Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstanda múgedekterge qandaı qoldaý kórsetiledi

2021 jyldyń 8 qazan 2021 10:28

NUR-SULTAN. QazAqparat - Qazannyń ekinshi jeksenbisinde Qazaqstanda Múgedekter kúni atap ótiledi. Elimizde 702 myńnan astam múgedektigi bar adam turady, dep habarlaıdy QazAqparat.

Erekshe qajettilikteri bar adamdardy áleýmettik qoldaý jáne olardy ń ómir súrý sapasyn arttyrý - memlekettik saıasattyń basty baǵyttarynyń biri jáne QR Eńbek jáne halyqty áleýmettik qorǵaý mınıstrliginiń birinshi kezektegi mindetteriniń biri.

Búgingi tańda Qazaqstanda turatyn 702,1 myń múgedektigi bar adamnyń 424,5 myńy eńbekke qabiletti jasta (60,5%), 180,7 myńy zeınetkerlik jasta (25,7%) jáne 96,9 myńy 18 jasqa deıingi balalar (13,8%).

Múgedektigi bar adamdardy áleýmettik qorǵaý salasyndaǵy memlekettik saıasat olardyń qoǵamǵa tolyqqandy kirigýine jáne halyqtyń osy sanaty basqalarmen teńdeı ómir súrip, jumys istep, bilim alýy, qoǵam ómirine erkin qatysýy, belgili bir sheshimder qabyldaýy jáne t. b. úshin kedergilerdi eńserýge, joıýǵa baǵyttalǵan.

Múgedektigi bar adamdardyń quqyqtary men zańdy múddelerin qamtamasyz etý úshin Qazaqstanda áleýmettik járdemaqylar men tólemder túrindegi memlekettik kómek pen qoldaýdy; áleýmettik ońaltý sheńberinde organızmniń joǵaltqan fýnktsııalarynyń ornyn toltyrýdy; arnaýly áleýmettik qyzmetter kórsetýdi qamtıtyn kóp deńgeıli áleýmettik qorǵaý júıesi jumys isteıdi.

Múgedektigi bar adamdar kórsetilimderi men qarsy kórsetilimderi eskerile otyryp, memlekettik bıýdjet qarajaty esebinen protezdik-ortopedııalyq kómekpen, sýrdo-tıflotehnıkalyq quraldarmen, kreslo-arbalarmen, sanatorıı-kýrorttyq emdelýmen, mindetti gıgıenalyq quraldarmen, jeke kómekshiniń jáne ymdaý tili mamanynyń qyzmetterimen qamtamasyz etiledi.

«Memleket turaqty negizde múgedektigi bar adamdardy áleýmettik qamtamasyz etýdi jetildirý boıynsha sharalar qabyldaýda. 2020 jyly áleýmettik tólemderge, tehnıkalyq quraldarmen jáne ońaltý qyzmetterimen qamtamasyz etýge memlekettik bıýdjetten 455 mlrd teńge bólindi, aǵymdaǵy jyly osy maqsattarǵa 486 mlrd teńge kózdelgen. Múgedektigi bar adamdardyń ómir súrý sapasyn jaqsartý jónindegi ulttyq jospardy iske asyrý sheńberinde tirshilik áreketiniń barlyq baǵyttary boıynsha keshendi sharalar qabyldanýda», – dep habarlady QR Eńbek jáne halyqty áleýmettik qorǵaý mınıstri Serik Shápkenov.

2021 jylǵy 1 qazandaǵy jaǵdaı boıynsha múgedektik boıynsha memlekettik áleýmettik járdemaqy (budan ári – MÁJ) alýshylardyń sany 528,1 myń adamdy quraıdy. 2021 jyldyń qańtar-qyrkúıek aılary aralyǵynda respýblıkalyq bıýdjetten múgedektigi boıynsha MÁJ tóleýge 232,4 mlrd. teńge jumsaldy.

Múgedektik boıynsha memlekettik áleýmettik járdemaqylardyń mólsheri múgedektik tobyna jáne sebebine, sondaı-aq tıisti qarjy jylyna arnalǵan «Respýblıkalyq bıýdjet týraly» zańda belgilenetin eń tómen kúnkóris deńgeıiniń shamasyna baılanysty bolady. 2021 jylǵy 1 qazandaǵy jaǵdaı boıynsha múgedektigi boıynsha MÁJ-diń ortasha mólsheri 48 743 teńgeni qurady.

«Azamattarǵa yńǵaıly bolý úshin 2020 jyly múgedektigi bar adamdarǵa ońaltýdyń tehnıkalyq quraldary (budan ári – OTQ) men qyzmetterin óndirýshi men jetkizýshini óz betinshe tańdaýǵa múmkindik beretin Áleýmettik qyzmetter portaly iske qosyldy. Jyl basynan beri Portal arqyly 214 myńnan astam múgedektigi bar adam OTQ, 6 myńnan astamy – ymdaý tili qyzmetin, 32,5 myńnan astamy – jeke kómekshiniń qyzmetin, 48 myńǵa jýyǵy – sanatorlyq-kýrorttyq em aldy», – dep tolyqtyrdy Serik Shápkenov.

Sonymen qatar, Nur Otan partııasynyń «Ózgerister joly: ár azamatqa laıyqty ómir!» atty saılaýaldy baǵdarlamasyn oryndaý maqsatynda Eńbekmıni múgedektigi bar adamdardy áleýmettik qamsyzdandyrý jáne olar alatyn qyzmetterdiń sapasyn arttyrý maqsatynda zańnamany jetildirý boıynsha úlken jumys júrgizdi. Osy jumystyń iske asyrylýyn baqylaýdy mınıstrliktiń jobalyq ofısi júzege asyrdy.

Qyrkúıekte QR Parlamenti qabyldaǵan «Qazaqstan Respýblıkasynyń keıbir zańnamalyq aktilerine azamattardyń jekelegen sanattaryn áleýmettik qorǵaý máseleleri boıynsha ózgerister men tolyqtyrýlar engizý týraly» zańnyń erekshe mańyzy bar.

«Qujatta múgedektiktiń sebebine qaramastan, I toptaǵy múgedektigi bar adamdarǵa kútim jasaıtyn azamattarǵa arnalǵan járdemaqyny engizý qarastyrylǵan. Nátıjesinde bul járdemaqy bógde adamnyń kútimin qajet etetin qosymsha 24 myń adamdy qamtıdy.

Sondaı-aq, zańda 7 jastan 16 jasqa deıingi balalardy múgedektik toptary boıynsha bólý qarastyrylǵan. Bul kórsetiletin ońaltý is-sharalary men áleýmettik kómekti balalar aýrýynyń aýyrlyq dárejesine qaraı saralaýǵa múmkindik beredi. Bul rette múgedektigi bar balalardyń barlyq toptary úshin járdemaqy mólsheri 16,7%-dan 37% - ǵa deıin ulǵaıtylatyn bolady. Bul shara múgedektigi bar 30 myńnan astam balaǵa qatysty bolady.

Sondaı-aq zańda múgedektik boıynsha jáne asyraýshydan aıyrylý jaǵdaıy boıynsha járdemaqylardy bir mezgilde alý quqyǵyn berý kózdeledi.

Jumys berýshiniń mindettemelerin oryndaý múmkin bolmaǵan jaǵdaıda, eńbek jaraqatynan múgedek bolǵan adamdardy memleket esebinen OTQ-men jáne ońaltý qyzmetterimen qamtamasyz etý - zańnyń taǵy bir jańashyldyǵy.

Sonymen qatar, qujatta múgedektigi bar bala tárbıelep otyrǵan otbasylardyń bala kámeletke tolǵannan keıin turǵyn úı kezeginde turý quqyǵyn saqtaý kózdeledi.

Sonymen qatar, zańda múgedektigi bar balaǵa kútim jasaý merzimin 18 jasqa deıin uzartý qarastyrylǵan, bul jasyna baılanysty zeınetaqy tólemderi men bazalyq zeınetaqyny taǵaıyndaýǵa oń áser etedi», – dedi Serik Shápkenov.

Sondaı-aq, halyqtyń basqa sanattarymen qatar múgedektigi bar adamdar turaqty turatyn nemese qyzmet alatyn medıtsınalyq-áleýmettik mekemelerdiń (budan ári – MÁM) qyzmetin reglamentteıtin birqatar buıryqtarǵa ózgerister engizildi

Atap aıtqanda, barlyq MÁM-de beınebaqylaý kameralaryn ornatý qarastyrylǵan. Kameralar uıymǵa irgeles jatqan aýmaqtyń perımetri boıynsha, negizgi jáne qosalqy kireberisterdiń janynda, sondaı-aq úı-jaılar men jalpy paıdalaný kabınetterinde ornatylady. MÁM-degi týystary men jaqyn adamdarynyń jazbalardy kórýge ruqsaty bolady.

Budan basqa, MÁM dırektorlaryn taǵaıyndaý kezinde olarǵa qoıylatyn biliktilik talaptary qaıta qaraldy. Bul azamattarmen jumys isteýde úlken tájirıbesi bar qoǵamdyq birlestikterdiń, úkimettik emes jáne basqa da uıymdardyń basshylaryn tartý arqyly óńirlerdegi kadrlyq daǵdarys problemasyn sheshýge múmkindik beredi.

Sonymen qatar, MÁM-niń materıaldyq-tehnıkalyq qamtamasyz etý normatıvteri jaqsardy.

MÁM qyzmeti áleýmettik qorǵaý organdarynyń turaqty baqylaýynda.

«2021 jyldyń І jartyjyldyǵynda Eńbekmıni Eńbek, áleýmettik qorǵaý jáne kóshi-qon komıtetiniń aýmaqtyq departamentteriniń mamandary medıtsınalyq-áleýmettik mekemelerge «Múgedekterdi áleýmettik qorǵaý týraly» jáne «Arnaýly áleýmettik qyzmetter týraly» zańdardyń saqtalýy boıynsha 469 tekserý júrgizdi. Júrgizilgen baqylaý is-sharalarynyń qorytyndysy boıynsha múgedektigi bar adamdardy áleýmettik qorǵaý jáne arnaýly áleýmettik qyzmetter kórsetý salasynda anyqtalǵan buzýshylyqtardy joıý týraly 379 nusqama, onyń ishinde arnaýly áleýmettik qyzmetter kórsetý salasynda 70 nusqama berildi. Nátıjesinde jalpy somasy 7,4 mln teńgege 71 ákimshilik aıyppul salyndy, onyń ishinde arnaýly áleýmettik qyzmet kórsetý salasynda 335,4 myń teńgege salyndy. Mınıstrlik MÁM jumysynyń aldyn alý jáne monıtorıngin kúsheıtý boıynsha júıeli sharalardy ázirleý boıynsha turaqty jumys júrgizýde», – dep atap ótti Serik Shápkenov.

Erekshe qajettilikteri bar adamdar úshin medıtsınalyq-áleýmettik saraptamanyń rásimderi men merzimderin ońtaılandyrý maqsatynda Eńbekmıni múgedektikti syrttaı belgileýdi engizý boıynsha jumys júrgizýde.

Osy aıdyń ózinde joba Qazaqstannyń 6 óńirinde pılottyq negizde bolady. Ony iske asyrý keleshekte múgedektigi bar adamdardyń ınstantsııalar boıynsha júrýin jáne kórsetiletin qyzmetti berýshimen tikeleı baılanysyn boldyrmaýǵa múmkindik beredi.

Aǵymdaǵy jyldyń qazan aıynda jergilikti atqarýshy organdar múgedekter kúnine oraılastyrylǵan saltanatty is-sharalar ótkizedi (baıqaý-konkýrstyń, shyǵarmashylyq festıvalderdiń, Paralımpıada oıyndarynyń, arnaıy Olımpıadalar men chempıonattardyń jeńimpazdaryn marapattaý), múgedektigi bar adamdardy áleýmettik qorǵaý júıesin damytýǵa úles qosqan belsendilerge qurmet kórsetedi.

Qalalar men aýdandardyń ákimderi múgedektigi bar adamdardy, múgedektigi bar balalardy tárbıelep otyrǵan otbasylardy aralaıdy.

Medıtsınalyq-áleýmettik mekemeler men ońaltý ortalyqtarynda múmkindikteri shekteýli jandarǵa arnalǵan «Ashyq esik kúnderi» ótedi.

Sonymen qatar, qaıyrymdylyq aktsııalary aıasynda múgedektigi bar aýyr naýqastarǵa barý josparlanǵan, olarǵa azyq-túlik sebetteri beriledi.


Joǵary qaraı