Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstanda apta ishinde bolǵan kadrlyq taǵaıyndaýlar

2021 jyldyń 11 sáýir 2021 12:46

NUR-SULTAN. QazAqparat – «QazAqparat» Halyqaralyq aqparat agenttigi Qazaqstanda apta ishinde bolǵan kadrlyq aýys-túıiske sholýyn usynady.

Apta basynda Memleket basshysy Qasym-Jomart Toqaevtyń Jarlyǵymen Erjan Nıgmatollauly Ashyqbaev Qazaqstan Respýblıkasynyń Amerıka Qurama Shtattaryndaǵy Tótenshe jáne Ókiletti Elshisi laýazymyna taǵaıyndaldy.

2013 jylǵy jeltoqsannan bastap 47 jastaǵy Erjan Ashyqbaev Syrtqy ister mınıstriniń orynbasary qyzmetin atqardy.

Al onyń ornyna Aqan Aqasuly Rahmetýllın Qazaqstan Respýblıkasy Syrtqy ister mınıstriniń orynbasary bolyp taǵaıyndaldy.

Sondaı-aq, Memleket basshysynyń ókimimen Berik Sholpanqululy Sholpanqulov Qazaqstan Respýblıkasy Ulttyq banki tóraǵasynyń orynbasary laýazymyna bekitildi.

Berik Sholpanqulov 1976 jyly Almaty oblysynda týǵan. 1996 jyly Qazaq memlekettik agrarlyq ýnıversıtetin ekonomıst-býhgalter mamandyǵy boıynsha bitirgen. Eńbek jolyn 1996 jyly QR Qarjy mınıstrligi janyndaǵy Qazynashylyq memlekettik qaryz jáne kassalyq qarjy basqarmasynyń qazynashysy bolyp bastady. Túrli jyldary QR QM janyndaǵy qazynashylyq júıesinde basshylyq qyzmetterdi atqardy. 2008 jyldan 2014 jyl aralyǵynda QR qarjy vıtse-mınıstri boldy. 2014–2016 jyldary — QR Qorǵanys mınıstriniń orynbasary. 2016 jyldan bastap QR qarjy vıtse-mınıstri laýazymyn atqardy. Sondaı-aq Memleket basshysynyń ókimimen Dına Tóleýbekqyzy Ǵalıeva Qazaqstan Respýblıkasy Ulttyq Banki tóraǵasynyń orynbasary laýazymynan bosatyldy.

Al Túrkistan oblysynda tuńǵysh ret áıel adam qala basshysy laýazymyn ıelendi. Naqtyraq aıtsaq, Arys qalasynyń ákimi bolyp Gúljan Mamytqyzy Qurmanbekova taǵaıyndaldy.

Gúljan Qurmanbekova 1965 jyly Otyrar aýdanynda dúnıege kelgen. 1987 jyly Almaty halyq sharýashylyq ınstıtýtyn bitirdi. Eńbek jolyn Sháýildir jolaýshylar avtokóligi mekemesiniń kassıri bolyp bastaǵan. 1987 ­– 1992 jyldary Qyzylqum aýdandyq qarjy bóliminiń kiris esebiniń ınspektory, tekserýshi –ınspektory, aǵa ekonomısti qyzmetterin atqarǵan. 1992 – 2004 jyldary OQO qalalyq qarjy bóliminiń aǵa tekserýshi-ınspektory, bas ekonomıst, bas maman-bas ekonomısti. 2004 – 2005 jyldary – OQO bilim departamentiniń bas mamany, Shymkent qarjy bólimi meńgerýshisiniń orynbasary. 2007 – 2010 jyldary – Shymkent qalasynyń qarjy bóliminiń bastyǵy. 2010 – 2020 jyldary – Shymkent qalasynyń ekonomıka jáne qarjy bóliminiń bastyǵy, Shymkent qalasy ákiminiń orynbasary qyzmetin atqardy. 2020 jyldan beri Túrkistan oblysy ákiminiń ekonomıka, qarjy máseleleri boıynsha keńesshisi boldy. «Qazaqstan Respýblıkasynyń Konstıtýtsııasyna 10 jyl», «Qazaqstan Respýblıkasynyń Táýelsizdigine 25 jyl» mereıtoılyq medaldarymen, «Eren eńbegi úshin» medalimen marapattalǵan.

Aqtóbe oblystyq Jolaýshylar kóligi jáne avtomobıl joldary basqarmasynyń basshysy qyzmetine Aıbek Qaıyr keldi.

Ol eńbek jolyn 2005 jyly Qobda aýdanynyń turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminde bastaǵan. Ár jyldary Qobda aýdany ákimi apparatynda jumys istedi. Qobda aýdandyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń basshysy boldy. Qarǵaly aýdany ákiminiń orynbasary, Aqtóbe qalasynyń qurylys bólimi basshysynyń orynbasary, oblystyq energetıka jáne turǵyn úı-kommýnaldyq sharýashylyǵy jáne oblystyq jolaýshylar kóligi jáne avtomobıl joldary basqarmasy basshysynyń orynbasary qyzmetterin atqardy. Osy laýazymǵa taǵaıyndalar aldynda oblystyq Energetıka jáne turǵyn úı-kommýnaldyq sharýashylyǵy basqarmasynyń basshysy boldy.

Bul aptada «Rýhanı jańǵyrý» Qazaqstandyq qoǵamdyq damý ınstıtýty» KeAQ-nyń jańa basqarma tóraǵasy taǵaıyndady. Atalmysh laýazymǵa Asylbek Esimqanuly Esenbaev ıe boldy.

Asylbek Esenbaev – bilimi boıynsha ekonomıst, 1998 jyly T.Rysqulov atyndaǵy Qazaq memlekettik basqarý akademııasyn bitirdi. Saıası ǵylymdar kandıdaty. Eńbek jolyn Qazaqstannyń Damý ınstıtýtynda ǵylymı qyzmetker retinde bastaǵan. «Strategııa» taldaý ortalyǵy, QR Tuńǵysh Prezıdenti qory janyndaǵy Álemdik ekonomıka jáne saıasat ınstıtýty sekildi ǵylymı-zertteý qurylymdarynda jumys istedi. QR Prezıdenti Ákimshiliginde, QR Qaýipsizdik Keńesinde, QR Premer-Mınıstri Keńsesinde qyzmet jasady. Qazaqstan Respýblıkasynyń Reseı Federatsııasyndaǵy Elshiliginiń keńesshisi bolyp jumys istedi. Osy ýaqytqa deıin Nur-Sultan qalasynyń ákimdiginde basqarma basshysy laýazymyn atqardy.

Sonymen birge, Pavlodar oblysy ákiminiń birinshi orynbasary bolyp Oleg Krýk taǵaıyndaldy.

Oleg Krýk 1967 jyly Pavlodarda dúnıege kelgen. 1992 jyly Pavlodar ındýstrıaldy ınstıtýtyn bitirip, ónerkásiptik jylý energetık mamandyǵyn ıelendi. Eńbek jolyn 1988 jyly Pavlodar JEO-3-te slesar bolyp bastaǵan. Ýnıversıtetti bitirgennen keıin ol eńbek jolyn jylý-elektr ortalyǵynda jalǵastyryp, qazandyq bóliminde ınjener-tehnolog, keıinirek bas ınjenerdiń orynbasaryna deıin ósti. 1997 jyly Oleg Krýk «CCL-Energo Company» JShS satyp alý bóliminiń bastyǵy boldy. 1999 jyldan 2002 jylǵa deıin «Soltústik Qazaqstan energetıkalyq kompanııasy» JShS, «Kazsnabtsentr» JShS, «Kazpromresýrs» JShS jáne «Teplotsentr-Severnyı» JShS Pavlodar fılıalynda qyzmet etti. 2002 jyly «Pavlodarenergo» AAQ jylý jelileriniń dırektory bolyp taǵaıyndaldy. 2006 jyly «Pavlodar jylý jelileri» kompanııasyn basqardy. 2007 jyly Oleg Krýk memlekettik qyzmetke aýysyp, Pavlodar oblysynyń energetıka jáne kommýnaldyq sharýashylyq basqarmasynyń basshylyǵyna taǵaıyndaldy. 2008 jyly ol Pavlodar qalasy ákiminiń orynbasary bolyp taǵaıyndalyp, osy laýazymda tórt jyldan astam qyzmet etti. Keıin kásipkerlikpen aınalysty. 2020 jyly ol Pavlodar oblystyq kásipkerler palatasynyń basshylyǵyna taǵaıyndalyp, onda búgingi kúnge deıin jumys istedi.

Qyzylorda qalasyna da jańa ákim keldi. Bul laýazymǵa Ǵanıbek Qonysbekuly Qazantaev taǵaıyndaldy.

Ǵ. Qazantaev 1960 jyly Qyzylorda oblysynda dúnıege kelgen. Jambyl gıdromelıoratıvtik-qurylys ınstıtýtyn «ınjener-qurylysshy» jáne Qorqyt ata atyndaǵy Qyzylorda memlekettik ýnıversıtetin «munaı jáne gaz kenishterin ıgerý» mamandyqtary boıynsha bitirgen. Eńbek jolyn 1980 jyly Jalaǵash aýdandyq 9-shy jyljymaly mehanızatsııalanǵan kolonnanyń masteri retinde bastaǵan. 1983-1992 jyldary Qyzylorda oblysyndaǵy qurylys uıymdarynda master, aǵa jumys óndirýshi, óndiris-tehnıkalyq bóliminiń bastyǵy, 3-shi aýdanaralyq mamandandyrylǵan jyljymaly mehanızatsııalanǵan kolonnanyń bas ınjeneri. 1992-2013 jyldary «Neftegazstroı Kyzylorda» korporatsııasynyń prezıdenti, «Aı-Dan» jaýapkershiligi shekteýli seriktestigi bas dırektorynyń orynbasary, «SSK «Aqmeshit» aktsıonerlik qoǵamynyń prezıdenti, «Aı-Dan Munaı» jaýapkershiligi shekteýli seriktestiginiń atqarýshy dırektory, «Syrdarııamunaı» aktsıonerlik qoǵamynyń bas dırektory, «Transneftservıs» BK» jaýapkershiligi shekteýli seriktestiginiń bas dırektory, «Kazpetrol Group» jaýapkershiligi shekteýli seriktestiginiń atqarýshy dırektory. 2013-2019 jyldary Syrdarııa aýdanynyń ákimi qyzmetin atqarǵan. 2019 jylǵy qyrkúıek aıynan bastap QR Energetıka mınıstrliginiń Munaı-gaz keshenindegi memlekettik ınspektsııasynyń ońtústik óńiraralyq basqarmasynyń basshysy qyzmetin atqaryp keldi.

Pavlodar oblysy ákiminiń ekonomıka jáne qarjy jónindegi orynbasary da aýysty. Bul qyzmetke Dınara Shaımuratova taǵaıyndaldy.

Dınara Shaımuratova 1978 jyly Kókshetaý oblysynda dúnıege kelgen. 2000 jyly Almaty tehnologııa jáne bıznes ýnıversıtetin ekonomıst mamandyǵy boıynsha támamdap, 2017 jyly qarjy akademııasynda ekonomıka jáne bıznes magıstri dárejesin aldy. Eńbek jolyn 1997 jyly Almaty qalasy men Almaty oblysynyń salyq organdaryndaǵy qyzmetterden bastady. 2000–2004 j.j. Qarjy polıtsııasy agenttiginde jumys istedi. Osydan keıingi 17 jyl ishinde Dınara Shaımuratova QR Qarjy mınıstrliginde eńbek etip, onda býhgalterlik esep jáne esep berý bólimi men ishki qarjy ákimshilik departamentiniń basshysy qyzmetterin atqardy. 2018 jyldan bastap búgingi taǵaıyndalýyna deıin QR Qarjy mınıstrliginiń josparlaý jáne býhgalterlik esep departamentin basqardy.

«Samuryq-Qazyna» UÁQ» AQ Basqarmasynyń sheshimimen Nurlan Ermekuly Saýranbaev «Qazaqstan temir joly» Ulttyq kompanııasy» AQ basqarma tóraǵasy qyzmetine taǵaıyndalady.

Nurlan Saýranbaev 1967 jyly Jambyl qalasynda týǵan. S. M. Kırov atyndaǵy Qazaq memlekettik ýnıversıtetin, Munaı ónerkásibin oqytý ortalyǵyn (Italııa) bitirgen. Mamandyǵy boıynsha ekonomıst, munaı ákimshilendirý magıstri. Eńbek jolyn 1991 jyly jeke kommertsııalyq kompanııanyń basshysy bolyp bastaǵan, onda 1997 jylǵa deıin jumys istedi. 1997-1998 jj. — QR Kásipkerler kongresiniń atqarýshy dırektory. 1998-2000 jj. — «Qazaqstan temir joly» RMK departamentiniń dırektory. 2000-2002 jj. — «Qazaqoıl» UMK» JAQ «Atyraý munaı óńdeý zaýyty» AAQ-nyń birinshi vıtse-prezıdenti; bas menedjeri, qaıta qurý jobasyn basqarý tobynyń jetekshisi. 2002-2004 jj. — «QazMunaıGaz» UK» JAQ Injınırıngtik jáne servıstik jobalar departamentiniń dırektory. 2004-2007 jj. — «TeńizServıs» JShS bas dırektory. 2007-2020 jj. — «QazMunaıGaz» UK» AQ basqarýshy dırektory. 2010-2011 jj. — «Samuryq-Qazyna» UÁQ» AQ basqarma tóraǵasy orynbasarynyń keńesshisi; basqarýshy dırektory. 2011-2014 jj. — ındýstrııa jáne jańa tehnologııalar vıtse-mınıstri. 2014-2016 jj. — qorǵanys mınıstriniń orynbasary. 2016-2017 jj. — EKSPO-2017 halyqaralyq mamandandyrylǵan kórmesin daıyndaý jáne ótkizý máseleleri jónindegi shtabtyń uıymdastyrý komıtetiniń basshysy. 2017-2018 jj. — Shymkent qalasynyń ákimi. 2019 jyldan bastap qazirgi ýaqytqa deıin Prezıdent Ákimshiliginiń Memlekettik baqylaý jáne aýmaqtyq-uıymdastyrý jumysy bóliminiń meńgerýshisi boldy.

Ekologııa, geologııa jáne tabıǵı resýrstar mınıstrliginiń buıryǵymen Aıan Bahııanov Balyq sharýashylyǵy komıteti tóraǵasynyń orynbasary bolyp taǵaıyndaldy.

Buǵan deıin ol Balyq sharýashylyǵy komıtetiniń Balqash-Alakól oblysaralyq basseındik balyq sharýashylyǵy ınspektsııasy basshysynyń orynbasary qyzmetin atqarǵan. Aıan Bahııanov 1983 jyly 2 qarashada Soltústik Qazaqstan oblysynda dúnıege kelgen. S. Seıfýllın atyndaǵy Qazaq memlekettik agrotehnıkalyq ýnıversıtetin «Ónerkásiptik balyq aýlaý» mamandyǵy boıynsha bitirgen. Balyq sharýashylyǵy salasynda 2005 jyldan bastap jumys isteıdi, eńbek jolyn salalyq komıtettiń jetekshi mamany qyzmetinen bastaǵan.

Apta sońyna qaraıy Ásen Jaqsylyqov Zerendi aýdanynyń ákimi bolyp taǵaıyndaldy

Ásen Jaqsylyqov 1980 jyldyń 3 shildesinde Soltústik Qazaqstan oblysy Chıstopolskıı aýdany Barrıkady aýlynda týǵan. Bilim joǵary, «Femıda» Qaraǵandy zań ýnıversıtetin «Zańger» mamandyǵy boıynsha támámdaǵan. Eńbek jolyn 1998-2000 jyldary «Gormolzavod» JShS slesar – naladchık bolyp bastady. 2000 jyly zaýyt mehanıgi, 2001-2003 jyldary «Gormolzavod» JShS bas ınjeneri bolyp jumys istedi. 2004-2005 jyldary «Gormolzavod» JShS fılıalynyń dırektory, keıin 2005 jyldan bastap «Gormolzavod» JShS dırektory boldy. Aqmola oblysy kásipkerler qaýymdastyǵy basqarmasynyń múshesi, 5-shi shaqyrylǵan Kókshetaý qalalyq máslıhat depýtaty

Memleket basshysynyń taǵy bir ókimimen Qanatbek Baqytuly Jaısańbaev QR Prezıdenti Ákimshiligi Memlekettik baqylaý jáne aýmaqtyq-uıymdastyrý jumysy bóliminiń meńgerýshisi laýazymyna taǵaıyndaldy.

Memleket basshysynyń ókimimen QR Prezıdentiniń Ákimshiligi Memlekettik baqylaý jáne aýmaqtyq-uıymdastyrý jumysy bóliminiń meńgerýshisi bolǵan Nurlan Saýranbaev laýazymynan bosatylǵan edi. Keıinirek Nurlan Saýranbaev «Qazaqstan temir joly» UK» AQ» basshysy qyzmetine taǵaıyndaldy.

Sondaı-aq, Muhtar Jumaǵazyuly Kereıbaev «Qazaqstan Injınırıng» UK» AQ Basqarma tóraǵasy qyzmetine taǵaıyndaldy.

Muhtar Jumaǵazyuly 1964 jylǵy 6 qazanda Semeı oblysynda dúnıege kelgen. Almaty ınjener jáne temirjol kóligi ınstıtýtynda «ınjener-mehanık» mamandyǵy, Qazaq gýmanıtarlyq zań akademııasynda «quqyqtaný» mamandyǵy boıynsha bilim alǵan. 1986-1991 jyldary Semeı lokomotıv deposynda sheber jáne óndiris bastyǵy bolyp jumys istedi. 2000-2007 jyldary «Rezerv» RMK-da: Semeı fılıalynda menedjer jáne basqarýshy, «Balqash» fılıalynyń dırektory, Astana qalasy boıynsha «Rezerv» RMK bas dırektorynyń birinshi orynbasary jáne bas dırektory laýazymdaryn atqardy. 2010-2015 jyldary «Tynys» AQ zaýytynyń Bas dırektory qyzmetin atqardy. Ol qosarlanǵan maqsattaǵy ónim óndirýmen jáne azamattyq saladaǵy óndirispen aınalysady. 2015-2017 jyldary Astana qalasy ákimdiginiń birqatar vedomstvolyq baǵynysty uıymdaryn basqardy. 2020 jyldan bastap «Qazaqstan Injınırıng» UK» AQ Basqarma múshesi, Basqarma tóraǵasynyń orynbasary laýazymynda qyzmet isteıdi. 2021 jylǵy naýryzdan bastap «Qazaqstan Injınırıng» UK» AQ Basqarma tóraǵasynyń mindetin atqarýshy boldy. Kereıbaev Muhtar Jumaǵazyuly «Qurmet» ordenimen marapattalǵan.

Keshe ǵana Sábıt Shildebaı̆ «Ortalyq memlekettik arhıv» Respýblıkalyq memlekettik mekemesiniń dırektory qyzmetine taǵaıyndaldy.

Sábıt Shildebaı̆ - 2006-2008 jyldary Q.Sátbaev atyndaǵy QazUTÝ Qoǵamdyq pánder kafedrasynyń dotsenti mindetin atqarýshy; 2008-2011 jyldary Abaı̆ atyndaǵy QazUPÝ «Otan tarıhy» kafedrasynyń dotsenti (ǵylymı ataqsyz) ári tarıh fakýltetiniń ǵalym-hatshysy; 2011-2014 jyldary Abaı̆ atyndaǵy QazUPÝ Magıstratýra jáne PhD doktorantýra ınstıtýty dırektorynyń tárbıe jáne ǵylymı ister jónindegi orynbasary, qabyldaý komıssııasynyń jaýapty hatshysy; 2014 jyldyń qyrkúı̆eginen bastap «Almaty» ýnıversıtetiniń dekany; 2015-2017 jyldary «Almaty» ýnıversıtetiniń rektory; 2017-2018 jyldary Abaı̆ atyndaǵy QazUPÝ KBBBAQO dırektory; 2018 jyly Abaı̆ atyndaǵy QazUPÝ Tárbıe jáne jastar saıasaty departamentiniń dırektory, «Almaty» ýnıversıteti rektorynyń keńesshisi; 2019 jyldyń mamyrynan bastap Sh.Ýálıhanov atyndaǵy Tarıh jáne etnologııa ınstıtýty «HH ǵasyrdaǵy Qazaqstan tarıhy» bóliminiń meńgerýshisi qyzmetin atqarǵan. Bir monografııa, bir oqý quraly, 3 ǵylymı jınaq pen 150-den asa ǵylymı eńbektiń avtory. Sonymen qatar 150-den asa pýblıtsıstıkalyq, jýrnalıstik zertteý jáne saıası saraptama maqalasy BAQ-da jaryq kórgen. Tarıh ǵylymynyń kandıdaty, QR Jastar Odaǵy «Serper» syı̆lyǵynyń laýreaty (2010).

Joǵary qaraı