Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Qazaqstan Respýblıkasy Statımen daýda jeńdi – Ádilet mınıstrligi

2021 jyldyń 17 qarasha 2021 23:50

BRıÝSSELЬ. QazAqprat - Qazaqstan Respýblıkasy Statımen daýda jeńdi. Belgııanyń apellıatsııalyq soty 530 mıllıon AQSh dollaryn quraıtyn tórelik sheshimdi taný jáne oryndaý týraly sheshimniń kúshin joıyp, Statı tórelik trıbýnal men Shvetsııa sottaryn jańylystyrdy degen qorytyndyǵa keldi. Bul týraly QR Ádilet mınıstrliginen málim etti, dep habarlaıdy QazAqparat.

«Moldova olıgarhtary Anatol men Gabrıel Statıdi («Statı») jaýapqa tartý úshin uzaq kúreste Qazaqstan Respýblıkasy túbegeıli jeńiske jetti.

2021 jylǵy 16 qarashada Belgııanyń Apellıatsııalyq soty Statıdiń iri kólemdegi alaıaqtyq shemaǵa qatysy bar, ol tek tórelik sotty ǵana emes, sonymen qatar sheshimniń kúshin joıý jónindegi protsess kezinde Shvetsııa sottaryn da jańylystyrdy degen sheshimdi shyǵardy. Sottyń pikirinshe, bul alaıaqtyq shema tórelik sottyń jaýapkershilik pen shyǵyndardy óteý máselelerine qatysty qorytyndylaryna tikeleı áser etken. Sonyń negizinde Apellıatsııalyq sot tómengi satydaǵy sottyń 530 mıllıon AQSh dollaryn quraıtyn tórelik sheshimdi taný jáne oryndaý týraly sheshimniń tolyqtaı kúshin joıdy.

King & Spalding zań fırmasy tórelikte Statıdiń múddesin qorǵaǵan jáne olardyń jalǵan tórelik sheshimderin, sonyń ishinde Shvetsııa men Belgııada taný jáne oryndaý boıynsha dúnıejúzilik áreketterin úılestirgen», - delingen Ádilet mınıstrligi taratqan habarlamada.

Budan buryn habarlanǵandaı, 2017 jylǵy jeltoqsanda Statı tórelik sheshimdi taný týraly syrttaı qaýly aldy, ol keıinnen 2019 jylǵy jeltoqsanda Belgııanyń birinshi ınstantsııa sotynyń qaýlysymen rastaldy. Alaıda, bul eki sheshim de Statıdiń alaıaqtyǵynyń jańa dálelderin qamtymaıtyn shekteýli faktologııalyq bazaǵa negizdelgen.

2020 jyldyń qarashasynda Brıýsseldiń apellıatsııalyq soty Statıdiń qarsylyǵyna qaramastan, alaıaqtyq týraly materıaldy tolyq kólemde usyný týraly Respýblıkanyń ótinishin qanaǵattandyrdy.

Endi apellıatsııalyq sot Statı aýqymdy alaıaqtyq shemaǵa qatysqanyn jáne nátıjesinde tórelik sheshim tanylmaýy nemese oryndalmaýy tıis degen Qazaqstan Respýblıkasynyń pozıtsııasyn rastady.

«Apellıatsııalyq sottyń bul sheshimi Bank of New York Mellon-da saqtalatyn Qazaqstan Ulttyq qorynyń 530 mıllıon dollardan asatyn aktıvterine ýaqytsha tyıym salýdyń kúshin joıýǵa negiz bolady», - dedi mınıstrlikten.

Qazaqstannyń Ádilet mınıstri Marat Beketaev bul máselege qatysty: «Bul Statı men olardyń sybaılastaryna qarsy Respýblıkanyń kópjyldyq kúresindegi mańyzdy sheshim. Statıdiń alaıaqtyǵy týraly Respýblıka usynǵan materıaldardy tolyǵymen osy sot alǵash ret qarady. Barlyq qolda bar dáleldemelerdi muqııat taldaǵannan keıin apellıatsııalyq sot bizdiń elge, Statıdiń aýdıtorlaryna (KPMG), tórelik sotqa jáne tórelik sheshimniń kúshin joıýdy qaraǵan Shved sottaryna qatysty Statıdiń alaıaqtyq jasaǵandyǵyn rastady. Bul sheshim Statıge ǵana emes, sonymen qatar olardyń kásibı keńesshilerine de aýyr saldar týǵyzady. Bul Statıge áli de kómektesip, olardyń zańsyz shemalaryna qoldaý kórsetetinder, sonyń ishinde Danıel Chapman men onyń Argentem Creek kompanııalar toby úshin «qaıtarylmaıtyn» núkte bolýy tıis. Ádilet mınıstrliginiń atynan Statı men olardyń barlyq sybaılastary jaýapqa tartylmaǵansha, biz óz ustanymymyzda turatyndyǵymyzdy habarlaımyz», - dep atap ótti.

Statı isine qatysty tolyq aqparat Ádilet mınıstrliginiń resmı saıtynda ornalastyrylǵan.


Basty sózder: QR Ádilet mınıstrligi, Sot,
Joǵary qaraı