Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstan jerinde «Muz janartaý» paıda boldy - Sheteldegi qazaq tildi BAQ-qa sholý

2021 jyldyń 7 aqpan 2021 11:18

NUR-SULTAN. QazAqparat - «QazAqparat» HAA sheteldegi qazaq tilinde taraıtyn aqparat kózderine aptalyq sholýyn usynady.

Qazaqstan jerinde «Muz janartaý» paıda boldy - Qytaıdyń «Ortalyq halyq radıosy» (CNR)

Qazaqstan jerinde tabıǵattyń keremeti «Muz janartaý» jurttyń tamsana tamashalaıtyn ornyna aınaldy, dep jazady Qytaılyq kazakcnr.com saıty.




«Bul negizi jerdiń astynan atqylap shyǵatyn artezıan sýy. Osy sý qys mezgiline qaraı erneýi bıiktep qatyp, 14 metrge deıin kóterilip, ortasy qýys muz tóbeshikke aınalady. Sol tóbesindegi tesikten shyqqan sý býy janartaýdan atqylaǵan tútinge uqsaıdy. Bul tańǵajaıyp kórinisti tamashalaýǵa jergilikti turǵyndar men alys-jaqynnan týrıster jıi keletin bolǵan», - dep jazady CNR.


Aıta keteıik, qytaılyq BAQ-tardyń nazaryn aýdarǵan bul erekshe kórinis Almaty oblysynyń Kegen aýdanyndaǵy Kegen jáne Shyrǵanaq aýyldarynyń arasynda ornalasqan.

Sýret salý óneri atasynan daryǵan 18 jastaǵy sýretshi - KAZNEWS

Baıan-Ólgeı aımaǵynyń Býlgan aýylynyń týmasy Altynbek Shákerhanuly – 18 jasta. Oǵan sýret salý óneri atasynan daryǵan, dep jazady Mońǵolııalyq KAZNEWS aqparattyq portaly.

Aldyna úlken maqsat qoıǵan qandasymyz, talanytty jas sýretshi Altynbek Shákerhanuly atalǵan BAQ-qa bergen suhbatynda óziniń ónerge bala kúninen yntaly bolǵanyn aıtyp, shyǵarmashylyq jumystary týraly baıandaǵan.




«Oqýshy kezimnen bastap sýret salýǵa áýes boldym. Telefon, ınternet bolmady. Sol kezderi kitaptaǵy sýretterdi syzý arqyly sýretke degen sezimim oıandy. Keıin tabıǵatty, jan-janýarlardy jáne aınalamdaǵy dúnıelerdi syza bastadym. Qazir tarıhı oqıǵalardy sýrettegendi unatamyn. Tanymal tulǵalardyń portret sýretin salamyn. Alǵashqy portret týyndym el Prezıdentiniń sýreti boldy. Budan keıin de kóptegen tulǵalardyń sýretin saldym. Sýret salý qabiletim qanǵa bitken sııaqty. Atam aǵashtan túıin túıetin sheber adam bolǵan. Árkim óziniń qalaýy boıynsha mamandyq tańdaǵan durys dep oılaımyn. Men sýretshi bolamyn dep maqsat qoıdym. Bul meniń tańdaǵan jolym», - deıdi sýretshi Altynbek Shákerhanuly.







Túrkııa Qorǵanys vıtse-mınıstri Nur-Sultanǵa bardy - TRT

Ulttyq Qorǵanys mınıstriniń orynbasary Mýhsın Dere Nur-Sultandaǵy eki kúndik resmı sapary sheńberinde Qazaqstan Qorǵanys mınıstri Nurlan Ermekbaev jáne Qazaqstan Respýblıkasy qorǵanys jáne aeroǵarysh ónerkásibi mınıstri Beıbit Atamqulovpen kezdesti, dep habarlaıdy Túrkııa Radıo Televızııa portaly.

«Mýhsın Dereniń Beıbit Atamqulovpen kezdesýinde eki el arasyndaǵy áskerı jáne tehnıkalyq saladaǵy yntymaqtastyqty jetildirý týraly sóz boldy. Mınıstr Atamqulov optıkalyq jáne radıo elektronıkalyq salady áskerı ónim óndirisinde túrik-qazaq birlesken jumystarynyń tabyspen jalǵasyp jatqanyn aıtty. Osy kezdesýden keıin Qazaqstan Qorǵanys mınıstrimen bas qosqan Mýhsın Dere baýyrlas eki el arasynda áskerı jáne tehnıkalyq salada kóptegen jańa kelisimniń josparlanyp otyrǵanyn atap kórsetti. Ol Qazaqstannyń Túrkııa úshin Ortalyq Azııadaǵy mańyzdy serikteriniń biri ekenin jetkizdi», - dep jazady TRT.





Álisher Naýaı týraly tarıhı derekti fılm túsirilýde - «ÓzA» aqparattyq agenttigi

Buhara qalasynda Ózbekkıno Ulttyq agenttiginiń tapsyrysy boıynsha «Álisher Naýaı» týraly tarıhı derekti fılmniń túsirilimin bastady, dep jazady Ózbekstannyń «ÓzA» memlekettik aqparattyq agenttigi.

«Shyǵystyń shoqjuldyzyna arnalǵan derekti fılmniń stsenarııin Fýrkat Ýsmanov jazǵan jáne ol Álisher Naýaı tulǵasyna degen jańa kózqarasqa negizdelgen. Shyǵarmashylyq top sýretke alý barysynda tarıhı-kórkemdik qaıta qurý, kompıýterlik grafıka jáne Álisher Naýaı atyndaǵy Tashkent memlekettik ózbek tili men ádebıeti ýnıversıtetiniń, naýaıtanýshylardyń suhbattary arqaý bolady. Uly aqynnyń ómiri týraly tarıhı derekti fılmniń túsirilimi Buhara, Samarqand, Tashkent oblystary men Tashkent qalasynda ótedi», - dep jazady «ÓzA» aqparattyq agenttigi.





Qazaqstan 13 sý elektr stansasyn salýdy josparlap otyr - «Fars» aqparat agenttigi

Qazaqstan úkimeti 2030 jylǵa deıin 13 sý elektr stansasy men 39 sý qoımasyn salyp, iske qosýdy josparlap otyr, dep jazady «Fars» aqparat agenttigi.

«Qazaqstannyń Ekologııa, geologııa men tabıǵı resýrstar mınıstri Maǵzum Myrzaǵalıev úkimet otyrysynda 2030 jylǵa deıin elde 39 sý qoımasy salynatynyn habarlap: «Negizgi kanaldardyń shamamen 2 shaqyrymy qaıta jóndeledi. Munymen qosa, eldiń túrli óńirlerinde jalpy syıymdylyǵy 885 mln tekshe metr bolatyn jańa 8 sý qoımasy salynyp, iske qosylady», -dedi. Sonymen birge Qazaqstan Energetıka mınıstri Nurlan Noǵaevtyń aıtýynsha, 2025 jylǵa deıin eldiń ońtústik óńirlerinde shamamen 1300 MVt-tyq gaz generatory iske qosylatyny málim boldy», - dep jazady Rarstoday.






Avtor Baqytjol Kákesh
Basty sózder: Vıdeo, Qandastar, BAQ,
Joǵary qaraı