Aýa raıy
Astana -26 °S
Almaty 0 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstanda «BEST PAPA» ákeler forýmy onlaın ótip jatyr

2020 jyldyń 31 qazan 2020 13:18

NUR-SULTAN. QazAqparat – You Tube jelisindegi En_baqytty_el arnasynda «BEST PAPA» respýblıkalyq ákeler forýmy onlaın ótip jatyr. Oǵan TMD elderi men Qazaqstannyń túrli óńirlerinen qonaqtar qatysýda, dep habarlaıdy QazAqparat tilshisi.

«Áke bolý ınstıtýtyn qoldaý jáne damytý jónindegi sharalar kesheni» jobasyn En baqytty el QR Aqparat jáne qoǵamdyq damý mınıstrliginiń qoldaýymen jáne «Azamattyq bastamalardy qoldaý ortalyǵy» KEAQ memlekettik granty aıasynda birlesip júrgizedi.

Forýmǵa Qazaqstannyń belsendi ákeleri, álem chempıondary, qoǵam qaıratkerleri, jattyqtyrýshylar, psıhologtar, jýrnalıster men blogerler, Reseı men Belarýs ákeler odaǵynyń basshylary qatysýda.

«Aqparat jáne qoǵamdyq damý mınıstrliginiń qoldaýymen bıyl alǵash ret «Áke ınstıtýtyn qoldaý jáne damytý jónindegi sharalar kesheni» jobasy qolǵa alyndy. Búgingi forým da osy joba aıasynda ótýde. Jalpy bul jobanyń otbasy ınstıtýtyn damytýdaǵy mańyzdylyǵyn eskere otyryp, ony 2021 jyly da jalǵastyrý josparlanyp otyr. Myqty ári tatý otbasy – memleketimizdiń órkendeýiniń tiregi jáne negizi. Memleket basshysynyń Joldaýynda otbasy ınstıtýtyn áleýmettik qoldaý men jaqsartýǵa aıryqsha kóńil bólingen. Otbasylyq-demografııalyq ahýaldy jaqsartý úshin Qazaqstanda densaýlyq saqtaý, bilim berý, jumyspen qamtý, turǵyn úımen qamtamasyz etý jáne kásipkerlik salasynda memlekettik baǵdarlamalar qabyldanyp, iske asyrylyp jatyr», - dedi QR Aqparat jáne qoǵamdyq damý mınıstrligi Jastar jáne otbasy isteri komıtetiniń tóraǵasy Shahmardan Baımanov.

Onyń aıtýynsha, otbasy men balalarǵa áleýmettik qoldaý kórsetý shyǵyndary artyp keledi. 2019 jyldan bastap Nur-sultan, Almaty jáne Shymkent qalalarynda jumys isteıtin jastar úshin jaldamaly baspana beriledi. 2019 jyly 5 myńnan astam jas otbasy páter aldy, al bıyl Turǵyn úı qurylys jınaq bankinde jas otbasylarǵa arnalǵan «Jas otbasy» jańa baǵdarlamasy iske qosyldy. Sondaı-aq otbasy ınstıtýtyn qoldaýǵa baǵyttalǵan arnaıy Otbasy banki qurylýda. «Dıplommen aýylǵa» jobasy aıasynda jas otbasylar aýyldyq jerlerde jumysqa ornalasýǵa múmkindik alady.

«Barlyq jerde «Nur Otan» partııasy janyndaǵy «Baqytty otbasy» jobasyn atqarý boıynsha keshendi sharalar qabyldanýda. Qoǵamda basa nazar aýdaryp, sheshimdi qabyldaýdy talap etetin úrdister bolyp jatyr. Ajyrasý jaǵdaılarynyń sany artyp, neke qııý azaıýda. 2017 jylmen salystyrǵanda ajyrasý 4,3%-ǵa ósti. Bul – oılanýǵa turarlyq óte úlken kórsetkish. Turmystyq zorlyq-zombylyqtyń joǵary deńgeıi de bólek problemaǵa aınaldy. Instıtýtty nyǵaıtý men qoldaý maqsatynda mınıstrlik úkimettik emes uıymdarmen birlesip, turaqty negizde túrli jobalardy, onyń ishinde otbasy men otbasylyq qundylyqtardy qoldaýǵa arnalǵan granttyq jobalardy iske asyrýda. Atap ótken jón, bıyl «Qazaqstan Respýblıkasyndaǵy 2030 jylǵa deıingi genderlik saıasat» tujyrymdamasynyń ekinshi kezeńin iske asyrý bastaldy. Úkimet osy tujyrymdamany iske asyrý boıynsha naqty ındıkatorlary bar jospar qabyldady. Prezıdent tapsyrmasymen óńirlerde «Januıa», «Baqytty otbasy» qoldaý kórsetý ortalyqtary uıymdastyryldy. Otbasy jáne áke bolý ınstıtýtyn birlesken kúsh-jigermen nyǵaıtýymyz qajet. Mınıstrlik osy máselelerdi sheshý úshin bar kúshin salady», - dedi Sh. Baımanov.

Avtor Aıjan Serikjanqyzy
Basty sózder: Qoǵam, Nur-Sultan,
Joǵary qaraı