Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstan TMD elderiniń bilim berý salasyndaǵy keńesine tóraǵalyq etedi

2021 jyldyń 14 qazan 2021 12:27

NUR-CULTAN. QazAqparat - 2022 jyly TMD elderiniń bilim berý salasyndaǵy yntymaqtastyq keńesine tóraǵalyq etedi. Sondaı-aq elimizde TMD-ǵa qatysýshy memleketterdiń muǵalimderi men bilim berý salasy qyzmetkerleriniń VII sezi ótedi.

Mundaı sheshim bıyl Armenııada ótken TMD elderiniń bilim berý salasyndaǵy yntymaqtastyq keńesi otyrysynyń qorytyndysy boıynsha biraýyzdan qabyldandy. Oǵan Qazaqstan, Reseı, Qyrǵyzstan, Ózbekstan, Armenııa, Belarýs, Tájikstannan keńes músheleri, sondaı-aq TMD Atqarýshy komıtetiniń ókilderi men basqa da shaqyrylǵan tulǵalar qatysty. Qazaqstannyń atynan QR BǴM Bilim jáne ǵylym salasynda sapany qamtamasyz etý komıtetiniń tóraıymy Gúlzat Kóbenova bardy.

Talqylaý barysynda keńeske qatysýshy elder Qazaqstan Respýblıkasy Bilim jáne ǵylym mınıstrliginiń joǵary jáne orta bilim berý júıesindegi jumysyn atap ótti. Máselen, jańa bilim berý baǵdarlamalaryn engizý, akademııalyq adaldyqty qamtamasyz etý sheńberinde qabyldanǵan zańnamalyq normalar, pedagogterdiń jalaqysyn joǵarylatý, bilim berý júıesindegi kadrlardyń biliktiligin arttyrý boıynsha jumys, sondaı-aq bilim berý protsesinde tsıfrlyq tehnologııalardy paıdalaný úshin zańnamalyq normalardy jetildirý.

«Otyrysta kún tártibindegi 19 másele talqylandy. Qatysýshy elderdiń bilim berý salasyndaǵy yntymaqtastyǵy boıynsha memleketaralyq baǵdarlamalar men josparlary bekitildi. Endi memleketter bilim alýshylar jáne ǵylymı-pedagogıkalyq qyzmetkerler arasynda ózara almasý boıynsha jumysty keńeıtip, joǵary oqý oryndary arasyndaǵy yntymaqtastyqty arttyrady, sonymen birge bilim berý salasyndaǵy ózara is-qımyldyń memleketaralyq baǵdarlamalaryn jasasady. Sondaı-aq ınternet-resýrstardy paıdalana otyryp, memleketaralyq aqparat almasý aýqymyn keńeıtý, bilim berý baǵdarlamalaryn ilgeriletý boıynsha birlesken is-sharalar ótkizý týraly sheshim qabyldandy»,-dedi Bilim jáne ǵylym salasynda sapany qamtamasyz etý komıtetiniń tóraǵasy Gúlzat Kóbenova.

Qazaqstanda ótetin TMD-ǵa qatysýshy memleketterdiń muǵalimderi men bilim berý salasy qyzmetkerleriniń VII seziniń taqyryby pandemııadan keıingi kezeńdegi bilim berý protsesiniń jańa bolmysy men transformatsııasyna arnalady.


Joǵary qaraı