Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstanda ınternet-alaıaqtyq faktileriniń sany 2 esege ósken

2021 jyldyń 17 qarasha 2021 17:16

NUR-SULTAN. QazAqparat - QR Premer-Mınıstri Asqar Mamınniń tóraǵalyǵymen ótken quqyq buzýshylyqtardyń aldyn alý jónindegi vedomstvoaralyq komıssııa (VAK) otyrysynda ınternet-alaıaqtyqqa qarsy is-qımyl jáne jol qozǵalysy qaýipsizdigin qamtamasyz etý máseleleri qaraldy. Bul týraly QazAqparat Úkimettiń saıtyna silteme jasap habarlaıdy.

Іshki ister mınıstri Erlan Turǵymbaev, Qarjy naryǵyn retteý jáne damytý agenttiginiń tóraǵasy Mádına Ábilqasymova, Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın, ındýstrııa jáne ınfraqurylymdyq damý mınıstri Beıbit Atamqulov, Batys Qazaqstan oblysynyń ákimi Ǵalı Esqalıev, Soltústik Qazaqstan oblysynyń ákimi Qumar Aqsaqalov jáne t. b. baıandama jasady. 2021 jyldyń 10 aıynda Qazaqstanda tirkelgen ınternet-alaıaqtyq faktileriniń sany 17,8 myńdy qurady, bul ótken jyldyń sáıkes kezeńindegi kórsetkishten 2 esege jýyq kóp.

Internet-alaıaqtyqtar Nur-Sultan jáne Almaty qalalarynda, Qaraǵandy, Qostanaı jáne Shyǵys Qazaqstan oblystarynda kóbirek tirkelgen. Kıber-alaıaqtyqtyń keń taralǵan tásilderi – ınternet-habarlandyrýlar boıynsha taýar nemese qyzmet úshin aldyn ala tólem ne tolyq tólem alý (8,2 myń fakt), mıkrokredıttik uıymdardyń saıttarynda jalǵan onlaın-qaryz resimdeý (2,7 myń), bankterdiń qaýipsizdik qyzmetteriniń atynan qońyraý shalý arqyly bank shottarynan aqsha urlaý (2,3 myń), túrli jobalarǵa, oıyndarǵa jáne t. b. tıimdi aqsha salýdy usyný (1,9 myń), jalǵan siltemeler jiberý arqyly jeke derekterdi nemese aqshany ıelený (1,3 myń) jáne t. b.




Bul rette alaıaqtar shyǵys nómirlerin qazaqstandyq uıaly operatorlardyń abonenttik nómirlerine aýystyrý boıynsha hakerlik baǵdarlamalardy qoldanady. Internet-alaıaqtyqpen kúresý maqsatynda ІІM-niń kıberqylmysqa qarsy is-qımyl bólimshelerin kadrlyq jáne tehnıkalyq qamtamasyz etý kúsheıtildi.
QNRDA bıylǵy sáýir aıynda onlaın mıkrokredıtter berý kezinde qaryz alýshylardy sáıkestendirýdiń jańa tártibin engizdi – sáıkestendirý úsh tásildiń birimen júrgiziledi, atap aıtsaq: ETsQ arqyly, qaryz alýshynyń bıometrııalyq parametrleriniń sáıkestigin salystyryp tekserý, jeke derekterdi eki faktorly tekserý jáne naqty ýaqyt rejıminde tulǵanyń beınesin tekserý. 2021 jyldyń 10 aıynda jol qozǵalysy qaýipsizdigin qamtamasyz etý aıasynda júrgizýshi tártibine baqylaý kúsheıtildi. Mas kúıinde kólik júrgizgeni úshin 20 myńǵa jýyq júrgizýshi ustaldy, 5 myń qarsy qozǵalys jolaǵyna shyǵý jaǵdaıynyń joly kesildi. 24,5 myń júrgizýshi kólik basqarý quqyǵynan aıyryldy, onyń ishinde 1,3 myńy ómir boıy kólik júrgize almaıdy. 20 myń ereje buzýshy ákimshilik qamaýǵa alyndy. 220,5 myń jaıaý júrginshige aıyppul salyndy. Іshki ister, ındýstrııa jáne ınfraqurylymdyq damý mınıstrlikteri Jol qozǵalysy qaýipsizdigin arttyrý jónindegi 2020-2022 jyldarǵa arnalǵan jol kartasyn bekitti. Bıyl apatty-qaýipti ýchaskelerde 50 myń sharshy metrden astam shýyl jolaqtary, 220 jaryqdıodty jol belgileri, 55 myń jaryqdıodty katafottar jáne 400 jol býferleri ornatyldy. Qalalar men eldi mekenderdi aınalyp ótetin joldar, jerústi jaıaý júrginshiler kópirleri salynyp jatyr. Tehnıkalyq tekseristen jalǵan ótkeni úshin Tehnıkalyq baıqaý ortalyqtary men avtokólik quraldary ıeleriniń jaýapkershiligin kúsheıtý boıynsha jumystar júrgizilýde.
Úkimet basshysy azamattardyń tsıfrlyq qaýipsizdigin jáne olardyń aqshalaı qarajatynyń saqtalýyn qamtamasyz etýdi, sondaı-aq ınternet-alaıaqtyqqa qarsy is-qımyl máseleleri boıynsha halyqpen aqparattyq-túsindirý jumystaryn kúsheıtýdi tapsyrdy.
Premer-Mınıstr joldardaǵy apattardyń aldyn alý jáne olardy azaıtý sharalaryn odan ári jetildirý, óńirlerde biryńǵaı kólik saıasatyn iske asyrý jónindegi is-sharalar keshenin ázirleý qajet ekenin atap ótti.

Joǵary qaraı