ıaǵnı olardyń túri men qoldanylý merzimi bızneske tıimdi bolý úshin reglamentteldi. Prezıdent shaǵyn jáne orta kásiporyndardy eýrazııalyq ıntegratsııa jáne kedergisiz saýda úderisine tartý isin jalǵastyrýǵa shaqyrdy.




Qasym-Jomart Toqaev Eýrazııalyq ekonomıkalyq komıssııa jumysynyń tıimdiligine jáne onyń Odaqqa múshe memlekettermen ózara yqpaldastyǵyna arnaıy toqtaldy. Prezıdent bes eldiń múddesin eskere otyryp, biryńǵaı ári tutas ekonomıkalyq saıasatty qalyptastyrýdyń kóp eńbekti talap etetin kúrdeli jumys ekenin atap ótti.

« Biz bıyldan bastap Eýrazııalyq ıntegratsııany damytýdyń 2025 jylǵa deıingi strategııasyn iske asyrýǵa kiristik. Strategııanyń erejelerin qatań saqtap, Odaqtyń qazirgi quqyǵy aıasynan shyqpaý kerek dep esepteımin. Bizdiń jumysymyz ben Odaqtyń qyzmeti jalpy syrtqy seriktes elderdiń zor qyzyǵýshylyǵyn týǵyzyp otyrǵanyn eskerý mańyzdy. Bul bizge úlken jaýapkershilik júkteıdi», – dedi Memleket basshysy.

Qazaqstan Prezıdenti sózin qorytyndylaı kele, ózara qurmet pen konstrýktıvti dıalogty saqtaýǵa beıildi bolý Odaq aıasyndaǵy uzaq merzimdi ári berik yntymaqtastyqtyń negizi ekenin atap ótti.




2022 jyly Eýrazııalyq ekonomıkalyq odaq organdaryna Qyrǵyz Respýblıkasy tóraǵalyq etedi. Osyǵan oraı Memleket basshysy Qasym-Jomart Toqaev Prezıdent Sadyr Japarovty quttyqtap, alǵa qoıǵan maqsatqa sátti qol jetkizýine tilektestik bildirdi.

Keńeıtilgen formatta ótken shara sońynda Eýrazııalyq odaqqa múshe elderdiń basshylary talqylaýdy shaǵyn quramda jalǵastyrdy.




Jıyn qorytyndysy boıynsha Odaqqa múshe memleketterdiń basshylary Eýrazııalyq ekonomıkalyq odaq keńistigindegi ıntegratsııalyq úderisterdi odan ári nyǵaıtýǵa baǵyttalǵan 20 qujat qabyldady.


Sheshimder:


Navıgatsııalyq plombadaǵy bar aqparatty qorǵaýdyń biryńǵaı sharalaryn ázirleý jónindegi jumys tobyn qurý týraly.

Joǵary Eýrazııalyq ekonomıkalyq keńestiń 2020 jylǵy 11 jeltoqsandaǵy №16 sheshiminiń oryndalý barysy týraly.

Eýrazııalyq ekonomıkalyq odaqtyń 2022 jylǵa arnalǵan halyqaralyq qyzmetiniń negizgi baǵyttary týraly.

Eýrazııalyq ekonomıkalyq odaq janyndaǵy baqylaýshy memleket mártebesi týraly Erejege ózgerister engizý týraly.

Qurylys salasynda qyzmet kórsetýdiń biryńǵaı naryǵynyń jumysyn qamtamasyz etý týraly.

Qyzmet kórsetýdiń biryńǵaı naryǵynyń jumysy aıasynda baǵalaý qyzmetin iske asyrý sharttaryna arnalǵan ortaq tásilder týraly.

Eýrazııalyq ekonomıkalyq odaqtyń 2021 jylǵy bıýdjetiniń jumsalýy jónindegi esep týraly.

Eýrazııalyq ekonomıkalyq odaqtyń 2022 jylǵa arnalǵan bıýdjeti týraly.

Eýrazııalyq ekonomıkalyq odaqtyń sotyna júginý kezinde kásiporyndar tóleıtin salyq mólsherin bekitý týraly.

Eýrazııalyq ekonomıkalyq odaq organdaryna tóraǵalyq etý týraly.

Qyrǵyz Respýblıkasyndaǵy memlekettik basqarý sektorynyń qaryz mólsherin azaıtýǵa baǵyttalǵan birlesken sharalar týraly.


Ókimder:


Eýrazııalyq ekonomıkalyq odaq aıasynda jeke sektorlar jónindegi lıberalızatsııalaý josparyn iske asyrý týraly.

Joǵary Eýrazııalyq ekonomıkalyq keńestiń otyrysyn ótkizý ýaqyty men orny týraly.


Tapsyrmalar:


1. Joǵary Eýrazııalyq ekonomıkalyq keńestiń «Eýrazııalyq ekonomıkalyq ıntegratsııany damytýdyń 2025 jylǵa deıingi strategııalyq baǵyttary týraly» 2020 jylǵy 11 jeltoqsandaǵy №12 sheshiminiń iske asyrylý barysy týraly.


2. Reseı Federatsııasynyń aǵash materıaldaryn syrtqa shyǵarýǵa qatysty 2022 jylǵy 1 qańtardan bastap kúshine enetin shekteýleri týraly.



Qol qoıylǵan halyqaralyq sharttar:


Eýrazııalyq ekonomıkalyq odaqta tasymaldardy qadaǵalaý úshin navıgatsııalyq plombalardy qoldaný jónindegi kelisim.

Eýrazııalyq ekonomıkalyq odaq týraly 2014 jylǵy 29 mamyrdaǵy shartqa ózgerister engizý týraly hattama («II Úlken Hattama»).

Eýrazııalyq ekonomıkalyq odaq aıasynda aýdıtorlyq qyzmetti júzege asyrý týraly kelisim.

Kedendik tranzıttiń keden rásimine sáıkes taýarlardy tasymaldaý kezinde keden salyǵyn, salyqtardy, arnaýly, dempıngke qarsy, ótemdik bajdardy tóleý jónindegi mindetterdiń oryndalýyn qamtamasyz etýdi qoldaný erekshelikteri týraly kelisim.

2015 jylǵy 8 mamyrda qol qoıylǵan Qyrǵyz Respýblıkasynyń Eýrazııalyq ekonomıkalyq odaq týraly 2014 jylǵy 29 mamyrdaǵy shartqa qosylýyna baılanysty Qyrǵyz Respýblıkasynyń 2014 jylǵy 29 mamyrdaǵy Eýrazııalyq ekonomıkalyq odaq týraly Shartty, Eýrazııalyq ekonomıkalyq odaqtyń quqyǵyna enetin jeke halyqaralyq sharttardy jáne Eýrazııalyq ekonomıkalyq odaq organdarynyń aktilerin qoldaný jónindegi sharttar men aýyspaly erejeler týraly Hattamaǵa ózgertýler engizý týraly Hattama.


Joǵary qaraı